ក្រុងប៉ារីស៖ ពិព័រណ៍ស្នាដៃរបស់អ្នកប្រមែប្រមូលសិល្បៈរុស្ស៊ីបានទាក់ទាញភ្ញៀវទេសចរជិតបង្កើតកំណត់ត្រាក្នុងក្រុងប៉ារីសតែសង្គ្រាមនៅអ៊ុយក្រែនអាចបង្អាកសកម្មភាពពិធីកម្សាន្ដបែបនេះមួយរយៈ។
មជ្ឈមណ្ឌលបានឱ្យដឹងកាលពីថ្ងៃចន្ទថា «Morozov Collection» ដែលរួមមានស្នាដៃរបស់ Van Gogh, Cezanne, Matisse និង Monet ទទួលភ្ញៀវប្រមាណ១,២៥លាននាក់នៅLouis Vuitton Foundation ក្នុងក្រុងប៉ារីស។
ការប្រមែប្រមូលត្រូវបានរក្សាទុករួមគ្នាដោយជនជាតិរុស្ស៊ីឈ្មោះ Ivan Morozov នៅចុងសតវត្សរ៍ទី១៩និងដើមសតវត្សរ៍ទី២០ និងមិនធ្លាប់ត្រូវបានឃើញនៅក្រៅប្រទេសរុស្ស៊ីឡើយ។
ចំនួនភ្ញៀវទេសចរទៅកាន់ក្រុងប៉ារីសបានធ្លាក់ចុះតែបន្ដិចបន្ដួចពីចំនួនកំណត់ត្រា ១,៣លាននាក់ដែលរៀបចំឡើងដោយសារមន្ទីរនេះដូចគ្នាកាលពីឆ្នាំ២០១៦ ជាមួយ Shchukin Collection ដែលក៏បានតាំងបង្ហាញស្នាដៃបញ្ជូនមកពីរុស្ស៊ីផងដែរ។
សារមន្ទីរបានឱ្យដឹងក្នុងសេចក្ដីថ្លែងការណ៍ថា៖ «វាជាតួលេខដ៏វិសេសទោះបីស្ថិតក្នុងវិបត្ដិសុខភាព និងអវត្ដមានភ្ញៀវបរទេស ជាពិសេសភ្ញៀវទេសចរអាស៊ីយ៉ាងណាក៏ដោយ»។
យ៉ាងណាមិញរូបគំនូរ ២ផ្ទាំង នឹងមិនត្រូវបានប្រគល់ត្រឡប់វិញឡើយដោយសារតែបញ្ហាសង្គ្រាមនៅអ៊ុយក្រែននិងការរឹបអូសទាក់ទងនឹងទណ្ឌកម្មប្រឆាំងសម្ព័ន្ធមិត្ដរបស់លោកប្រធានាធិបតី Vladimir Putin។នេះបើយោងតាមក្រសួងវប្បធម៌បារាំងបានឱ្យដឹងកាលពីថ្ងៃសៅរ៍។
គំនូរមួយគឺជាស្នាដៃផ្ទាល់របស់វិចិត្រកររុស្ស៊ី Pyotr Konchalovsky ជាម្ចាស់កម្មសិទ្ធិដោយសេដ្ឋីជាប់ទណ្ឌកម្ម Petr Aven។
រូបមួយផ្សេងទៀតដោយវិចិត្រកររុស្ស៊ី Valentin Serov ជាកម្មសិទ្ធិរបស់សារមន្ទីរវិចិត្រសិល្បៈក្នុងទីក្រុង Dnipro ប្រទេសអ៊ុយក្រែនដែលត្រូវបានស្នើសុំឱ្យបន្ដរក្សាទុកក្នុងប្រទេសបារាំង រហូតដល់ស្ថានការណ៍បានប្រសើរឡើង។
កម្មវិធីពិព័រណ៍រៀបចំនៅ Louis Vuitton Foundation ចាប់ពីថ្ងៃទី២២ខែកញ្ញារហូតដល់ថ្ងៃទី៣ខែមេសាដោយបានពន្យារពេលពីការបរិច្ចាគចាស់ថ្ងៃទី២២ខែកុម្ភៈ៕ AFP/HR