.jpg)
ភ្នំសម្លៀកបំពាក់បន្សល់ពីវិស័យ fashion ផ្លេកបន្ទោរ។ រូបថត AFP
ក្រុងប៊្រុចសែល: សហភាពអឺរ៉ុបបានប្រកាសកាលពីថ្ងៃពុធថា សំណើបង្ក្រាបលើ «ជំនួញឧស្សាហកម្មសម្លៀកបំពាក់ចម្លងតាមវិស័យ fashion» ដោយជំរុញឱ្យធ្វើការកែកុនសម្លៀកបំពាក់ចាស់ៗ និងប្រើប្រាស់ឱ្យបានយូរអង្វែង ដើម្បីសម្រាលបន្ទុកបរិស្ថាន។
អនុប្រធានគណកម្មការសហភាពអឺរ៉ុប ហ្វ្រង់ ធីមម៉ែរ-មេនស៍ បាននិយាយថា៖ «ដល់ពេលបញ្ចប់ម៉ូដែលចម្លង ផលិត ឈប់ប្រើ និងបោះចោល ដែលវាធ្វើឱ្យប៉ះពាល់ដល់ភពផែនដីយើង សុខភាពយើង និងសេដ្ឋកិច្ចយើង»។
ផែនការដែលពេលនេះនឹងត្រូវបានចរចាដោយរដ្ឋ និងអ្នកតំណាងរាស្ដ្រជាសមាជិកសហភាពអឺរ៉ុប មានបំណងធានាថា នៅមុនឆ្នាំ ២០៣០ វាយនភណ្ឌលក់ក្នុងតំបន់អឺរ៉ុប នឹងត្រូវបានផលិតឡើងតាមលទ្ធភាពនៃការកែច្នៃអស់សក្ដានុពល និងកាត់បន្ថយបរិមាណកម្ទេចប្លាស្ទិកពីសាច់ក្រណាត់ឱ្យបានច្រើនតាមអាចធ្វើទៅបាន។
សេចក្ដីថ្លែងការណ៍ឱ្យដឹងថា៖ «ឧស្សាហកម្ម fashion ផ្លេកបន្ទោរ គួរតែក្លាយជារឿងហួសសម័យ។ ការកែច្នៃប្រើប្រាស់ឡើងវិញដ៏ចំណេញសេដ្ឋកិច្ច និងដេរប៉ះជួសជុលគួរតែមានវិសាលភាពទូលំទូលាយ»។
វាយនភណ្ឌបង្កផលប៉ះពាល់ដលើបរិស្ថាន និងការប្រែប្រួលអាកាសធាតុ បន្ទាប់ពីអាហារ សំណង់ និងការដឹកជញ្ជូន។
ពលរដ្ឋម្នាក់នៅអឺរ៉ុបបានទិញសម្លៀកបំពាក់ និងរបស់ប្រើប្រាស់ពីក្រណាត់ ២៦ គីឡូក្រាម និងបានបោះចោលប្រមាណ ១១ គីឡូក្រាមនៃវាយនភណ្ឌ ឬសរុបស្មើ ៥,៨ លានតោន៕ AFP/HR
