ភ្នំពេញ: ជាមួយស្នាមសាក់លម្អពេញដៃជើងសខ្ចី កញ្ញា គ្រីស ឌីវ៉ា ជាសិល្បការិនីដ៏លេចធ្លោ ១ រូប ដែលលេងស្ទីលកោរសក់យ៉ាងមានជំនឿចិត្ត ស្ទើរតែពុំមានតារាស្រីណាម្នាក់ធ្លាប់ធ្វើកន្លងមក។
ឆ្នាំមុនជាពេលដែល ឌីវ៉ា បានឈានជើងចូលមកក្នុងវិស័យសិល្បៈទាំងការច្រៀង សម្ដែង ឌីជេ រួមទាំងអាជីពជាអ្នកច្នៃម៉ូដ។
កញ្ញាត្រូវបានគេចាប់ផ្ដើមស្គាល់ច្រើននៅវេលាដែលរូបនាង និងដៃគូ Live វីដេអូចាក់ឌីស លើទំព័រហ្វេសប៊ុក «ALEX MATT» និងមានចំនួនអ្នកទស្សនាចេះតែកើនឡើង។
សិល្បការិនីវ័យ ២៤ ឆ្នាំ រូបនេះរំឭកពីដំណើរចូលសិល្បៈថា៖ «តាមពិតខ្ញុំប្រឡូកក្នុងវិស័យសិល្បៈយូរហើយ តែមិនទាន់ចូលស៊ប់ ទើបតែ ១ ឆ្នាំមុននេះ។ វិថីសិល្បៈជាក្ដីស្រមៃតាំងពីក្មេងមក ខ្ញុំតែងស្រឡាញ់ការទទួលបានចំណាប់អារម្មណ៍ ពីអ្នកគាំទ្រ និងស្រឡាញ់ភាពស្អាត»។
យ៉ាងណាក្ដី ជម្រើសលើវិថីតារាពុំងាយស្រួលទេសម្រាប់ ឌីវ៉ា ដែលមានសាវតាគ្រួសារជាអ្នកធ្វើការ និងអ្នកជំនួញ ពុំមានឈាមជ័រសិល្បៈដោយសូម្បីតែជីដូនជីតារបស់កញ្ញាក៏ពុំសប្បាយចិត្តនឹងជម្រើសនេះដែរ។
តែកញ្ញានៅតែទទូចថា៖ «បើគាត់ជាអ្នកស្រឡាញ់សិល្បៈ គាត់នឹងយល់នៅពេលដែលយើងកើតមកយើងស្រឡាញ់អ្វីមួយ ទោះជាមានការងារល្អជាងហ្នឹង ទោះជាមានឧបសគ្គ ឬរកបានតិចបានច្រើន យើងនៅតែចង់ធ្វើ»។
វាជារឿងរីករាយដែលកញ្ញាសម្គាល់ថា ឪពុកម្ដាយបានបន្ធូរបន្ថយ ដោយយល់ថា ក្មេងសម័យថ្មីត្រូវការស្វែងរកគោលដៅ និងចំណូលចិត្តខ្លួនឯង។
ជាកូនកណ្ដាលចំណោមបងប្អូន ៣ នាក់ កញ្ញាបន្តថា៖ «លទ្ធផលយ៉ាងណា ក៏ពួកគាត់ឱ្យសាកមើលខ្លួនឯង ដើម្បីឱ្យអស់ចិត្ត។ ទាល់តែយើងស្វែងរក បានយើងរកឃើញខ្លួនឯង»។
ឌីវ៉ា ក៏បានឱ្យដឹងថា ៣ ឆ្នាំមុន កញ្ញាមានភាគហ៊ុនពាក់កណ្ដាលជាមួយហាងច្នៃម៉ូដ ១ ប៉ុន្តែកញ្ញាបានដកខ្លួនព្រោះមិនមានពេលគ្រប់គ្រាន់។ បច្ចុប្បន្ន ឌីវ៉ា នៅតែបន្តការរចនាម៉ូដសម្រាប់ស្លៀកខ្លួនឯង ដៃគូ ក្រុម និងអ្នកសិល្បៈដែលស្គាល់គ្នាប៉ុណ្ណោះ។
ប្រឡូកក្នុងសិល្បៈ កញ្ញាបានឱ្យដឹងថា មនុស្សរបស់មហាជន ប្រាកដណាស់ចៀសមិនផុតពីទទួលបានមតិច្រើន ទាំងវិជ្ជមាន និងអវិជ្ជមាន។
តែអ្វីដែលធ្វើឱ្យ ឌីវ៉ា ធុញថប់ គឺមនុស្សជាច្រើនផ្ដោតទៅលើតែការកោរសក់របស់កញ្ញា។
កញ្ញារំឭកប្រាប់ថា៖ «កាលពីឆ្នាំមុន ដែលខ្ញុំធ្លាប់ធ្វើជាក្លិបអនឡាញ ហើយ ឡែហ្វ និយាយលេងជាមួយទស្សនិកជន។ ពេលខ្ញុំទទួលបានមតិយោបល់ដដែលៗទាក់ទងនឹងសក់របស់ខ្ញុំ ខ្ញុំមានអារម្មណ៍ធុញថប់ ខ្ញុំហត់នឿយនឹងពន្យល់»។
