តារាចម្រៀងស្រីពហុជំនាញ អ្នកនាង ខាត់ សុឃីម ទាំងចម្រៀងសម័យ និងប្រពៃណី។ នាដើមឆ្នាំ ២០២២ នេះស្រាប់តែ លេចវត្តមានតារាចម្រៀងស្រីពហុជំនាញ ខាត់ សុឃីម នៅផលិតកម្មដាវីត្រា។ រូបថត ហ្វេសប៊ុក
ភ្នំពេញៈ នាពេលថ្មីៗនេះ ស្រាប់តែលេចវត្តមានតារាចម្រៀងស្រីពហុជំនាញ អ្នកនាង ខាត់ សុឃីម បានបង្ហើរសំនៀងបទចម្រៀងដំបូងនៅផលិតកម្មថ្មី ដើម្បីត្រៀមចេញបំពេអារម្មណ៍ដល់ប្រិយមិត្ត និងជាកិច្ចស្វាគមន៍ មុនថ្ងៃចូលឆ្នាំថ្មីប្រពៃណីខ្មែរខែក្រោយ។
បទចម្រៀងតារាចម្រៀងស្រីរៀមច្បងត្រកូលខាត់ អ្នកនាង ខាត់ សុឃីម ចេញដំបូងនោះ មានចំណងជើងថា «អូនលែងប្តីហើយ» នៅផលិតកម្មដាវីត្រា គឺជាផលិតកម្មថ្មីសន្លាង ទើបបង្កើតឡើង ក្នុងគ្រាមានវិបត្តិកូវីដ ១៩។
នាពេលកន្លងមកធ្លាប់មានដំណឹងថា មានផលិតកម្មថ្មីឈ្មោះដាវីត្រា មេឌៀ (Davitra Media) មានគម្រោងចែចូវចង់បានអ្នកនាង ខាត់ សុឃីម ទៅច្រៀងជាមួយនឹងក្រុមតារាចម្រៀងចាស់ៗ ដែលប្រឡូកសិល្បៈស្របាលៗគ្នា ដូចជាលោក ណូយ វ៉ាន់ណេត លោក ឈឿន ឧត្តម អ្នកនាង ម៉េង កែវពេជ្ជតា និងអ្នកនាង ហ៊ឹម ស៊ីវន ជាដើមនោះ។ តែ អ្នកនាង ខាត់ សុឃីម បដិសេធរឿងផ្លាស់ចេញទៅទ្រនំថ្មីសន្លាងមួយ ដែលចែចូវចង់បានទៅច្រៀង ដោយបានអះអាងថា សុខចិត្តនៅរួមសុខរួមទុក្ខជាមួយនឹងទ្រនំចាស់ហង្សមាស ក្នុងនាមជាតារាចម្រៀងស្រីឯករាជ្យមិនមានជាប់កុងត្រា។
អ្នកនាង ខាត់ សុឃីម ក៏ធ្លាប់បញ្ជាក់ប្រាប់ ភ្នំពេញ ប៉ុស្តិ៍ថា៖ «ការពិតណាស់ នាពេលកន្លងមកនោះ ពិតជាមានផលិតកម្មថ្មីបានទាក់ទងរឿងឱ្យទៅច្រៀងមែន តែខ្ញុំបានបដិសេធ។ នាងខ្ញុំមិនព្រមចេញទៅ ដោយសារចិត្តខ្លួនមិនចង់ចេញពីផលិតកម្មចាស់ ដែលខ្លួនធ្លាប់នៅរួមសុខរួមទុក្ខ បើទោះបីជា នាពេលបច្ចុប្បន្ន ខ្ញុំបានផុតកុងត្រាទៅហើយក្តី តែខាងផលិតកម្ម គេក៏មានជម្រើសល្អ សម្រាប់នាងខ្ញុំផងដែរ ដោយបានទុកជម្រើស តាមពេលរបស់នាងខ្ញុំ ខណៈពេលណាខាងផលិតកម្មហង្សមាស មានបទចម្រៀងឱ្យច្រៀងនោះ ខ្ញុំនឹងច្រៀង តែប្រសិនបើមិនមាន ទេ ក៏មិនជាអ្វីដែរ សម្រាប់នាងខ្ញុំ»៕
