.jpg)
អាជ្ញាធរថៃឃាត់បុរសវៀតណាមជិះទូកពោងទៅរកប្រពន្ធនៅឥណ្ឌា។ រូបថត ហ្វេសប៊ុក
ក្រុងបាងកក: បុរសវៀតណាមម្នាក់ដែលព្យាយាមអុំទូក ២ ពាន់គីឡូម៉ែត្រ ពីប្រទេសថៃទៅឥណ្ឌា ដើម្បីជួបភរិយា ត្រូវបានឃុំខ្លួនកាលពីថ្ងៃព្រហស្បតិ៍ ក្រោយពីត្រូវបានសង្គ្រោះនៅឆ្នេរប្រទេសថៃ។ នេះបើយោងតាមមន្ដ្រីនាវីជាន់ខ្ពស់បានប្រាប់ AFP។
លោក ហូ ហ៊ូង ហ៊ុង ចេញដំណើរពីកោះវិស្សមកាលភូកេតរបស់ថៃតាមរយៈពោង ដោយភ្ជាប់ជាមួយទឹក និងមី តែគ្មានប្រព័ន្ធត្រីវិស័យ ដែលមានបំណងចង់ឆ្លងកាត់ឆក ប៊ែងហ្គាល់ នៅជិតដល់រដូវព្យុះស៊ីក្លូន។
ទូកនេសាទ ១ បានប្រទះឃើញបុរសវ័យ ៣៧ ឆ្នាំរូបនេះ កាលពីថ្ងៃពុធ នៅក្បែរប្រជុំកោះស៊ីមីឡាន ចម្ងាយប្រមាណ ៨០ គីឡូម៉ែត្រពីដីគោកថៃ និងបានទាក់ទងទៅអង្គភាពសន្ដិសុខម៉ារីនរបស់កងនាវា ដែលមកដល់ទីតាំង និងសង្គ្រោះបុរសរូបនេះ។
លោក ហូ បានប្រាប់ក្រុមមន្ដ្រីថា លោកព្យាយាមត្រាច់ចរទៅរកភរិយា ដែលធ្វើការនៅទីក្រុងម៉ុមបៃ ក្រោយពីរស់នៅបែកគ្នា ២ ឆ្នាំរស់ដោយសារការរឹតបន្ដឹងធ្វើដំណើរពីវិបត្ដិកូវីដ។ យោងតាមនាយនាវា ភីឆេត សុងតាន់ នៃទីបញ្ជាការកងប្រតិបត្ដិម៉ារីនថៃ។
លោក ភីឆេត បានឱ្យដឹងថា បុរសវៀតណាមអត់នផែនទី ត្រីវិស័យ GPS ឬសម្លៀកបំពាក់សម្រាប់ផ្លាស់ និងទឹកមិនគ្រប់គ្រាន់ថែមទៀត។
ដំបូងឡើយ លោកជិះយន្ដហោះមកទីក្រុងបាងកក តែក្រោយមកទើបដឹងថា អត់មានទិដ្ឋាការចូលឥណ្ឌា លោកក៏ជិះរថយន្ដក្រុងទៅកាន់ភូកេត ជាទីដែលលោកបន្តអុំទូកពោងចេញដំណើរផ្សងព្រេងរកប្រពន្ធ។
ក្រោយពេលចាកចេញនៅថ្ងៃទី ៥ ខែមីនា លោក ហូ ត្រូវបានខ្យល់បោកបក់តែលតោល ២ សប្ដាហ៍ដោយគ្មានគោលដៅ មុនពេលត្រូវគេរកឃើញ។
ក្រុមមន្ដ្រីបានទាក់ទងទៅស្ថានទូតវៀតណាម ហើយលោក ហូ នឹងត្រូវបានបញ្ជូនត្រឡប់ទៅកាន់ភូកេតដើម្បីសាកសួរបន្ថែម៕ AFP/HR