កញ្ញា ឌីវ៉ា បានបន្តថា៖ «តែខ្ញុំដឹងថានេះ ជារឿងធម្មតា។ បើយើងស្រឡាញ់វិស័យនេះ យើងត្រូវទទួលយកឱ្យបាន។ ដូចបងៗសិល្បករផ្សេងទៀត កាន់តែល្បី អ្នកស្រឡាញ់ក៏ច្រើន អ្នកស្អប់ក៏ច្រើន។ ដូចគេនិយាយអ៊ីចឹង សំពៅកាន់តែធំ ក្ដោងកាន់តែធំ។ តែបើមតិដែលរិះគន់ក្នុងន័យឱ្យយើងកែប្រែ យើងក៏ត្រូវយកមកគិតឡើងវិញដូចគ្នា»។
អ្នកខ្លះគិតថា ឌីវ៉ា ទំនងជាកើតមហារីក តែមូលហេតុពិតគឺជម្រើសនៃការកោរសក់ក៏កើតចេញពីអារម្មណ៍ស្ត្រេសខ្លាំងអំឡុងពេលកូវីដ ដែលនាំឱ្យសក់ចាប់ផ្ដើមជ្រុះ ហើយកញ្ញាក៏សម្រេចចិត្តកោរ ស្របនឹងចំណូលចិត្តស្រឡាញ់ម៉ូដសក់បែបនេះតែម្ដង។
លើសពីទស្សនៈលេងម៉ូដសក់កោរ កញ្ញា ឌីវ៉ា បានពន្យល់ថា៖ «តែចំណុចសំខាន់ ខ្ញុំគិតថា គ្រប់គ្នាគិតថាសក់ជាចំណុចដែលស្អាតបំផុតរបស់ស្ត្រី ប៉ុន្តែខ្ញុំចង់បញ្ជាក់ថា មនុស្សស្រីគ្រប់គ្នា មិនមែនស្អាតដោយសារសក់ទេ គឺជាគ្រប់យ៉ាងនៃមនុស្សស្រី។ ជាក់ស្ដែងខ្ញុំមិនមានសក់ ប៉ុន្តែខ្ញុំអាចបញ្ចេញភាពលេចធ្លោផ្សេងៗ តាមរយៈការសម្ដែង ការតែងខ្លួន អាកប្បកិរិយា និងឥរិយាបថរបស់ខ្ញុំ សំខាន់ការស្គាល់ពីខ្លួនឯងច្បាស់»។
ការកោរសក់នេះក៏បង្កើតចម្ងល់ និងភាពចម្លែកចិត្តដល់គ្រួសាររបស់ ឌីវ៉ា ប៉ុន្តែវាទាមទារពេលវេលាដែលធ្វើឱ្យពួកគាត់ទទួលយក និងមើលឃើញថាការសក់បែបនេះទៅក៏សមនឹងទម្រង់មុខកញ្ញាម្យ៉ាងដែរ។
អ្វីដែលកញ្ញា ឌីវ៉ា ត្រូវគិតគូរនោះគឺ៖ «ការធ្វើសក់បែបនេះ បើយើងរើសខោអាវពាក់មិនស្រួល ឃើញយើងចាស់ ខោអាវ ឃ្យូតពេកក៏មិនសូវសម ដូច្នេះ ខ្ញុំត្រូវប្រយ័ត្ន ចេះរើសស្ទីលឱ្យសមនឹងខ្លួន នឹងសក់»។
រឿងរីករាយដែលផុសពីក្ដីសុបិននៃវិស័យសិល្បៈ គឺទី១ កញ្ញាអាចធ្វើឱ្យទស្សនិកជន អ្នកដែលតាមដានកញ្ញាសប្បាយចិត្ត។ ទី២ ការបង្ហោះរៀបរាប់ពីបទពិសោធអ្វី ១ អាចលើកទឹកចិត្តដល់អ្នកគាំទ្រ ព្រោះកញ្ញាចង់ធ្វើជាកម្លាំងជំរុញចិត្តដល់អ្នកដែលត្រូវការ។ ជាចុងក្រោយគឺកញ្ញាអាចជួបរៀមច្បងក្នុងរង្វង់សិល្បៈ ដែលខ្លួនធ្លាប់គាំទ្រតាំងពីក្មេងៗ និងបច្ចុប្បន្នជាអ្នកផ្ដល់កម្លាំងចិត្តដល់ខ្លួន ដូចជា ទេព បូព្រឹក្ស និងសួស វីហ្សា ជាដើម។
ជាមួយគម្រោងថ្ងៃអនាគតដែល ឌីវ៉ា ចង់ធ្វើចម្រៀង ធ្វើភ្លេង និពន្ធចម្រៀង ជារសនិយមបែបថ្មីនៅក្នុងកម្ពុជា កញ្ញាក៏បានផ្ដាំផ្ញើថា៖ «បងប្អូនទាំងអស់គ្នាបើសិនជាមានក្ដីស្រមៃពីអីមួយ យើងកុំបោះបង់វាចោល ត្រូវព្យាយាមដើរទៅរកក្ដីស្រមៃ ១ ហ្នឹង។ បើសិនជាមិនដឹងថា ខ្លួនឯងជានរណា វង្វេងក៏មិនត្រូវបាក់ទឹកចិត្តដែរ ហើយភាពវិជ្ជមានគឺត្រូវតែមាននៅក្នុងខ្លួន។ ចំណុចទាំងនេះហើយដែលនាំយើងទៅដល់គោលដៅ ដែលយើងចង់ទៅ»។
ទំព័រហ្វេសប៊ុករបស់កញ្ញាឈ្មោះ គ្រីស ឌីវ៉ា - Christ Diva និងអ៊ីនស្តាក្រាម divachrist_98s៕