ក្រុងហ្សាការតា: លោក ស៊ីយ៉ៃហ្វុល អារីហ្វីន ចូលចិត្ដបាល់ទាត់តាំងពីក្មេង តែលោកបារម្ភខ្លាចគ្មានឱកាសបានលេងតទៅទៀត ពេលលោកបានបាត់ជើងឆ្វេងម្ខាងកាលពីអាយុ ១២ ឆ្នាំ ក្រោយធ្លាក់ពីលើរថភ្លើង។
ពេលនេះ លោកមានអាយុ ៣៨ ឆ្នាំ និងបានវិលទៅកាន់ទីលានវិញ ក្រោយជួយបង្កើតក្លិបបាល់ទាត់ជនពិការស៊ូរ៉ាបាយ៉ា ឬ PERSAS។
ក្រុមបាល់ទាត់នៅក្នុងទីក្រុងធំទី២ ស៊ូរ៉ាបាយ៉ា របស់ឥណ្ឌូនេស៊ី ត្រូវបានចាប់ផ្ដើមកាលពីខែកុម្ភៈ និងបច្ចុប្បន្នមានសមាជិក ៨ នាក់ រួមទាំង អារីហ្វីន ជាមួយមហ្ឆិតាឆ្ពោះទៅមុខ។
លោក អារីហ្វីន ដែលលក់ដូរគ្រឿងទេស បានប្រាប់ទីភ្នាក់ងារ AFP អំឡុងពេលសម្រាកពីការហ្វឹកហាត់ថា៖ «បាល់ទាត់គឺជាចំណូលចិត្ដរបស់ខ្ញុំតាំងពីនៅកុមារភាព តែក្រោយពីជួបគ្រោះថ្នាក់ ខ្ញុំលែងសុបិនចង់លេងកីឡានេះទៀត»។
បន្ទាប់ពីរៀនបាល់ទាត់ពិការតាមអនឡាញ លោក អារីហ្វីន និងមិត្ដភក្ដិបានសម្រេចចិត្តថា ស៊ូរ៉ាបាយ៉ា ត្រូវការបង្កើតក្រុមខ្លួនឯង។
លោកមានតែជើងម្ខាង តែអរគុណដល់ជើងច្រត់ ១ គូ និងឆន្ទះស្រឡាញ់បាល់ទាត់ លោកអាចរត់លើទីលានបាល់ទាត់យ៉ាងប៉ិនប្រសប់។
គ្រូបង្វិកក្រុម លោក មូហាមេដ កូម៉ា បាននិយាយថា៖ «ខ្ញុំមានក្ដីរំភើបរីករាយ និងមោទនភាពណាស់។ ថ្វីដ្បិតតែពួកគេមានសមត្ថភាពកំណត់ក្នុងការបំផ្លាស់ទីយ៉ាងណាក៏ដោយ ក៏ពួកគេមានស្មារតីដ៏អស្ចារ្យ ដែលស័ក្ដិសមនឹងទទួលការកោតសរសើរ។ ទោះមានតែជើងម្ខាង ពួកគេមានបំណងក្រោកឈរសាជាថ្មី នោះគឺជាទង្វើដ៏គួរឱ្យស្ញប់ស្ញែង»។
លោក អារីហ្វីន និងសមាជិកក្រុមរំពឹងថា ពួកគេនឹងប្រកួតប្រជែងជើងឯកនៅទីក្រុងហ្សាការតានាពេលឆាប់ៗខាងមុខ និងអាចឈ្នះពានរង្វាន់បាល់ទាត់ជនពិការជើងនេះ។
កីឡាករជើងទោល និងចេះលេងហ្គីតារូបនេះ បានបន្ដថា៖ «អ្នកមានពិការភាពរាងកាយ សូមកុំបាត់បង់ស្មារតី។ បើអ្នកចង់លេងបាល់ សូមទាក់ទងមកខ្ញុំ»៕ AFP/HR