ភ្នំពេញ៖ បន្ទាប់ពីបានធូរស្បើយពីជំងឺ និងទទួលបាននូវគោរមងារជាកិត្តិយសនៃរាជបណ្ឌិត្យសភាកម្ពុជាគឺជាគោរមងារថា «កិត្តិឧទ្ទេសបណ្ឌិត» កាលពីថ្ងៃទី៩ ខែមេសា ឆ្នាំ២០២២ នោះ ស្រាប់តែគេឃើញវីរសិល្បករចម្រៀងអាយ៉ៃលោក ព្រហ្ម ម៉ាញ ចេញដំណើរហោះហើរទៅកាន់ដីសហរដ្ឋអាមេរិក មុនប្រារព្ធពិធីបុណ្យចូលឆ្នាំថ្មីឆ្នាំ២០២២ នេះ ១ថ្ងៃ។
នេះបើយោងតាមការបញ្ជាក់ពីតារាសម្តែង តារាចម្រៀង និងពិធីករ នាយព្រែក ជាកូនប្រុសតារាកំប្លែង និងចម្រៀងអាយ៉ៃស្រីយាយ យ៉យ បានបង្ហើបឱ្យដឹងពីការត្រៀមដំណើរចេញពីមាតុប្រទេសទៅកាន់ទឹកដីសម្បូរដុល្លារសហរដ្ឋអាមេរិក នាល្ងាចថ្ងៃទី១២ ខែមេសា ឆ្នាំ២០២២នេះ។
នាយ ព្រែក បានបង្ហោះរូប អមនឹងសារជូនដំណើរលោក ព្រហ្ម ម៉ាញ ថា៖ «ពេលនេះ អ៊ំ ព្រហ្ម ម៉ាញ និងភរិយា កំពុងរៀបចំធ្វើដំណើរ ទៅសហរដ្ឋអាមេរិក ជូនពរអ៊ំទាំង២ សុវត្ថិភាពតាមផ្លូវ»។
គួរបញ្ជាក់ដែរថា លោក ព្រហ្ម ម៉ាញ គឺជាវីរសិល្បករផ្នែកចម្រៀងអាយ៉ៃដ៏ប៉ិនប្រសប់ ដែលពូកែក្នុងការប្រើប្រាស់នូវសំនួនវោហារស័ព្ទ ឃ្លោងឃ្លានៃពាក្យពេចន៍ខ្មែរដ៏ពីរោះរណ្តំ និងបែបបង្កប់ន័យមានកិត្តិស័ព្ទល្បីល្បាញជាច្រើនទសវត្សរ៍។
លោក ព្រហ្ម ម៉ាញ តារាចម្រៀងប្រពៃណីក្នុងមង្គលការ និងចម្រៀងអាយ៉ៃ បច្ចុប្បន្នមានវ័យ ៧២ឆ្នាំ ហើយក៏ធ្លាប់ទទួលងារ «វីរសិល្បករ» ផ្នែកអាយ៉ៃ កាលពីឆ្នាំ២០០៨ ម្តង ហើយលោកក៏ត្រូវបានស្រទាប់មហាជនទូទៅ បានទទួលស្គាល់ថា គឺជាដៃគូចម្រៀងអាយ៉ៃដ៏ស័ក្តិសមជាមួយនឹងអ្នកស្រី នួន សារី ហៅ យាយ យ៉យ។
លោក ព្រហ្ម ម៉ាញ មានបញ្ហាសុខភាព ដោយមានជំងឺលើសឈាមរហូតដល់សន្លប់ត្រូវសង្គ្រោះបន្ទាន់ និងត្រូវបានក្រុមគ្រួសារបញ្ជូនទៅមន្ទីរពេទ្យ កាលពីថ្ងៃទី២០ ខែមីនា ឆ្នាំ២០២២ ហើយគ្រាន់តែទទួលបានដំណឹងថា លោក ព្រហ្ម ម៉ាញ មានបញ្ហាសុខភាពរហូតបញ្ជូនទៅមន្ទីរពេទ្យសង្គ្រោះបន្ទាន់នោះ ដោយសេចក្តី
អាណិតអាសូរ និងភាពឈឺឆ្អាល ជួយដោះទុក្ខធុរៈដល់សិល្បករចម្រៀងអាយ៉ៃជើងចាស់ ស្ត្រីទី១កម្ពុជាលោកស្រី ប៊ុន រ៉ានី បានឧបត្ថម្ភប្រាក់ចំនួន ៥ ០០០ដុល្លារ ដើម្បីសម្រួលថ្លៃព្យាបាលជំងឺភ្លាមៗផងដែរ កាលពីពីថ្ងៃទី២១ ខែមីនា ឆ្នាំ២០២២។
វីរសិល្បករចម្រៀងអាយ៉ៃជើងចាស់លោក ព្រហ្ម ម៉ាញ ទទួលបានគោរមងារកិត្តិយស នៃរាជបណ្ឌិត្យសភាកម្ពុជា គឺជាគោរមងារថា «កិត្តិឧទ្ទេសបណ្ឌិត» កាលពីថ្ងៃទី៩ ខែមេសា ឆ្នាំ២០២២ដោយមានការត្រាស់បង្គាប់ព្រះមហាក្សត្រខ្មែរព្រះករុណាព្រះបាទសម្តេចព្រះបរមនាថ នរោត្តម សីហមុនី និងមានការចុះហត្ថលេខាជួសពីប្រមុខរដ្ឋស្តីទីលោក សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា ដែលចេញប្រកាសកាលពីថ្ងៃទី៩ ខែមេសា ឆ្នាំ២០២២ កន្លងមកនេះ។
សម្រាប់វិស័យសិល្បៈអាយ៉ៃនេះ កាលពីចុងឆ្នាំ២០១៩ ដោយសារក្តីព្រួយបារម្ភខ្លាចបាត់បង់ ព្រោះគ្មានធនធានជំនាន់ក្រោយ និងចង់ឱ្យកូនខ្មែរ ជួយថែរក្សា ឬអភិរក្សនូវទម្រង់សិល្បៈចម្រៀងពីបរមបុរាណមក ទើបជំរុញឱ្យវីរសិល្បករផ្នែកចម្រៀងអាយ៉ៃលោក ព្រហ្ម ម៉ាញ ធ្លាប់បានបើកបង្រៀនឥតគិតថ្លៃដល់កូនខ្មែរ ជំនាញចម្រៀងអាយ៉ៃ នៅផ្ទះរបស់លោកផ្ទាល់ ដែលមានទីតាំងនៅក្នុងបុរី KC ជិតវត្តតាំងកសាង ផ្ទះលេខ L14 សង្កាត់កាកាប ២ ក្នុងខណ្ឌពោធិ៍សែនជ័យ រាជធានីភ្នំពេញ៕