ក្រុងសាក្រែប: ជាមួយសំបុត្រចូល ដែលអាចមូល និងជក់បាន សារមន្ទីរកញ្ឆាថ្មីរបស់ប្រទេសក្រូអាស៊ី ផ្ដល់នូវការណែនាំនូវបទពិសោធសិក្សាស្វែងយល់ពីកញ្ឆាតាមរយៈប្រវត្ដិសាស្ដ្ររុក្ខជាតិស្រវឹង ដែលបន្ធូរអារម្មណ៍ទៅតាមសំឡេងតន្ដ្រី និងខ្សែភាពយន្ដ។
ម្ចាស់សារមន្ទីរលោក Tvrtko Kracun បានប្រាប់ទីភ្នាក់ងារ AFP ថា៖ «រុក្ខជាតិនេះជាកាដូក្នុងប្រវត្ដិសាស្ដ្រដែលពាក់ព័ន្ធនឹងមនុស្សជាតិស្ទើរតែគ្រប់សម័យកាល និងរួមទាំងសាវតារបង្កើតសារមន្ទីរនេះដែរ»។
នៅសារមន្ទីរកញ្ឆា អ្នកចូលទស្សនាត្រូវបានណែនាំឱ្យដឹងប្រវត្ដិរុក្ខជាតិជាច្រើនពាន់ឆ្នាំតាមរយៈវីដេអូ រូបបដា និងពិព័រណ៍ផ្សេងៗ បន្ថែមពីលើការ-ដាក់តាំងរុក្ខជាតិរស់រវើក។
យោងតាមការស្រាវជ្រាវ កញ្ឆាត្រូវបានជឿថា ត្រូវបានប្រមូលផលដំបូងនៅអាស៊ីកណ្ដាល ប្រមាណ ១ ម៉ឺនឆ្នាំមុន ហើយរយៈពេលជាច្រើនសតវត្សរ៍ រុក្ខជាតិនេះបានក្លាយជាផលិតផលមូលដ្ឋាននៃវប្បធម៌ និងសេដ្ឋកិច្ចទូទាំងសកលលោក។
យោងតាមសារមន្ទីរ បានបង្ហាញថា រុក្ខជាតិត្រូវបានប្រើប្រាស់រាប់ពាន់មុខ រួមទាំង ការផលិតប្រេង ម្សៅ គ្រឿងសម្អាង ចំណីអាហារ វាយនភណ្ឌ ខ្សែ និងសម្ភារសំណង់។
សារមន្ទីរក៏ផ្ដោតលើការប្រើប្រាស់បែបសប្បាយ អមដោយការព្រមានលាយលក្ខណ៍អក្សរអំពីគ្រោះថ្នាក់ដល់សុខភាព ដែលអាចមកពីការប្រើប្រាស់កញ្ឆាច្រើនហួសហេតុ។
មានពិព័រណ៍បង្ហាញបំពង់បឺតកញ្ឆា ក៏ដូចជាមហោស្រពតន្ដ្រី Woodstock ដ៏ល្បីល្បាញឆ្នាំ ១៩៦៩ ដែលបង្ហាញខ្សែកញ្ឆាខ្មួលខ្មាញ់ពីអ្នកគាំទ្ររាប់ពាន់នាក់។ នៅមានតង់ ១ ទៀត ដែលបង្ហាញពីនីតិវិធីប្រមូលផលកញ្ឆា ដូចជាការប្រើចង្កៀងពិសស និងរុក្ខជាតិរស់ផងដែរ។
កញ្ឆាត្រូវបានអនុញ្ញាតឱ្យប្រើប្រាស់ស្របច្បាប់សម្រាប់តែផ្នែកវេជ្ជសាស្ដ្រក្នុងប្រទេសបាល់កង់នេះប៉ុណ្ណោះ។
លោក Igor Lokotar និស្សិតវិទ្យាសាស្ដ្រនយោបាយមកពីក្រុងសាក្រែប បាននិយាយថា លោកចាប់អារម្មណ៍នឹងសាវតារប្រវត្ដិសាស្ដ្រ រួមទាំង ការតាំងបង្ហាញ ដែលលម្អិតអំពីទាហាន ណាប៉ូឡេអុង ដែលបាននាំយកកញ្ឆាទៅកាន់បារាំងពីអេហ្ស៊ីប កាលពីដើមសតវត្សរ៍ទី១៩។
លោកបាននិយាយថា៖ «ទាំងនេះគឺជាអ្វីដែលយើងមិនបានរៀននៅសាលានោះទេ»។
ក្រៅពីការដាក់តាំង នៅសាលទទួលភ្ញៀវនៃសារមន្ទីរនេះក៏មានលក់នូវភេសជ្ជៈ ប្រេង និងថ្នាំបាញ់ផលិតពីរុក្ខជាតិនេះផងដែរ។
ម្ចាស់សារមន្ទីរបានបញ្ជាក់ថា វាជារឿងចៃដន្យសុទ្ធសាធដែលសារមន្ទីរនេះស្ថិតនៅមិនឆ្ងាយពីប៉ុស្ដិ៍នគរបាលប៉ុន្មានទេ៕ AFP/HR