ក្រុងប្រេតូរីយ៉ា៖ ស្វាបាប៊ូដើរតាមផ្លូវរបស់ពួកវានៅក្រោមទូរថភ្លើងបរកាត់ស្ពាន។ ដំរីទឹក១ក្បាលជ្រមុជទឹកលេងយ៉ាងសប្បាយនៅក្នុងទឹកទន្លេ ខណៈខ្លាដំបងឯកា១ក្បាលត្រាច់ចររកចំណី និងហិតរកសត្វរមាំងសម្រាប់ជាអាហារដ៏ឆ្ងាញ់ពិសា។
នៅកណ្ដាលឧទ្យានជាតិគ្រូជ័រ ជាតំបន់ព្រៃអភិរក្សដ៏ល្បីល្បាញបំផុតរបស់អាហ្រ្វិកខាងត្បូង រថភ្លើងប្រណីតនេះដឹកនាំអ្នកដំណើរ ដែលមិនកម្រើកខ្លួន។
ដោយច្នៃជាសណ្ឋាគារបូទិក រថភ្លើងជាទីកន្លែងទស្សនារាជាណាចក្រសត្វនាវេលាថ្ងៃរះពណ៌មាសឆ្អិនឆ្អៅ រហូតដល់កញ្ចុំតារាមីគីវ៉េ នាពេលរាត្រីនៅលើលម្ហមេឃ។
វេទិកាតូចមួយបន្ថែមទៅលើស្ពានបានទ្រទម្ងន់អាងទឹករាងមូលតូចមួយ ជាទីសម្រាប់ប្រជុំមនុស្សនៅវេលាម៉ោង ៤ល្ងាច ក្នុងឱកាសក្រេបទឹកតែ ក្នុងបរិយាកាសខ្យល់រំហើយនារដូវក្ដៅ។
សំឡេងសម្រែកបន្លឺឡើងលាន់ទ្រហឹង លុបបាត់សំឡេងចម្រៀងចេកចាចរបស់ហ្វូងបក្សី ។ អ្នករត់តុម្នាក់បានប្រាប់ភ្លាមថា «វាជាសម្រែករបស់សត្វដំរីទឹក» ខណៈភ្ញៀវកំពុងស្លុងអារម្មណ៍ ដោយត្របាញ់កែវភ្នែកទៅរកទន្លេភក់ Sabie River ស្ថិតនៅក្រោមនោះ។
ស្លឹកត្រចៀកមូលតូចៗបានផុសឡើងពីផ្ទៃទឹក ហើយអ្នកស្រី ការ៉េន លេន អាយុ ៥៦ឆ្នាំ ដែលមកពីទីក្រុងចនណេសប៊ឺក ដើម្បីប្រារឰខួបអាពាហ៍ពិពាហ៍ ៣០ឆ្នាំជាមួយស្វាមីឈ្មោះ រីច បាននិយាយខ្សឹបៗថា៖ «គួរឱ្យស្រឡាញ់ណាស់»។
លោក ឈីឈី មូឌូ បុគ្គលិកផ្នែកលក់អាយុ ៣៦ឆ្នាំ បានបន្ដថា៖ «វាជាបទពិសោធដ៏អស្ចារ្យ។ ទាំងទីកន្លែង និងសេវាកម្មពិតជាល្អឥតខ្ចោះ។ វាហាក់ដូចជាក្ដីសុបិនក្លាយជាការពិតអ៊ីចឹង។ ខ្ញុំចូលចិត្ដគ្រប់យ៉ាងនៅទីនេះ»។
មួយសន្លុះក្រោយមក ក្រុមទេសចរមួយឈុតនេះបានចាកចេញទៅកាន់សួនសត្វដ៏ធំធេងជាមួយរថយន្ដធុនធំដើម្បីទៅជួបជាមួយសត្វកវែង ដំរី និងសាកល្បងសមត្ថភាពចក្ខុវិញ្ញាណជាមួយការទស្សនាហ្វូងសេះបង្កង់ កំពុងរស់នៅក្នុងជម្រកធម្មជាតិ ដោយពួកវាកំពុងរវល់ទំពាស្មៅ លេងក្នុងទឹក និងជួនកាល ប្រយុទ្ធគ្នាថែមទៀត។
ក្នុងទសវត្សរ៍ឆ្នាំ១៩២០ ខ្សែរថភ្លើងត្រូវបានរត់សម្រាប់តែទៅឧទ្យានជាតិគ្រូជ័រប៉ុណ្ណោះ។ ប៉ុន្ដែក្បាលអយស្ម័យយានចុងក្រោយបានឆ្លងកាត់ក្នុងឆ្នាំ១៩៧៩ ហើយផ្លូវរថភ្លើងនេះលែងត្រូវបានប្រើតទៅទៀត។
លោក ហ្គាវីន ហ្វើរ៉ៃរ៉ា អាយុ ៣៩ឆ្នាំ ជានាយកផ្នែកប្រតិបត្ដិ បាននិយាយថា៖ «យើងបានទៅមើលកន្លែងខ្មោចរថភ្លើងដើម្បីស្វែងរកទូរថភ្លើង។ដោយច្នៃជាបន្ទប់សណ្ឋាគារ ទូរថភ្លើងបានផ្ដល់បទពិសោធឱ្យភ្ញៀវភ្លក្សអារម្មណ៍ជិះរថភ្លើងទៅអតីតកាល»។
Kruger Shalati ត្រៀមខ្លួនផ្ដល់សេវាកម្មដល់ទេសចរបស្ចិមប្រទេស។ ប៉ុន្ដែនៅពេលវាបានបើកទ្វារកាលពីខែធ្នូ ឆ្នាំ២០២០ ជំងឺរីករាលដាលសកលបានរារាំងពួកគេពីការធ្វើដំណើរ។ ពលរដ្ឋអាហ្វ្រិកខាងត្បូងបានចូលខ្លួនមកបំពេញនាទីជាភ្ញៀវទេសចរជំនួសជនបរទេសវិញ។
ពេលនេះ រថភ្លើងកំពុងតែអន្ទងភ្ញៀវទេសចរអាមេរិកកាន់តែច្រើន។ នៅពេលរាត្រីកាលចូលមកដល់ រថភ្លើងរង្គើតិចៗដោយមានភ្ញៀវស្នាក់នៅខាងក្នុង ខណៈកម្ដៅថ្ងៃបានធ្វើឱ្យដែករីកមាឌ និងរាត្រីកាលត្រជាក់ៗធ្វើឱ្យដែករួមមាឌ។
ហ្វើរ៉ៃរ៉ា បានបន្ដថា៖ «វាជាចលនារបស់ធម្មជាតិ។ វាកើតឡើងការរីក និងរួមមាឌនៃសំណង់ស្ពានដែក»៕ AFP/HR