ភ្នំពេញ៖ កាលពីពេលថ្មីៗនេះ ក្រុមព្រះសុរិយា ដែលជាក្រុមយុវជនស្រាវជ្រាវចម្រៀង និងភាពយន្តមុនឆ្នាំ ១៩៧៥ បានប្រកាសរកឃើញសកម្មភាពកំពូលតារាចម្រៀង ដែលត្រូវបានប្រសិទ្ធនាមជាអធិរាជសំឡេងមាស ស៊ីន ស៊ីសាមុត ច្រៀងផ្ទាល់ក្នុងព្រះពិធីអភិសេកអ្នកអង្គម្ចាស់១អង្គ កាលពីទសវត្សរ៍ឆ្នាំ ១៩៦០។
យោងតាមការប្រកាសនោះ បានឱ្យដឹងថា៖ «ក្រុមព្រះសុរិយា បានរកឃើញឯកសារមាសដ៏មានតម្លៃកាត់ថ្លៃពុំបាន ១ ទៀតគឺសកម្មភាពឈរច្រៀងផ្ទាល់របស់អធិរាជសំឡេងមាស ស៊ីន ស៊ីសាមុត ក្នុងព្រះរាជពិធីមង្គលការព្រះអង្គម្ចាស់ក្សត្រី ស៊ីសុវត្ថិ អូឡារី ព្រះបុត្រីរបស់អ្នកអង្គម្ចាស់ ស៊ីសុវត្ថិ សិរិមតៈ និងលោកឧត្តមមន្រ្តី គី សុទ្ធ នាព្រះដំណាក់ក្នុងរាជធានីភ្នំពេញ កាលពីឆ្នាំ ១៩៦២»។
ប្រភពដដែលបានរៀបរាប់អំពីទិដ្ឋភាពអធិរាជសំឡេងមាសច្រៀងក្នុងកម្មវិធីដ៏វិសេសនោះថា៖ «លោក ស៊ីន ស៊ីសាមុត ជាមួយអ្នកចម្រៀងស្រី ១ ទៀត ឈរច្រៀងយ៉ាងសង្ហានៅខាងមុខក្រុមតន្រ្តីដែលកំពុងប្រគំកំដរភ្ញៀវកិត្តិយសទាំងអស់សោយ និងទទួលទានភោជនាហារ។ បន្ថែមពីនេះ យើងក៏បានឃើញលោក ស៊ីន ស៊ីសាមុត អង្គុយគោះចង្ក្រង់ក្នុងក្រុមតន្រ្តីករ តាមចង្វាក់ភ្លេងទៀតផង»។
កាលពីថ្ងៃទី ១១ ខែមេសា កន្លងទៅនេះ មជ្ឈមណ្ឌលធនធានសោតទស្សន៍ បុប្ផាណា ក៏បានបង្ហាញនូវរូបភាពដកស្រង់ចេញពីខ្សែភាពយន្ដឯកសារស្ដីពីព្រះរាជពិធីអភិសេករបស់អ្នកអង្គម្ចាស់ ស៊ីសុវត្ថិ អូឡារី ដែលត្រូវបានចាត់ទុកជាឯកសារដ៏កម្រមួយ ស្ថិតក្នុងគុណភាពពណ៌ធម្មជាតិ ភ្លឺច្បាស់។
មជ្ឈមណ្ឌលធនធានសោតទស្សន៍ បុប្ផាណា បានឱ្យដឹងថា៖ «នៅក្នុងថ្ងៃដ៏នក្ខត្តឫក្ស នៃពិធីរៀបអភិសេករបស់អ្នកអង្គម្ចាស់ស៊ីសុវត្ថិ អូឡារី មានការអញ្ជើញចូលរួមយ៉ាងច្រើនពីព្រះរាជវង្សានុវង្ស មន្ដ្រីរដ្ឋាភិបាលនៃសម័យសង្គមរាស្ដ្រនិយម អ្នកតំណាងរាស្ដ្រ និងសិល្បករជាច្រើននាក់ទៀត»។
ជាទស្សនីយភាពដ៏កម្រ ដោយសារតែ ក្រុមព្រះសុរិយា បានឱ្យដឹងថា លោកស៊ីន ស៊ីសាមុត កម្របង្ហាញវត្ដមានតាមពិធីមង្គលការណាស់ សូម្បីតែក្នុងពិធីសមាជជាតិដ៏កម្រ ក៏មិនមានវត្ដមានរបស់លោកដែរ។
