.jpg)
លោកប្រើពេល ៣ ខែ ក្នុងការគូរគំនូរ មុននឹងធ្វើពិធីយាងទេវតាមកសណ្ឋិត។ រូបថត AFP
ក្រុងកដ្ឋមណ្ឌូ: ក្បាលកោរត្រងោល និងពោះទទេ វិចិត្រករ យូរ៉ាយ បាករ៉ាឆាយ៉ា ជ្រលក់ជក់គូរភ្នែកទេវតា តារា ដោយមានសំឡេងព្រះធម៌ព្រះពុទ្ធសាសនាឮរហៀងៗ។
វិចិត្រករវ័យ ៤០ ឆ្នាំរូបនេះ កំពុងតែបង្ហើយស្នាដៃគំនូរសាសនាបែបប្រពៃណី ដែលល្បីល្បាញខាងរចនាលម្អិត ពណ៌ចម្រុះ និងក្បួនតម្រាដ៏បរិសុទ្ធសម្រាប់អ្នកប្រណិប័តន៍។
លោក បាករ៉ាឆាយ៉ា បានចំណាយពេល ៣ ខែ ដើម្បីបញ្ចប់គំនូរ ទេវតានៃសេចក្ដីមេត្ដា តារាបៃតង ដែលត្រូវបានគោរពបូជាពីសំណាក់ពុទ្ធសាសនិក និងព្រហ្មញ្ញសានិកនៅនេប៉ាល់។
មុនពេលចាប់ផ្ដើមកិច្ចការ លោកបានកោរសក់ និងកាត់ក្រចក ខណៈលោកអាចារ្យពុទ្ធសាសនាប្រោះព្រំដល់គំនូររបស់លោក និងជ្រើសរើសវេលាដ៏ស័ក្ដិសមដើម្បីឱ្យវិចិត្រកររូបនេះផ្ដើមរំលេចគំនូរ។
លោក បាករ៉ាឆាយ៉ា ក្រោកពីដំណេកនាពេលព្រឹកព្រលឹមរៀងរាល់ថ្ងៃ និងមិនទទួលទានអ្វីទាំងអស់រហូតដល់បង្ហើយការងារប្រចាំថ្ងៃ ដោយលោកប្រណិប័តន៍អាហារបួស និងតមសូម្បីតែខ្ទឹមស ប៉េងប៉ោះ និងខ្ទឹមបារាំង។
លោកបានប្រាប់ AFP ថា៖ «រាងកាយហាក់ដូចជាស្រាល ហើយខ្ញុំមានការផ្ចង់អារម្មណ៍ខ្ពស់ និងមានស្មារតីផ្ចង់គូរគំនូរពេញលេញ»។
លោក បាករ៉ាឆាយ៉ា កោរសក់ តមអាហារ ដើម្បីផ្ចង់គូរគំនូរសាសនា។ រូបថត AFP
ការសម្របខ្លួនទៅនឹងក្បួនខ្នាតដ៏តឹងរ៉ឹងរបស់លោក បាករ៉ាឆាយ៉ា ចាប់ផ្ដើមប្រណិប័តន៍កាលពីឆ្នាំមុន នៅពេលលោកទៅដល់សារមន្ទីរ ១ ក្នុងទីក្រុងកដ្ឋមណ្ឌូ និងកើតក្ដីបំណងគូររូបទេវតាព្រះពុទ្ធសាសនា ១ អង្គ ខណៈប្រពៃណីទំនៀមទំលាប់គូរគំនូរដ៏បុរាណនេះត្រូវបានបំភ្លេចចោល។
លោក រ៉ាចាន់ សាគីយ៉ា ស្ថាបនិកសារមន្ទីរសិល្បៈនេប៉ាល់ បាននិយាយថា លោកពិតជាឯកភាពនឹងគំនិតចង់អនុវត្ដទំនៀមទម្លាប់ចាស់ឡើងវិញ។
លោកឱ្យដឹងថា៖ «ការប្រណិប័តន៍សិល្បៈគំនូរសាសនាគឺវិសេស និងមានតម្លៃខុសពីស្នាដៃវិចិត្រទូទៅ»។
គំនូរសាសនាដែលត្រូវបានអភិរក្សដ៏ចំណាស់បំផុតមានអាយុកាលតាំងពីសតវត្សរ៍ទី១៣ ប៉ុន្ដែក្រុមបញ្ញវន្តជឿថា ប្រពៃណីនេះមានអាយុកាលចាស់ជាងនេះ ដោយគំនូរសម័យមុននេះ បានបាត់បង់ដោយសារតែការ-ប្រើប្រាស់សម្ភារងាយផុយស្រួយ។
ក្រោយពីធ្វើពិធីយាងទេវតាតារាបៃតងចូលសណ្ឋិតក្នុងគំនូរសាសនានេះ វិចិត្រករ បាករ៉ាឆាយ៉ា បានបន្ដថា៖ «វាមិនមែនសំដៅលើតែសិល្បៈនោះទេ ជំនឿលើព្រះពុទ្ធសាសនា និងព្រហ្មញ្ញសាសនាស្ថិតនៅលើគំនូរនេះផងដែរ»៕ AFP/HR
