.jpg)
ក្រណាត់ប្រើសម្រាប់កាត់ដេរឈុតសារី ជាសម្លៀកបំពាក់ប្រពៃណីរបស់នារីឥណ្ឌា។ រូបថត AFP
ក្រុងញូវដែលី: នៅក្នុងបន្ទប់ភ្លើងបំភ្លឺព្រាលៗក្បែរត្រើយម្ខាងនៃទន្លេគង្គា បុរសៗបានប្រើដៃលើកកីតម្បាញ ខណៈសរសៃសូត្រត្រូវបានត្បាញគាបបញ្ចូលពុម្ពកី។
ស្ទូឌីយោដ៏តូចចង្អៀតរបស់លោក មូហាមេដ ស៊ីរ៉ាជូដឌីន គឺជាទម្រង់សិល្បៈបុរាណដែលកាន់តែថយប្រជាប្រិយភាពនៅទីក្រុង វ៉ារ៉ាន់ណាស៊ី នៃសហគមន៍អ្នកសិល្បៈ ដែលផលិតឈុតប្រពៃណីឥណ្ឌា «សារី» ដោយដៃជាស្នាដៃដ៏វិសេសក្នុងចំណោមអ្នកតម្បាញពីបរមបុរាណ។
បុរសអាយុ ៦៥ ឆ្នាំរូបនេះបានប្រាប់ AFP ថា៖ «បើអ្នកដើរជុំវិញតំបន់នេះ អ្នកនឹងមើលឃើញថា ផ្ទះតែ ១ គត់ ដែលមានកីតម្បាញ។ វានឹងបន្ដនៅទីនោះ ដរាបណា ខ្ញុំមានជីវិតរស់នៅ។ អស់ពីខ្ញុំទៅ គ្មាននរណាម្នាក់ក្នុងផ្ទះនេះនឹងបន្ដការងារនេះឡើយ»។
អ្នកតម្បាញដោយដៃនៅទីក្រុងវ៉ារ៉ាន់ណាស៊ី បានសាងកេរ្ដិ៍ឈ្មោះល្អអស់រយៈពេលជាច្រើនសតវត្សរ៍ ដោយមានជំនាញរំលេចនូវគំនូរសិល្បៈសាំញ៉ាំ ការរចនាផ្កា និងសំពត់ពណ៌មាសឆ្អិនឆ្អៅ។
ឈ្មោះឈុតសម្លៀកបំពាក់ សារី បាណារ៉ាស៊ី ដែលយកឈ្មោះតាមទីក្រុងបុរាណ មានការពេញនិយមចំពោះការប្រើប្រាស់ក្នុងចំណោមកូនក្រមុំឥណ្ឌា និងរមែងថែរក្សាទុកបន្ដពីមួយជំនាន់ទៅមួយជំនាន់ទៀតក្នុងនាមជាវត្ថុប្រចាំគ្រួសារ។
ក្រណាត់ប្រណីតនេះមានតម្លៃខ្ពស់គួរសម ដោយស្នាដៃបច្ចុប្បន្នរបស់លោក ស៊ីរ៉ាជូដឌីន នឹងលក់ក្នុងតម្លៃ ៣ ម៉ឺនរូពី (៣៩០ ដុល្លារ) ប៉ុន្តែដោយសារមានឈ្មួញកណ្ដាល ការចំណេញនៅសល់តិចតួចសម្រាប់ម្ចាស់តម្បាញដោយដៃ។
កីតម្បាញដោយដៃនៅសល់តិចតួច ប៉ុន្តែសិប្បករមួយចំនួនតូចនៅតែថែរក្សាវាឱ្យគង់វង្ស។ រូបថត AFP
លោក ស៊ីរ៉ាជូដឌីន បានបន្ដថា៖ «បើធៀបនឹងការងារដ៏លំបាក ដែលធ្វើការផលិតក្រណាត់ឈុតសារីនេះ ប្រាក់ចំណូលស្ដួចស្ដើងបំផុត»។
អ្នកជិតខាងរបស់លោកសុទ្ធតែបានផ្លាស់ប្ដូរអាជីពទៅប្រើកីអេឡិចត្រូពិកសម្រាប់ផលិតសម្លៀកបំពាក់ ដែលខ្វះសុខដុមភាពនៃវាយនភណ្ឌត្បាញដោយដៃ និងលក់ត្រឹមតម្លៃ ១ ភាគ ៣ ប៉ុណ្ណោះ តែត្រូវការពេលផលិតយូរ។
លោក ចាយ៉ា ចាយតលី អ្នកនិពន្ធ និងអតីតអ្នកនយោបាយដែលបានសរសេរសៀវភៅស្ដីពីវាយនភណ្ឌតម្បាញនៅក្រុងវ៉ារ៉ាន់ណាស៊ីថា៖ «អំបោះ និងក្រណាត់ចិនមាននៅគ្រប់ទីកន្លែង។ រោងចក្រសារីនៅទីនោះបាននិងកំពុងតែបណ្ដេញសិប្បកម្មច្នៃផលិតដោយដៃយ៉ាងវិសេសចេញ»។
លោកបានបន្តថា៖ «ឧស្សាហកម្មដ៏រីកចម្រើនទាំងអស់នេះ ត្រូវបានសម្លាប់តាមរយៈការប្រកួតប្រជែងរបស់ផលិតផលចិន ហើយសមត្ថភាពផលិតបរិមាណដ៏ច្រើនសន្ធឹកក្នុងតម្លៃថោកជាងផលិតផលដោយដៃ»។
ទោះជាយ៉ាងណា អ្នកតម្បាញសាហ៊ីដ នៅតែមានក្ដីសង្ឃឹមថា អតិថិជនទ្រព្យស្ដុកនឹងស្រឡាញ់ចូលចិត្ដផលិតផលធ្វើដោយដៃដ៏មានភាពស្អាតថ្លៃថ្នូរ។
លោក សាហ៊ីដ អាយុ ៣៣ ឆ្នាំ បានប្រាប់ AFP ថា៖ «អ្នកដែលដឹងអំពីតម្លៃរបស់ផលិតផលដោយដៃនឹងបន្ដទិញ និងកោតស្ញប់ស្ញែងក្រណាត់ឈុតសារីរបស់យើង។ កីតម្បាញដោយដៃអាចនៅសល់តិច តែពួកវានឹងមិនរលាយរលត់នោះទេ»៕ AFP/HR
