ក្រុងញូវយ៉ក: អ្នកសិល្បៈប៉ុបអាមេរិក ជេហ្វ គូនស៍ គ្រោងបញ្ជូនរូបចម្លាក់ជាច្រើនទៅកាន់ឋានព្រះចន្ទក្នុងឆ្នាំនេះ តាមរយៈយានអវកាសដែលត្រៀមចេញដំណើរពីមជ្ឈមណ្ឌលអវកាស Kennedy Space Center រដ្ឋហ្វ្លរីដា។ នេះបើយោងតាមវិចិត្រសាលលោកបានឱ្យដឹងពីថ្ងៃអង្គារ។
លោក គូនស៍ ជាអ្នកសិល្បៈមានជីវិតដែលស៊ីថ្លៃបំផុត និងល្បីបំផុតម្នាក់ ជាមួយឈ្មោះបោះសំឡេងចំពោះស្នាដៃសិល្បៈ ដូចជា «Ballon Dog» និង «Rabbit» ហើយស្នាដៃរបស់លោកត្រូវបានដាក់តាំងបង្ហាញតាមវិចិត្រសាលទូទាំងពិភពលោក។
វិចិត្រសាល Pace Gallery ក្រុងញូវយ៉កបានឱ្យដឹងថា គម្រោងថ្មីរបស់លោក «Moon Phases» មានចម្លាក់រូបមនុស្ស ដែលនឹងដឹកជញ្ជូនទៅរក្សាទុកនៅឋានព្រះចន្ទតាមរយៈផ្កាយរណបធុនតូច។
លោក គូនស៍ ក៏នឹងផលិតជាប្រភេទចម្លាក់ឌីជីថលដ៏ល្អវិសេស ដែលធ្វើឱ្យរូបលោកបោះជំហានឈានជើងចូលក្នុងពិភពវត្ថុឌីជីថល NFT ដ៏កាក់កប។
រូបចម្លាក់នឹងធ្វើដំណើរលើយានចម្លង «Nova-C Lunar Lander» រចនាឡើងដោយក្រុមហ៊ុនឯកជន Intuitive Machines ហើយនឹងត្រូវបានទុកដាក់នៅលើឋានព្រះចន្ទក្នុងបរិវេណ Oceanus Procellarum។
លោក គូនស៍ អាយុ ៦៧ ឆ្នាំ បាននិយាយថា៖ «ភាពជោគជ័យរបស់យើងនៅអវកាសតំណាងឱ្យសក្ដានុ-ពលគ្មានដែនកំណត់របស់មនុស្ស»។
វិចិត្រសាលមិនបានបង្ហាញព័ត៌មានលម្អិតស្ដីពីចំនួនរូបចម្លាក់ដែលធ្វើដំណើរទៅកាន់ឋានព្រះចន្ទនោះទេ តែបានឱ្យដឹងថា ទីតាំងនោះនឹងក្លាយជាតំបន់បេតិកភណ្ឌឋានព្រះចន្ទ។
គម្រោងនេះនឹងក្លាយជាការប្រារឰខួប ៥០ ឆ្នាំ តាំងពីដំណើរផ្សងព្រេងទៅកាន់ឋានព្រះចន្ទចុងក្រោយបំផុតរបស់អាមេរិក៕ AFP/HR