.jpg)
សិស្សនឹងអាចជួសជុល ផ្គុំ និងផលិតនាឡិកាប្រណីតស្ដង់ដាស្វ៊ីស។ ហេង ជីវ័ន
ភ្នំពេញ: ហែលឆ្លងនូវកិច្ចការដ៏អំណត់ផ្ចិតផ្ចង់ ភ្នែកពឹងកែវពង្រីកមើលគ្រឿងផ្គុំលម្អិតនាឡិកាអស់រយៈពេលជិត ២ ឆ្នាំ និស្សិតកម្ពុជាទាំង ៦ រូប ដែលជាជំនាន់ទី១ នៃមជ្ឈមណ្ឌលបណ្ដុះបណ្ដាលវិជ្ជាជីវៈ ព្រីនស៍ នាឡិកានៅកម្ពុជា គ្រោងនឹងបញ្ចប់ការសិក្សានៅខែកក្កដា ជាមួយជំនាញផលិតនាឡិកាដំបូងគេនៅកម្ពុជា។
បច្ចុប្បន្នពួកគេកំពុងស្ថិតក្រោមអាហារូបករណ៍ និងទទួលបានប្រាក់ឧបត្ថម្ភ ក្នុងការកសាងសមត្ថភាពជួសជុល និងផ្គុំនាឡិកាលំដាប់ខ្ពស់តាមស្ដង់ដាប្រណីតប្រទេសស្វ៊ីស។
ការបញ្ចប់ការសិក្សាជំនាន់ដំបូងនេះមានន័យថា សិស្ស ១៦ នាក់ទៀត ក៏អាចត្រៀមខ្លួនជាស្រេចក្នុងការដាក់ពាក្យដើម្បីចាប់ផ្ដើមវគ្គថ្មី។
កញ្ញា ជេស៊ីកា ថាគ័រ ទីប្រឹក្សាបច្ចេកទេស និងគ្រូបង្រៀននៅព្រីនស៍ ឱ្យដឹងថា៖ «ពួកគេទទួលបានអាហារូបករណ៍តាមរយៈការដាក់ពាក្យ ដោយសាលាមានទាំងអាហារូបករណ៍ពេញ និងពាក់កណ្ដាល ឬតាមស្ថានភាពសិស្សជាក់ស្ដែង។ យើងស្វាគមន៍ទាំងសិស្សប្រុស និងស្រី បើទោះជាឆ្នាំដំបូង យើងចៃដន្យទទួលបានសិស្សប្រុសទាំងអស់ក៏ដោយ»។
សូរិយា ជាសិស្សម្នាក់ក្នុងចំណោមសិស្សទាំង ៦ នៅមជ្ឈមណ្ឌលនេះបានប្រាប់ថា លោកពិតជាចង់ណែនាំសាលាទៅកាន់យុវជន យុវនារីខ្មែរដែលចាប់អារម្មណ៍ស្រឡាញ់ជំនាញនេះ។
លោកចាត់ទុកការចាប់យកជំនាញនេះជាឱកាសដ៏កម្រ និងមិនមានមនុស្សច្រើនទេ ដែលក្ដាប់បាន។
សិស្សកម្ពុជា ៦ នាក់ នៃជំនាន់ទី១ របស់មជ្ឈមណ្ឌលបណ្ដុះបណ្ដាលវិជ្ជាជីវៈ ព្រីនស៍ នាឡិកា នៅកម្ពុជា។ ហេង ជីវ័ន
វត្តមានគ្រូជំនាញមកពីបរទេស អ្នកមករៀនអាចនឹងមានអារម្មណ៍ដូចកំពុងសិក្សានៅបរទេសក្រោមការទំនុកបម្រុងឱ្យសិស្សខ្មែរអាចបញ្ចេញសមត្ថភាពស្ដង់ដាអន្តរជាតិ។
ចែករំលែកពីក្ដីសុបិនរបស់ខ្លួន សូរិយា បានឱ្យដឹងថា លោកមានបំណងប្រាថ្នាច្រើន ប៉ុន្តែចំណុចដំបូងគឺចង់មានឱកាសធ្វើការក្នុងឧស្សាហកម្មផលិតនាឡិកានៅអឺរ៉ុប។
យ៉ាងណាមិញ សូរិយា បានបន្ថែមថា៖ «អ្នកត្រូវតែស្គាល់ពីខ្លួនឯងឱ្យច្បាស់ សួរថា ខ្លួនឯងស័ក្តិសមនឹងវាទេ? តើអ្នកខ្លាំងគ្រប់គ្រាន់ក្នុងការជំរុញទឹកចិត្តខ្លួនឯងឱ្យបំពេញការងារឱ្យបានល្អទេ ព្រោះវាត្រូវការការអត់ធ្មត់ខ្លាំង»។
ទីប្រឹក្សាបច្ចេកទេស ជនជាតិអូស្ត្រាលី កញ្ញា ជេស៊ីកា បានឱ្យដឹងថា សិស្សត្រៀមបញ្ចប់ការសិក្សានៅខែកក្កដា ឆ្នាំនេះ មានផែនការជាច្រើនសម្រាប់អនាគត។ មជ្ឈមណ្ឌលបណ្ដុះបណ្ដាលនេះបានមើលឃើញពីឱកាសជាច្រើននៅប្រទេសកម្ពុជា និងទូទាំងបណ្តាញអាស៊ាន។
