ក្រុងឡុងដ៍: ចក្រភពអង់គ្លេស កាលពីថ្ងៃអង្គារ បានឱ្យដឹងថា ខ្លួននឹងហាមបុគ្គលល្បីឈ្មោះ រួមទាំងតារាបាល់ទាត់ តារាទូរទស្សន៍ និងអ្នកមានឥទ្ធិពលលើបណ្ដាញសង្គម ពីការផ្សព្វផ្សាយល្បែងស៊ីសង ដើម្បីការពារយុវវ័យ និងជនងាយរងគ្រោះ។
គណៈកម្មាធិការអនុវត្ដការផ្សព្វផ្សាយពាណិជ្ជកម្ម (CAP) បានឱ្យដឹងថា ការរឹតបន្ដឹងថ្មីនេះត្រូវបានធ្វើឡើងទៅលើឥស្សរជនល្បីៗចាប់ពីថ្ងៃទី ១ ខែតុលា ខាងមុខ ដោយសារពួកគេមានឥទ្ធិពលខ្លាំងលើបណ្ដាញសង្គម។
វិធានការនេះ ត្រូវបានធ្វើឡើងនៅពេលក្រុមភ្នាល់ល្បែងលើអនឡាញ ដែលបានកើនឡើងជាគំហុកអំឡុងពេលបិទខ្ទប់។
គណៈកម្មាធិការបានឱ្យដឹងក្នុងសេចក្ដីថ្លែងការណ៍ថា កីឡាករល្បីៗ និងអ្នកមានឥទ្ធិពលលើបណ្ដាញសង្គម ដែលទំនងជាពេញនិយមសម្រាប់កុមារ ឬយុវវ័យ នឹងត្រូវបានហាមឃាត់ពីការផ្សព្វផ្សាយពាណិជ្ជកម្មល្បែង និងឆ្នោត។
បម្រាមនេះក៏ធ្វើឡើងចំពោះតារាបាល់ទាត់ល្បីៗ និងតារាទូរទស្សន៍។
នាយក CAP លោក Shahriar Coupal បាននិយាយថា៖ «នៅថ្ងៃដែលការផ្សព្វផ្សាយពាណិជ្ជកម្មល្បែងស៊ីសងជាមួយរូបភាពតារាបាល់ទាត់ រូបភាពវីដេអូហ្គេម និងមាតិកាផ្សេងៗដែលផ្សាយទៅដល់ក្មេងៗអាយុ ១៨ ឆ្នាំនឹងត្រូវបញ្ចប់»។
វិធានការជាហូរហែត្រូវបានដាក់ឡើងក្នុងរយៈពេលប៉ុន្មានឆ្នាំចុងក្រោយ ដើម្បីដោះស្រាយបញ្ហាញៀនល្បែងនៅចក្រភពអង់គ្លេស ចាប់ពីការហាមការប្រើប្រាស់កាតឥណទានក្នុងការភ្នាល់រហូតដល់បញ្ជូនសារព្រមានចំពោះការផ្សព្វផ្សាយពាណិជ្ជកម្មលើកញ្ចក់ទូរទស្សន៍ និងកំហិតប្រាក់ភ្នាល់លើហ្គេមម៉ាស៊ីន។
អាយុអាចភ្នាល់ល្បែងសម្រាប់ឆ្នោតជាតិក៏ត្រូវបានដំឡើងពី ១៦ ដល់ ១៨ ឆ្នាំផងដែរ៕ AFP/HR