.jpg)
រូបភាពតំណាង៖ ទិដ្ឋភាពនៃពិព័រណ៍ Repair Fair ជាជំនួបអ្នកមានរបស់របរខូចៗ និងជាងជួសជុល។ រូបថត សហការី
ភ្នំពេញ: បន្ទាប់ពីពន្យាររាប់ខែដោយខកខានមិនបានធ្វើតាំងពីឆ្នាំមុន ពេលនេះពិព័រណ៍ Cambodia''s First Repair Fair ដែលរៀបចំឡើងដោយស្ត្រីអាមេរិក សេនឌី ខូតាន់ (Sandy Kotan) និងជាស្ថាបនិក និងអ្នកគ្រប់គ្រងសហគ្រិនសង្គម Only One Planet នឹងលេចរូបរាងឡើងនៅថ្ងៃអាទិត្យ ទី ២៤ ខែមេសានេះ ចាប់ពីម៉ោង ១០ ព្រឹក ៥ ល្ងាច នៅអគារ Gateway House។
ពិព័រណ៍ Cambodia''s First Repair Fair ត្រូវបានធ្វើឡើង ដើម្បីសាបព្រោះចំណេះដឹងជួសជុលរបស់របរខូចៗ ក្នុងគោលដៅបញ្ចៀសកុំឱ្យមានសំរាមច្រើននៅលើភពផែនដី ក៏ដូចជាគាំទ្រសិប្បកម្មតូចៗរបស់ប្រជាជនខ្មែរផងដែរ។
ស្ថាបនិកជាស្ត្រីគិតគូរបរិស្ថានរូបនេះប្រាប់ ភ្នំពេញ ប៉ុស្តិ៍ថា៖ «យើងពិតជារំភើបណាស់! យើងសង្ឃឹមថាព្រឹត្តិការណ៍បែបនេះមិនត្រឹមតែជួយមនុស្សឱ្យគិតគូរដល់បរិស្ថានប៉ុណ្ណោះទេ ប៉ុន្តែថែមទាំងបានជួយដល់អ្នក ដែលលក់សម្ភារមិនប្រើប្រាស់ប្លាស្ទិក និងនាំឱ្យមនុស្សចូលរួមយល់ដឹងកាន់តែច្រើនជាមួយនឹងប្រធានបទ និងកម្មវិធីដែលមិនបំផ្លាញបរិស្ថាន»។
ក្នុងពិព័រណ៍នោះដែរ រួមមានអ្នកដេរសម្លៀកបំពាក់ អ្នកជួសជុលស្បែកជើង នាឡិកា គ្រឿងអលង្ការ ទូរស័ព្ទ កាតាប កង់ និងវត្ថុផ្សេងៗទៀត។
អ្នកនាង សេនឌី បានព្យាយាមស្វែងរកមើលជាង ដែលអាចទុកចិត្តបាន ដោយមានការណែនាំពីមិត្តភក្តិក្នុងហ្វេសប៊ុក មិត្តរួមការងារ និងដៃគូជំនួញផ្សេងៗ ដើម្បីឱ្យច្បាស់ថា អ្នកជួសជុលទាំងនេះមានសមត្ថភាពបំពេញការងារបានល្អបំផុត។
អ្នកនាង សេនឌី ខូតាន់ ស្ថាបនិក Only One Planet Cambodia។ រូបថត សហការី
នៅពេលដែលទាក់ទងទៅកាន់អ្នកលក់ និងអ្នកជួសជុល អ្នកនាងបានឱ្យដឹងពីការឆ្លើយតបរបស់ពួកគេដែរថា៖ «សម្រាប់អ្នកលក់រាយ ពួកគាត់បានយល់ដឹងច្បាស់ពីបញ្ហាបរិស្ថានរួចហើយ ហើយក៏សប្បាយចិត្តក្នុងការចូលរួមព្រឹត្តិការណ៍ដែលផ្ដោតលើតែផលិតផលដែលមិនប៉ះពាល់ដល់ផែនដីនេះ តែចំពោះអ្នកជួសជុលវិញ គឺពិបាកបញ្ចុះបញ្ចូលបន្តិច ព្រោះនេះជាភាពប្លែកថ្មីមួយ»។
អ្នកនាងបន្តថា៖ «យើងសង្ឃឹមថា តាមរយៈការចូលរួម យើងនឹងគាំទ្រអ្នកលក់ក្នុងស្រុក និងជួយពួកគេឱ្យរីកចម្រើនក្នុងអាជីវកម្ម។ យើងនឹងបន្តគាំទ្រ ណែនាំពួកគេទៅថ្ងៃអនាគត តែដោយសារពួកគេជាអាជីវកម្មតូចៗ វាពិបាកដែរក្នុងការបិទហាងនៅថ្ងៃអាទិត្យ ដើម្បីចូលរួមជាមួយយើង»។
មូលហេតុចាំបាច់ដែលមនុស្សគួរចូលរួមពិព័រណ៍ត្រូវបានអ្នកនាងសង្កត់ធ្ងន់ថា មនុស្សគួរតែខិតខំប្រឹងប្រែងរក្សាអាយុកាលប្រើប្រាស់របស់វត្ថុនីមួយៗ និងបញ្ចៀសវាពីកន្លែងចាក់សំរាម។ មនុស្សផ្ដើមទម្លាប់ទិញរបស់ថ្មីជំនួសការជួសជុល ហើយបញ្ហានេះកំពុងបង្កបញ្ហាធំដល់កម្ពុជា និងបណ្ដាប្រទេសក្នុងពិភពលោក។
