ក្រុងសាន់ហ្វ្រាន់ស៊ីស្កូ: ក្រុមហ៊ុនផលិតវីដេអូហ្គេម Epic Games បានឱ្យដឹងកាលពីថ្ងៃចន្ទថា ទឹកប្រាក់ ១៤៤ លានដុល្លារ ដែលទទួលបានពីហ្គេមប្រយុទ្ធគ្នា «Fortnite» ដ៏ពេញនិយមនឹងប្រើសម្រាប់ជួយពលរដ្ឋរងគ្រោះពីសង្គ្រាមនៅអ៊ុយក្រែន។
ប្រធាន Xbox លោក Phil Spencer ឆ្លើយតបលើ Twitter ទៅនឹងសេចក្ដីប្រកាសរបស់ Epic អំពីការបរិច្ចាគនេះថា៖ «ពិតជាអស្ចារ្យណាស់ ដែលបានឃើញសហគមន៍ហ្គេមមានឥទ្ធិពលលើសពីការលេងហ្គេម»។
ហ្គេមបាញ់បោះ Fortnite បានពង្រីកអ្នកលេងជាង ៣៥០ លាននាក់ទូទាំងពិភពលោក ដោយទើបតែបញ្ចេញហ្គេមរដូវកាលថ្មីចុងខែមីនា។
ហ្គេមនេះត្រូវបានដាក់ឱ្យដោនឡូត និងលេងដោយឥតគិតថ្លៃ ដែលក្រុមហ៊ុនរកចំណូលពីការជួញដូរតាមជម្រើសដូចជា សម្លៀកបំពាក់ឌីជីថលសម្រាប់តួអង្គ ចលនារាំសម្រាប់អវតារ និងយុទ្ធនាការប្រកួតប្រជែង។
លោក Spencer បានអរគុណដល់ Epic សម្រាប់ការរៀបចំកិច្ចខិតខំប្រឹងប្រែងរៃអង្គាសប្រាក់នេះ។
យោងតាម Epic បានបង្ហាញថា ប្រាក់ដែលរៃអង្គាស ត្រូវបានផ្ដល់ជាជំនួយដល់ក្រុមអង្គការនានា រួមទាំង UNICEF ទីភ្នាក់ងារជនភៀសខ្លួន និងកម្មវិធីស្បៀងអាហារពិភពលោកនៃអង្គការសហប្រជាជាតិផងដែរ។
មនុស្សរាប់ពាន់នាក់បានស្លាប់ និងជនភៀសខ្លួនអ៊ុយក្រែនជាង ៤,២ លាននាក់ បានរត់ចេញពីប្រទេសតាំងពីការលុកលុយរបស់រុស្ស៊ីក្នុងខែកុម្ភៈ។
ក្រុមហ៊ុន និងអ្នកផលិតវីដេអូហ្គេមក្នុងទីក្រុងផ្សារនានា បានរៃអង្គាសប្រាក់ ដើម្បីលើកស្ទួយកិច្ចការមនុស្សធម៌នៅតំបន់អឺរ៉ុបខាងកើត។
ផលិតករហ្គេម «League of Legends» ឈ្មោះ Riot Games បានប្រកាសថ្មីៗនេះថា ខ្លួនបានរៃអង្គាសប្រាក់ ៥,៤ លានដុល្លារ សម្រាប់កិច្ចការមនុស្សធម៌នេះ៕ AFP/HR