.jpg)
សារមន្ទីរសម្បូរប្លង់ថតសែលហ្វ៊ីត្រូវចិត្តអ្នកសកម្មនឹងបណ្ដាញសង្គម។ រូបថត AFP
ក្រុងស្ដុកខុល: សារមន្ទីរសែលហ្វ៊ីថ្មី ១ ក្នុងប្រទេសស៊ុយអែត ផ្លាស់ប្ដូរតួនាទី ដោយប្រែក្លាយភ្ញៀវចូលមកទស្សនា ចូលរួមឱ្យធ្វើផ្នែកនៃស្នាដៃសិល្បៈ និងជាអ្នកតាំងពិព័រណ៍។
«សារមន្ទីររបស់អ្នក» ក្នុងក្រុងស្ដុកខុល គ្មានស្នាដៃសិល្បៈនៅលើជញ្ជាំងនោះទេ។ ផ្ទុយពីការតុបតែងបន្ទប់ជាមួយភ្លើងពណ៌ វាជាទីកន្លែងផ្ដល់ការសប្បាយសម្រាប់ការថតសែលហ្វ៊ី និងវីដេអូរបស់ភ្ញៀវ។
សូហ្វីយ៉ា ម៉ាគីនៀមី ជាអ្នកគ្រប់គ្រង បានប្រាប់ AFP ខណៈអ្នកស្រីបានបង្ហាញ «បន្ទប់អេម៉ូជី» ផ្ទុកទៅដោយបាល់ពណ៌ខៀវ និងលឿងជាមួយមុខញញឹម និងចងចិញ្ចើមថា៖ «លោកអ្នកអាចថតរូបស្អាតៗ និងបង្កើតមាតិកាថ្មីៗនៅលើ Instagram ហើយគឺជាទីកន្លែងដ៏ល្អឥតខ្ចោះសម្រាប់អ្នក TikTok និយមដែរ»។
បន្ទប់ផ្សេងៗទៀតត្រូវបានរចនាឡើងសម្រាប់ឱ្យភ្ញៀវកប់ខ្លួនក្នុងពំនូកដូចស្ករគ្រាប់ធ្វើពីស្នោរ កាច់រាងក្រោមអំពូលភ្លើងណេអ៊ុងចម្រុះពណ៌ ឬអង្គុយលើទោងយក្សពណ៌សម្រាប់ការថតរូបប្រូហ្វាលថ្មីៗ។
ហ្សេណេប អេល់ម៉ានី អាយុ ១៨ ឆ្នាំ ដែលមកលេងសារមន្ទីរជាមួយមិត្ដភក្ដិបាននិយាយថា៖ «យើងមានភ្លើងពណ៌ បទពី TikTok ចំណីចំណុក និងអ្វីៗគ្រប់យ៉ាងដែលយើងចូលចិត្ដ»។
បន្ទប់អុីម៉ូជីមានបាល់ពណ៌ស្រស់ឆើត និងរូបបង្ហាញទឹកមុខខុសៗគ្នា។ រូបថត AFP
គំនិតផ្ដួចផ្ដើមធ្វើសារមន្ទីរសែលហ្វ៊ី ចេញពីប្រទេសហូឡង់ ជាទីដែលេមានសារមន្ទីរបែបនេះចំនួន ២ រួចហើយ។ ខណៈបណ្ដាញសង្គមគឺជាអ្វីៗគ្រប់យ៉ាងនៃមនុស្សសម័យថ្មី ក្ដីកង្វល់កាន់តែរីកធំឡើងចំពោះបញ្ហាគ្រោះថ្នាក់ ជាពិសេសផលប៉ះពាល់លើសុខភាពផ្លូវចិត្ដរបស់ក្មេងៗ ជាក់ស្ដែងគឺក្មេងស្រីតែម្ដង។
យុវតីដែលមកទស្សនាសារមន្ទីរពេលភ្នាក់ងារ AFP ស្ថិតនៅទីនោះ មិនសូវខ្វល់ខ្វាយអំពីផលអវិជ្ជមាន ឬបញ្ហាឈ្លក់វង្វេងនឹងខ្លួនឯងខ្លាំងទេ។
យុវតី ឆាយម៉ែ អូអាឈី អាយុ ១៨ ឆ្នាំ បាននិយាយថា៖ «ខ្ញុំគិតថា កន្លែងនេះពិតជាឃ្យូតសម្រាប់អ្នកចូលចិត្ដថតរូបសែលហ្វ៊ីដូចជា មិត្ដភក្ដិខ្ញុំ»។
សូម្បីសាស្ដ្រាចារ្យ ប៊ីល ប៊ឺកវីនខល អាយុ ៧០ ឆ្នាំ ដែលទស្សនាជាមួយក្មេងវ័យជំទង់ ក៏លោកទទួលស្គាល់៖ «វាជាទំនោរពិភពលោកទៅហើយ។ សារមន្ទីរប្លែកៗគឺដើម្បីទាក់ទាញអតិថិជនរៀងៗខ្លួន»៕ AFP/HR
ក្មេងស្រីនៅបន្ទប់បំភ្លឺដោយភ្លើងពណ៌គ្រប់ជ្រុងស័ក្ដិសមនឹងការថតសែលហ្វីស្អាតៗនៅសារមន្ទីរ Youseum។ រូបថត AFP