ផែនដីផ្ទុកធនធានមានកំណត់ ដូច្នេះនៅពេលដែលសម្ភារអ្វីមួយត្រូវបានផលិត វាគួរតែត្រូវបានប្រើប្រាស់ឱ្យបានយូរតាមដែលអាចធ្វើទៅបាន ដើម្បីកុំឱ្យបន្តបាត់បង់វត្ថុធាតុដើមសម្រាប់ផលិតរបស់របរថ្មី។
អ្នកនាងបានបន្តថា៖ «យើងកំពុងស្ថិតក្នុងចំណុចមួយ ដែលមីក្រូប្លាស្ទិកវាយលុកសរីរាង្គ និងចរន្តឈាមរបស់យើង ហើយមិនដឹងថាវានឹងប៉ះពាល់ដល់សុខភាពយើងកម្រិតណាទៀតទេ តែយើងដឹងថា វាបានប៉ះពាល់ដល់អត្រាមានកូន និងការអភិវឌ្ឍកុមារតូចៗ។ ដូច្នេះ យើងត្រូវតែយកចិត្តទុកដាក់ចំពោះវា»។
ចំពោះពិព័រណ៍នេះផងដែរ អ្នកចូលរួមមិនតម្រូវឱ្យមានបង់សេវាចូលទេ តែនឹងត្រូវបង់ទៅតាមសេវាកម្មដែលពួកគាត់ប្រើប្រាស់ ហើយគ្រប់គ្នាក៏អាចយកកែវ ថ្ម និងថង់ប្លាស្ទិក សម្រាប់ការកែច្នៃប្រើប្រាស់ឡើងវិញដោយឥតគិតថ្លៃផងដែរ។
សកម្មភាពប្រមូលដប និងកែវសម្រាប់ការកែច្នៃប្រើប្រាស់ឡើងវិញ។ រូបថត សហការី
តាមការឆ្លើយតបនៅក្នុង ហ្វេសប៊ុកចំនួនអ្នកចាប់អារម្មណ៍ចូលរួមជាង ៥០០ នាក់ ដែលអ្នកនាងគិតថា ជាក់ស្ដែងមានអ្នកចូលរួមច្រើនដូច្នោះមែន ពិតជារឿងដ៏រីករាយ ហើយអ្នកនាងសង្ឃឹមនឹងអាចបន្តធ្វើពិព័រណ៍ជួសជុលនេះឱ្យបាន ២ ដង ក្នុង ១ ឆ្នាំ។
អ្នកនាងឱ្យដឹងដែរថា៖ «ពួកយើងកំពុងតែរៀបចំឱ្យមានវេបសាយជា ២ ភាសា ដោយសង្ឃឹមថា វានឹងក្លាយជា «ចំណតធនធានតែមួយ» សម្រាប់សម្ភារបរិស្ថានទាំងអស់នៅកម្ពុជា ដែលនឹងមានចុះឈ្មោះ ភោជនីយដ្ឋាន ហាង ក្លិប សណ្ឋាគារ ដែលកាត់បន្ថយការប្រើប្រាស់ប្លាស្ទិក»។
អំពីបេសកកម្មប្រមូលកែវ និងដប អ្នកនាង សេនឌី បន្ថែមដែលថា គ្រប់កែវទាំងអស់នឹងទៅក្រុមហ៊ុន GAEA នៅព្រែកព្នៅ។ បច្ចុប្បន្ន ក្រុមហ៊ុនទើបតែបានប្រមូលរក្សាទុក ប៉ុន្តែគ្រោងនឹងកែច្នៃវាទៅជាខ្សាច់ ប្រើប្រាស់ឡើងវិញ និងមានគម្រោងជាច្រើនទៀត។
ដោយថ្ងៃទី ២២ ជា «ទិវាផែនដី» Only One Planet Cambodia ក៏មានកម្មវិធីជាច្រើនទៀតដូចជា ថ្ងៃទី ២២ មានការបញ្ចាំងរឿង «ប្លាស្ទិក» បកប្រែជាភាសាខ្មែរ ដោយផ្ដល់ពោតលីង និងសូដាឥតគិតថ្លៃសម្រាប់ ៣០ នាក់ដំបូង នៅរោងភាពយន្ត លីជេន ណូរូ វេលាម៉ោង ២ រសៀល។
ឯថ្ងៃទី ២៣ នឹងមានការទស្សនារឿង «ប្លាស្ទិក» ជាភាសាអង់គ្លេសនៅសួន Coconut Park ដោយឥតគិតថ្លៃដូចគ្នា តែគ្មានភេសជ្ជៈ និងចំណី។ នៅថ្ងៃទី ២៨ ម៉ោង ៦ កន្លះល្ងាច នៅ Le Moon Rooftop bar នឹងមានកិច្ចពិភាក្សាជាមួយអ្នកដែលគិតគូរពីបរិស្ថានដូចគ្នា ដែលអ្នកនាងសង្ឃឹមថា នឹងអាចធ្វើឡើងរាល់ខែ។
ព័ត៌៌មានបន្ថែមមាននៅទំព័រហ្វេសប៊ុក @onlyoneplanetkh៕
ទីតាំងពិព័រណ៍នៅ Gateway House ផ្លូវ ១៩៧ សង្កាត់ទំនប់ទឹក។ រូបថត សហការី
