.jpg)
សត្វឆ្មាអាយុ ១៧ ឆ្នាំ រស់នៅក្នុងកូនផ្ទះឈើនៅវិមាន Rector។ រូបថត សហការី
ក្រុងសាក្រែប: មនុស្សរាប់ពាន់នាក់បានចុះហត្ថលេខាលើញត្ដិមួយប្រឆាំងនឹងការបណ្ដេញឆ្មាអនាថាអាយុ ១៧ ឆ្នាំ ចេញពីផ្ទះរបស់វានៅខាងក្រៅវិមានប្រវត្ដិសាស្ដ្រក្នុងតំបន់ទេសចរណ៍ក្រូអាស៊ី Dubrovnik។
ឆ្មាអាណាស្ដាសៀ ចំណាយពេលនៅមុខវិមាន Rector សតវត្សរ៍ទី១៤ ក្នុងទីក្រុងបុរាណ និងជាសត្វសំណព្វចិត្ដរបស់អ្នកស្រុក ក៏ដូចជាភ្ញៀវទេសចរផងដែរ។
ថ្វីដ្បិតតែមានបំណងស្វែងរកជម្រករស់នៅយ៉ាងណាក៏ដោយ ក៏ឆ្មាញី ១ ក្បាលនេះ តែងវិលទៅកាន់វិមានវិញដដែល។ ដូច្នេះ ក្រុមអ្នកស្ម័គ្រចិត្ដបានដាក់ប្រអប់ ១ ឱ្យវាជ្រកកោន។
រូបភាពបានធ្វើឱ្យអាជ្ញាធរសារមន្ទីរក្នុងក្រុងដែលបោះមូលដ្ឋានក្នុងអគារនេះ មិនពេញចិត្ដ។ ដូច្នេះ អ្នកស្រឡាញ់សត្វម្នាក់បានធ្វើផ្ទះឈើតូច ១ ជារចនាប័ទ្មវិមាន ដែលមានស្ថាបត្យកម្ម Gothic, Renaissance និង Baroque រួមទាំងស្លាកឈ្មោះឆ្មា អាណាស្ដាសៀ។
ផ្ទះឆ្មានោះក៏ទទួលបានប្រតិកម្មមិនសមប្រកប ហើយគណៈគ្រប់គ្រងផ្នែកវប្បធម៌ក៏បានបញ្ជាឱ្យរុះរើចេញ។
អាជ្ញាធរសារមន្ទីរបានទទូចថា គ្មាននរណាម្នាក់ត្រូវបានអនុញ្ញាតឱ្យផ្លាស់ប្ដូរ «វប្បធម៌ដ៏ល្អឯក និងបែបប្រវត្ដិសាស្ដ្រ» នៃវិមាន Rector បានទេ សូម្បីការបន្ថែមជម្រក ឬផ្ទះផ្សេងៗ។
ការបណ្ដេញឆ្មា អាណាស្ដាសៀ បានបង្កព្យុះភ្លៀងលើបណ្ដាញសង្គម ហើយមនុស្ស ១២ ០០០ នាក់ កាលពីចុងសប្ដាហ៍បានចុះហត្ថលេខាលើញត្តិទាមទារឱ្យវានៅដូចដើម។
Srdjan Kera ស្ថាបត្យករសង់ជម្រកឆ្មានេះ បាននិយាយទាំងសោកស្ដាយថា៖ «វាជាផ្ទះរបស់ឆ្មា។ យើងនិយាយអំពីឆ្មា ១ ក្បាលនេះ ដោយមិនសំដៅលើ ៧០ ក្បាលឡើយ»។
អភិបាលក្រុង Dubrovnik លោក ម៉ាតូហ្វ្រង់កូវីក បានគាំទ្រសេចក្ដីសម្រេចសារមន្ទីរ ដោយសង្កត់ធ្ងន់ថា គជ់នៃទឹកដីដែនសមុទ្រអ្រាឌីយ៉ាទិកមានតែឆ្មាកន្ធាត់ និង «មិនមែនឆ្មាសំគម» នោះទេ៕ AFP/HR
