ក្រុងឡូសអេនជឺលេស: វីល ស្ម៊ីត ត្រូវបានហាមឃាត់ពីការចូលរួមក្នុងព្រិត្ដិការណ៍ប្រគល់ពានរង្វាន់ Oscars រយៈពេល ១០ ឆ្នាំ ក្រោយពីតារាភាពយន្ដរូបនេះបានធ្វើឱ្យពិភពលោកស្រឡាំងកាំងពេលឡើងលើវេទិកាទះកំផ្លៀងតារាកំប្លែង គ្រីស រ៉ុក នៅពាក់កណ្ដាលកម្មវិធី កាលពី ២ សប្ដាហ៍មុន។
ស្ម៊ីត ក៏មិនត្រូវបានអនុញ្ញាតឱ្យចូលរួមព្រឹត្ដិការណ៍ផ្សេងៗទៀត ដែលត្រូវបានរៀបចំឡើងដោយវិទ្យាស្ថានសិល្បៈ និងវិទ្យាសាស្ដ្រភាពយន្ដរយៈពេល១ទសវត្សរ៍ផងដែរ។
អគ្គនាយក ដាវីដ រ៉ូប៊ីន និងនាយកប្រតិបត្ដិ ដេវ ហាដសុន បានឱ្យដឹងក្នុងលិខិតមួយថា៖ «គណៈកម្មការបានសម្រេច រយៈពេល ១០ ឆ្នាំចាប់ពីថ្ងៃទី ៨ ខែ មេសា ឆ្នាំ ២០២២ លោក ស្ម៊ីត នឹងមិនត្រូវបានអនុញ្ញាតឱ្យចូលរួមគ្រប់ព្រឹត្ដិការណ៍ ឬរាល់កម្មវិធីរបស់ Academy (អូស្ការ) ដោយផ្ទាល់ និងតាមនិមិត្ដទស្សន៍»។
គណៈគ្រប់គ្រង Academy ក្រុមល្បីឈ្មោះបំផុតចំណោមផលិតករប្រមាណ ១ ម៉ឺននាក់របស់ហូលីវូដ ដែលរៀបចំព្រឹត្ដិការណ៍នេះបានបន្ដថា៖ «ពានរង្វាន់អូស្ការលើកទី៩៤ ត្រូវបានរៀបចំឡើងក្នុងការអបអរដល់បុគ្គលច្រើនរូបក្នុងសហគមន៍របស់យើង ដែលបំពេញការងារដ៏អស្ចារ្យ ១ ឆ្នាំកន្លងទៅនេះ។ តែឧប្បត្ដិហេតុអាក្រក់បានកើតឡើងពីអត្ដចរិតដែលមិនអាចទទួលយកបាន និងដ៏គ្រោះថ្នាក់ ដូចយើងបានឃើញលោក ស្ម៊ីត នៅលើវេទិកាកន្លងទៅនេះ!»។
ក្នុងសេចក្ដីថ្លែងការណ៍ ១ ទៅកាន់ក្រុមហ៊ុនផ្សាយពាណិជ្ជកម្មហូលីវូដទាំងអស់ ស្ម៊ីត បានតបថា៖ «ខ្ញុំសូមទទួលយក និងគោរពតាមការសម្រេចរបស់ Academy»៕ AFP/HR