ក្រុងទុយនីស: ល្ខោនទូរទស្សន៍រដូវកាលរ៉ាម៉ាដនស្ដីអំពីពហុពន្ធភាព បានបង្កជាការជជែកតឹងសរសៃកនៅប្រទេសទុយនីស៊ី ជាប្រទេសអារ៉ាប់ផ្ដល់សិទ្ធិឱ្យស្ដ្រី ដែលហាមឃាត់ប្រពៃណីបុរសយកប្រពន្ធច្រើន កាលពី ១ ទសវត្សរ៍មុន។
«បារ៉ា» ឬ «បរិសុទ្ធចិត្ដ» ត្រូវបានរិះគន់ដោយក្រុមសកម្មជនសិទ្ធិ និងអ្នកនយោបាយចំពោះការតំណាងឱ្យអាពាហ៍ពិពាហ៍ «អូហ្វី» តាមប្រពៃណី ជាការប្រណិប័តន៍បែបសាសនា ដែលមិនមែនការអនុម័តតាមច្បាប់រដ្ឋ។
ការអនុវត្ដនេះត្រូវបានដាក់ទោសឱ្យជាប់ពន្ធនាគាររហូតដល់ ១ ឆ្នាំ ក្រោមឆ្នាំក្រមសីលធម៌គ្រួសារឆ្នាំ ១៩៥៦ របស់ប្រទេស។
ប៉ុន្ដែក្នុងវគ្គមួយនៃល្ខោនភាគនោះ តួអង្គឯក Wannas បានប្រកាសប្រាប់ភរិយា និងកូនៗរបស់លោកថា លោកមានសិទ្ធិរៀបការភរិយាទី២ ក្រោមច្បាប់អ៊ិស្លាម ដែល «មានសុពលភាពលុបលើច្បាប់ដទៃ»។
ល្ខោនភាគទូរទស្សន៍ ដែលចាក់បញ្ចាំងនៅម៉ោងល្អសម្បូរអ្នកទស្សនា ក្រោយមូស្លីមសាសនិកបញ្ចប់ពេលវេលាបួស បានបង្កការរិះគន់នៅលើបណ្ដាញសង្គមយ៉ាងខ្លាំង។
តារាភាពយន្ដទុយនីស Mariem Ben Hussein បាននិយាយថា៖ «ពិតជាស្រងាកចិត្ដណាស់ដែលត្រូវយកប្រធានបទនេះមកជជែក»។
ប្រមុខដឹកនាំក្រោយឯករាជ្យ Habib Bourguiba បានដាក់ប្រពៃណីពហុពន្ធភាពក្រៅច្បាប់ក្រោមហេតុផលក្រមសីលធម៌គ្រួសារ ដែលត្រូវបានអនុម័ត ៥ ខែ ក្រោយទទួលឯករាជ្យឆ្នាំ ១៩៥៦ ពីបារាំង។ វាជាច្បាប់ ដែលមិនពាក់ព័ន្ធនឹងបដិវត្ដន៍ក្នុងពិភពអារ៉ាប់នៅគ្រានោះឡើយ។
ការផ្លាស់ប្ដូររួមមានករណីលែងលះត្រូវតែឆ្លងកាត់តុលាការ ដោយមានន័យថា ស្វាមីលែងអាចប្រកាសផ្ដាច់ចំណងអាពាហ៍ពិពាហ៍ដោយខ្លួនឯងបានទៀតហើយ៕ AFP/HR