ខណៈនិស្សិតទាំងអស់កាន់តែកៀកក្ដីសុបិនជាអ្នកមានសមត្ថភាពជួសជុល និងផលិតនាឡិកាប្រណីត កាលពីថ្មីៗនេះ ប្រធានសម្ព័ន្ធក្រុមហ៊ុនព្រីនស៍ ហូលឌីង គ្រុប លោក ចេន ហ្ស៊ី ដែលជាអ្នកស្រឡាញ់នាឡិកា និងមានចំណេះដឹងជ្រៅជ្រះពីវិស័យដ៏ប្រណីតនេះ បានចុះមកសួរសុខទុក្ខសិស្សនៃមជ្ឈមណ្ឌលបណ្តុះបណ្តាលវិជ្ជាជីវៈនាឡិកាព្រីនស៍។
លោក ចេន ហ្ស៊ី ចុះសួរសុខទុក្ខសិស្សកំពុងរៀនផ្នែកនាឡិកា។ រូបថត សហការី
លោកបានយកចិត្តទុកដាក់យ៉ាងខ្លាំងចំពោះវិទ្យាស្ថាននេះ ដែលមានការគាំទ្រតាមរយៈជំនួយសប្បុរសធម៌នៃមូលនិធិ ព្រីនស៍ (Prince Foundation) ដែលជាផ្នែកមូលនិធិសប្បុរសធម៌របស់សម្ព័ន្ធក្រុមហ៊ុន។
លោក ហ្ស៊ី បានលើកឡើងថា៖ «មជ្ឈមណ្ឌលនេះបង្កើតបានជាគន្លឹះដ៏សំខាន់នៃកិច្ចខិតខំប្រឹងប្រែងដ៏ទូលំទូលាយរបស់គ្រុបក្នុងការលើកកម្ពស់វិស័យអប់រំនៅទូទាំងប្រទេសកម្ពុជា តាមរយៈកម្មវិធីអាហារូបករណ៍ ការបណ្តុះបណ្តាលភាពជាអ្នកដឹកនាំ និងគំនិតផ្តួចផ្តើមផ្សេងៗ នៃការទទួលខុសត្រូវសង្គមរបស់ក្រុមហ៊ុន»។
លោកនិយាយថា៖ «កាលពី ៣ ឆ្នាំមុន នេះគ្រាន់តែជាចក្ខុវិស័យប៉ុណ្ណោះ។ ខ្ញុំមានចំណាប់អារម្មណ៍យ៉ាងខ្លាំងចំពោះវឌ្ឍនភាព ដែលបានកើតឡើងចាប់តាំងពីពេលដែលយើងបានបង្កើតសាលានេះមក នៅមុនពេលជំងឺរាតត្បាតបានចាប់ផ្តើម ហើយខ្ញុំទន្ទឹងរង់ចាំការកកើតនៃអ្នកផលិតនាឡិកាដំបូងគេបង្អស់របស់ប្រទេសកម្ពុជា ដែលបានទទួលការបណ្តុះបណ្តាលតាមស្តង់ដាប្រទេសស្វ៊ីស»។
ការបណ្ដុះបណ្ដាលផលិតនាឡិកានៅមជ្ឈមណ្ឌល ១ ដែលមានបំពាក់នូវឧបករណ៍លំដាប់ខ្ពស់បំផុត រួមទាំងអ្នកជំនាញលំដាប់អន្តរជាតិផងនោះ លោក ចេន ហ្ស៊ី សង្ឃឹមថា ចំណង់ចំណូលចិត្តរបស់អ្នកផលិតនាឡិកានាពេលអនាគតទាំងនេះអាចក្លាយជាការបំផុសគំនិតសម្រាប់សិប្បកម្មផលិតនាឡិកាលំដាប់ខ្ពស់នៅទូទាំងប្រទេសកម្ពុជា។
កញ្ញា ជេស៊ីកា ទីប្រឹក្សាបច្ចេកទេស និងគ្រូបង្រៀននៅមជ្ឈមណ្ឌល។ ហេង ជីវ័ន
លោក Sack-Man Loui នាយកផ្នែកប្រតិបត្តិនៃសាលាផលិតនាឡិកា ព្រីនស៍ បញ្ជាក់ថា សាលាបាននាំមកនូវគ្រឿងបរិក្ខារលំដាប់ពិភពលោក មានភាពប្រកួតប្រជែងនឹងកន្លែងផ្សេងៗក្នុងប្រទេសស្វ៊ីស ហើយវាមានតែ ១ គត់សម្រាប់ប្រទេសកម្ពុជា។
លោកបានបន្តថា៖ «ក្នុងនាមយើងជាគ្រូបង្ហាត់ យើងចង់លើកកម្ពស់នូវវប្បធម៌សិល្បៈហត្ថកម្មរបស់វិចិត្រករបន្ថែមទៀតរួមទាំងមិនចាំបាច់ចំណាយអ្វីទាំងអស់ ដើម្បីធានាបានថា សិស្សកម្ពុជារបស់យើងទទួលបានការបណ្តុះបណ្តាលដ៏ល្អបំផុត»។
សម្រាប់ព័ត៌មានបន្ថែមមាននៅទំព័រហ្វេសប៊ុក@princehorology៕