ការរក្សាទុកឯកសារនៃព្រះរាជពិធីរៀបអភិសេកបានស្ថិតស្ថេរ ត្រូវបានក្រុមព្រះសុរិយា អះអាងថា ដោយសារតែអ្នកអង្គម្ចាស់ ស៊ីសុវត្ថិ អូឡារី យាងតាមព្រះស្វាមីទៅបំពេញបេសកកម្មការងារនៅក្រៅប្រទេស ព្រះអង្គបាននាំយកហ្វីលឯកសារទៅជាមួយ និងបានរក្សាទុកយ៉ាងល្អផងដែរ។
ក្រៅពីដុំហ្វីល ក្រុមយុវជនទាំងនេះ ក៏បានប្រកាសស្រាវជ្រាវស្វែងរកអ្នកអង្គម្ចាស់ ដែលបានឮដំណឹងថា ទ្រង់នៅគង់ព្រះជន្មនៅឡើយ នៅលើទឹកដីសហរដ្ឋអាមេរិក។ មិនយូរប៉ុន្មាន ក្រុមព្រះសុរិយា ក៏បានចូលថ្វាយព្រះបង្គំគាល់ទ្រង់ដូចបំណង។
ប្រភពនេះ បានបន្ដថា៖ «ក្នុងជំនួបដ៏រំភើប និងប្រកបដោយព្រះហឫទ័យរីករាយនោះ ព្រះអង្គម្ចាស់ក្សត្រីដែលសព្វថ្ងៃព្រះអង្គមានព្រះជន្ម ៧៩ ព្រះវស្សា មានបន្ទូលយ៉ាងកក់ក្តៅ និងប្រកបដោយព្រះសញ្ចេតនារំភើប។ នៅក្នុងពេលនោះ ព្រះអង្គម្ចាស់ក្សត្រី ក៏សព្វព្រះទ័យប្រទានហ្វីលឯកសារនៃព្រះពិធីមង្គលការរបស់ព្រះអង្គមកកាន់ក្រុមព្រះសុរិយា ដើម្បីរក្សាទុក និងផ្សព្វផ្សាយបន្ត ដោយព្រះអង្គម្ចាស់ក្សត្រី ស្តេចបានព្រះអនុញ្ញាតសិទ្ធិត្រឹមត្រូវ»។
ដោយរក្សាទុកដុំហ្វីលនេះអស់រយៈពេលជាង ៥០ ឆ្នាំ ទ្រង់បានចាត់ទុកវាជាវត្ថុអនុស្សាវរីយ៍ដ៏មានតម្លៃកាត់ថ្លៃពុំបាន។ ក្រុមព្រះសុរិយា បានបន្ដថា ទ្រង់បានរំឭកថា លោក ស៊ីន ស៊ីសាមុត តែងតែច្រៀងក្នុងកម្មវិធីនានាសម្រាប់ក្រុមគ្រួសាររបស់ទ្រង់ ដោយសារព្រះបិតារបស់ទ្រង់មានទំនាក់ទំនងយ៉ាងជិតស្និទ្ធជាមួយលោកផ្ទាល់។
ក្រុមយុវជននេះ បានឱ្យដឹងថា ខ្លួននៅបន្ដបេសកកម្មស្វែងរកឯកសារចម្រៀង និងភាពយន្ដខ្មែរទាំងឡាយសម្រាប់ប្រជាជាតិខ្មែរ និងស្នើសុំពលរដ្ឋខ្មែរផ្សព្វផ្សាយឯកសារប្រវត្ដិសាស្ដ្រទាំងនេះ អមដោយការដាក់ឈ្មោះអ្នកស្រាវជ្រាវ ដើម្បីរក្សាសិទ្ធិកម្មសិទ្ធិបញ្ញាជូនម្ចាស់ដើម។
សម្រាប់ព័ត៌មានលម្អិត សូមចូលទៅកាន់ Facebook Page: www.facebook.com/preahsoriya.kh និងតំណភ្ជាប់រូបភាពលើ Facebook Page: www.facebook.com/bophanacenter.cambodia/posts/5626806920687534៕