.jpg)
អៀរឡង់ ន័រវែស និងជប៉ុននៅបន្ដអាជីវកម្មប្រមាញ់បាឡែន។ រូបថត AFP
ក្រុងរ៉ៃក្យាវិក: ក្រុមហ៊ុនប្រមាញ់បាឡែននៅសេសសល់ចុងក្រោយរបស់អៀរឡង់ បានឱ្យដឹងថា ខ្លួនគ្រោងនេសាទបាឡែនក្នុងរដូវក្ដៅនេះជាលើកដំបូងតាំងពីឆ្នាំ ២០១៨ ខណៈរដ្ឋាភិបាលគិតពីលទ្ធផលបញ្ចប់ការប្រមាញ់សត្វចិញ្ចឹមកូនដោយទឹកដោះនៅក្នុងទឹកនេះ។
មានតែអៀរឡង់ ន័រវែស និងជប៉ុនដែលនៅបន្ដអាជីពប្រមាញ់បាឡែនក្នុងពិភពលោក នៅចំពោះមុខការរិះគន់យ៉ាងធ្ងន់ធ្ងរពីក្រុមអ្នកបរិស្ថាន និងក្រុមអ្នកការពារសិទ្ធិសត្វ។
គ្រីសចាន់ ឡូហ្វសុន ប្រធានក្រុមហ៊ុននេសាទបាឡែន Hvalur បានប្រាប់ AFP ថា៖ «យើងគ្រោងចេញទៅសមុទ្រក្នុងរដូវក្ដៅនេះ។ បាឡែនកំពុងរង់ចាំយើង»។
ការនេសាទ ៣ រដូវចុងក្រោយ ដែលចាប់ផ្ដើមពីពាក់កណ្ដាលខែមិថុនា ដល់ចុងខែកញ្ញា ក្នុងប្រទេសអៀរឡង់ ស្នប្រមាញ់សត្វធំៗរបស់ក្រុមហ៊ុន Hvalur ត្រូវបានទុកចោល ទោះបីជាកូតាប្រចាំឆ្នាំ ក្រុមហ៊ុនអាចនេសាទបាឡែនយកព្រុយបាន ២០៩ ក្បាល និងបាឡែន Minke ២១៧ ក្បាល នៅចន្លោះឆ្នាំ ២០១៩ និងឆ្នាំ ២០២៣។
ជប៉ុន គឺជាទីផ្សារធំរបស់អៀរឡង់សម្រាប់ផ្គត់ផ្គង់បាឡែន ជាពិសេសបាឡែនយកព្រុយ។ ក្រោយពីផ្អាក ៣ ទសវត្សរ៍ ជប៉ុនបានវិលទៅកាន់ការធ្វើនេសាទបាឡែនពាណិជ្ជកម្មឡើងវិញក្នុងឆ្នាំ ២០១៩។
ក្នុងឆ្នាំ ២០១៨ Hvalur បានប្រមាញ់បាឡែនយកព្រុយ ១៤៦ ក្បាល។ បាឡែន Minke តែ ១ ក្បាលប៉ុណ្ណោះ ត្រូវបានសម្លាប់នៅប្រទេសអៀរឡង់ តាំងពីពេលនោះមក។
កាលពីដើមខែកុម្ភៈ រដ្ឋមន្ដ្រីជលផល Svandis Svavarsdottir បានថ្លែងថា លោកស្រីកំពុងពិចារណាបញ្ឈប់ការធ្វើនេសាទបាឡែនចាប់ពីឆ្នាំ ២០២៤ ដោយបានលើកឡើងពីតម្រូវការថយចុះ បញ្ហាបរិស្ថាន និងចំណូលសេដ្ឋកិច្ចទាប៕ AFP/HR
