.jpg)
ពលរដ្ឋមីយ៉ាន់ម៉ាមួយចំនួនធ្វើពហិការមិនទទួលទានស្រាបៀរពាក់ព័ន្ធនឹងរបបយោធា។ រូបថត AFP
ក្រុងយ៉ាំងហ្គោន: ពេលក្រុមហ៊ុនស្រាបៀរយក្សជប៉ុន Kirin បានបញ្ចប់ប្រតិបត្ដិការរបស់ខ្លួននៅប្រទេសមីយ៉ាន់ម៉ា កាលពីខែមុន ព័ត៌មាននេះអត់ប៉ះពាល់អីបន្ដិចចំពោះលោក Kyaw Gyi ក៏ដូចជាអ្នកនិយមក្រេបស្រាបៀរមីយ៉ាន់ម៉ា (Myanmar Beer) ដទៃទៀត ដែលលែងគាំទ្រផលិតផលនេះតាំងពីយូរ។
អង្គុយនៅខាងក្រៅបារ៍ ១ កន្លែងលើវិថីទី ១៩ ក្រុងយ៉ាំងហ្គោន ជាកន្លែងដ៏ពេញនិយមមួយ លោក Kyaw Gyi បាននិយាយដោយប្រើរហស្សនាមថា៖ «យើងឈប់ផឹកវាហើយ។ បើមានតែស្រាបៀរមីយ៉ាន់ម៉ានៅតាមហាង អ៊ីចឹងយើងមិនខ្ចីផឹកតែម្ដង»។
ស្ថិតលើវិថីនៃទីប្រជុំជនក្រុងយ៉ាំងហ្គោន អ្នកគ្រប់គ្រងភោជនីយដ្ឋាន Zaw Naing បាននិយាយថា ហាងរបស់លោកមិនបានលក់ស្រាបៀរកម្រិតអាល់កុល ៥ ភាគរយនោះទៀតទេ ចាប់តាំងពីខែមេសា ឆ្នាំមុន។
លោកបន្ថែមថា ស្រាបៀរមីយ៉ាន់ម៉ា មិនត្រឹមតែត្រូវបានគេលប់ចោលការកុម្ម៉ង់ទេ ថែមទាំងមានការស្នើឱ្យក្រុមហ៊ុនប្រមូលយកកៅអី តុ និងឆត្រពណ៌ក្រហម ស បៃតង និងពណ៌មាសនោះចេញថែមទៀតផង។
លោកបាននិយាយដោយស្នើប្រើត្រឹមរហស្សនាមថា៖ «បើប្រជាជនឃើញឡូហ្គោស្រាបៀរមីយ៉ាន់ម៉ាភ្ជាប់ជាមួយឈ្មោះភោជនីយដ្ឋានយើង ពួកគេនឹងមិនចូលឡើយ»។
ក្រុមហ៊ុនស្រាបៀរមីយ៉ាន់ម៉ាដំណើរការដោយ Kirin និងក្រុមហ៊ុនពហុផលិតផលរបស់យោធា Myanma Economic Holdings បានចូលរួមហ៊ុនរហូតដល់ ៨០ ភាគរយ។ នេះបើយោងតាមតួលេខដែលចុះផ្សាយដោយ Kirin ក្នុងឆ្នាំ ២០១៨។
ហាងមួយចំនួនមិនចង់ភ្ជាប់ឈ្មោះកន្លែងរបស់ខ្លួន និងរូបស្រាបៀរមីយ៉ាន់ម៉ា។ រូបថត AFP
ក្រោយជួបវិបត្ដិកូវីដ និងរដ្ឋប្រហារជាច្រើនខែក្នុងឆ្នាំ ២០២១ ចំណូលប្រតិបត្ដិបញ្ចប់ឆ្នាំគឺ ៦,៦ ពាន់លានយ៉េន (៥៤ លានដុល្លារ) បើធៀបនឹងចំណូល ១៣,៨ ពាន់លានយ៉េន។
ក្នុងខែកុម្ភៈ ក្រោយព្យាយាមរំលាយភាពជាដៃគូរបស់ខ្លួនអស់រយៈពេលជាច្រើនពីក្រុមហ៊ុនគាំទ្រដោយយោធា និងសម្ពាធពីក្រុមអង្គការសិទ្ធិមនុស្ស ក្រុមហ៊ុនយក្សជប៉ុន Kirin បានប្រកាសថា ខ្លួននឹងចាកចេញពីប្រទេសមីយ៉ាន់ម៉ា។
ពហិការ និងការចាកចេញនាពេលខាងមុខ បានទុកឱកាសឱ្យគូប្រជែង ដូចជា Heineken, Carlsberg និង Chang របស់ក្រុមហ៊ុនថៃកំពុងសម្លឹងរកបំពេញចន្លោះទីផ្សារនេះ។
តំណាងឱ្យក្រុមហ៊ុន Heineken ដែលស្នើសុំមិនបញ្ចេញឈ្មោះ បាននិយាយថា ខ្លួនឆាប់វាយតម្លៃ និងធ្វើអត្ថាធិប្បាយពេកលើទម្លាប់នៃការទទួលទានរបស់អតិថិជន។
ខណៈស្ថានភាពសន្ដិភាពនៅបន្ដនាពេលបច្ចុប្បន្ន Nyi Nyi អាយុ ២៧ ឆ្នាំ បាននិយាយថា លោកអត់មានបំណងចង់ផ្លាស់ប្ដូរចិត្តនោះទេ។
លោកនិយាយថា៖ «បើគ្មានបញ្ហាអ្វីជាមួយយោធាទេ យើងនឹងនៅតែជ្រើសរើសស្រាបៀរមីយ៉ាន់ម៉ាដូចសព្វមួយដង»៕ AFP/HR
