ក្រុងឡូសអេនជឺលេស: តារាចម្រៀង ប្រ៊ីតនី ស្ពៀស៍ កាលពីដើមសប្ដាហ៍ បានប្រកាសថា នាងមានផ្ទៃពោះកូនទី៣ ក្រោយរយៈពេល ៥ ខែ ដែលចៅក្រមបានបិទរឿងក្ដីដ៏ចម្រូងចម្រាសដកគំនាបក្រោមការគ្រប់គ្រងពីអាណាព្យាបាលដែលតារាចម្រៀងប៉ុបរូបនេះបាននិយាយថា ការបាត់បង់សិទ្ធិសេរីភាពគ្រានោះបានរារាំងរូបនាងពីការមានកូនតាមបំណងប្រាថ្នា។
ស្ពៀស៍ អាយុ ៤០ ឆ្នាំ បានឱ្យដឹងនៅលើ Instagram ថា៖ «ខ្ញុំមើលឃើញលទ្ធផលតេស្ដវិជ្ជមានថា មានផ្ទៃពោះ ហើយច្បាស់ណាស់ ខ្ញុំនឹងមានកូន ១ ទៀត»។
កាលពីខែវិច្ឆិកា ចៅក្រមក្រុងឡូសអេនជឺលេស បានរំលាយសេចក្ដីសម្រេចដែលដាក់តារាចម្រៀង ប្រ៊ីតនី ស្ពៀស៍ នៅក្រោមអាណាព្យាបាលដែលគ្រប់គ្រងដោយលោក ជេមី ស្ពៀស៍ ជាឪពុករបស់នាង តាំងពីឆ្នាំ ២០០៨។
សេចក្ដីសម្រេចឱ្យនាងស្ថិតក្រោមការគ្រប់គ្រងពីអាណាព្យាបាលត្រូវបានតារាចម្រៀងរូបនេះអះអាងថា បានរារាំងរូបនាងឱ្យដាក់កងពន្យារកំណើត ទោះបីជាមានបំណងចង់បានកូនយ៉ាងណាក៏ដោយ។
អ្នកតំណាងឱ្យ ស្ពៀស៍ មិនបានឆ្លើយតបនឹងទីភ្នាក់ងារព័ត៌មាន AFP ភ្លាមៗក្នុងការ-សុំធ្វើអត្ថាធិប្បាយឡើយ។
តារាចម្រៀងដែលហៅសង្សារវ័យ ២៨ ឆ្នាំ សេម អាសហ្គារី ថា ប្ដីពេញៗមាត់នោះ បានឱ្យដឹងថា៖ «ពោះវិវឌ្ឍកាន់តែធំ។ បើមាន២នាក់ក្នុងនោះមែន ខ្ញុំបែបទប់ទល់មិនឈ្នះទេ»។
តារាចម្រៀង ប្រ៊ីតនី ស្ពៀស៍ មានកូនប្រុស ២ នាក់រួចទៅហើយគឺ ហ្សន និង ចេដិន ជាមួយអតីតស្វាមីលោក ខេវីន ហ្វឺដឺរឡាញ៕ AFP/HR