ក្រុងញូវយ៉ក: ដូចជាវត្ថុនៅក្នុងរឿងប្រលោមលោកបែបវិទ្យាសាស្ត្រជាមួយចម្រឹងពណ៌មាសចំនួន ៦ និងជញ្ជាំងពណ៌សផុសឡើងផុតពីចុងឈើព័ទ្ធជុំវិញប្រាសាទ Washington Mormon បានបិទបាំងចំណាប់អារម្មណ៍អស់ជាច្រើនទសវត្សរ៍ ដោយការហាមឃាត់មិនឱ្យចូល។
យ៉ាងណាមិញ ការចង់ដឹងចង់ឃើញពិតជាដល់ពេលវេលាសមស្របក្នុងពេលឆាប់ៗ ខណៈប្រាសាទសាសនាដ៏អស្ចារ្យ និងអាថ៌កំបាំងមួយនេះ នឹងបើកទ្វារស្វាគមន៍មហាជនជាលើកដំបូងក្នុងរយៈពេលជិតកន្លះសតវត្សរ៍។
ប្រាសាទដ៏អាថ៌កំបាំងបំផុតមួយនៅក្នុងរដ្ឋធានីសហរដ្ឋអាមេរិក ជាធម្មតាបានបើកសម្រាប់តែសមាជិកសំខាន់នៃសាសនាព្រះយេស៊ូគ្រិស្ត។
លោក Kevin Duncan មន្ត្រីជាន់ខ្ពស់ក្នុងសាសនាចក្របានប្រាប់ AFP ថា៖ «ប្រជាជនយល់ឃើញថា អ្វីដែលយើងធ្វើនៅខាងក្នុងគឺជារឿងអាថ៌កំបាំង ប៉ុន្តែដូចដែលអ្នកបានឃើញនៅថ្ងៃនេះវាគ្រាន់តែជាទីឋានពិសិដ្ឋ។ វាពិសិដ្ឋណាស់សម្រាប់យើង»។
នៅថ្ងៃចន្ទ ក្នុងអំឡុងពេលថ្ងៃបើកចំហសម្រាប់ប្រព័ន្ធផ្សព្វផ្សាយព្រះវិហារបរិសុទ្ធបានស្វាគមន៍អ្នកមិនមែនជាសមាជិក ជាលើកដំបូងចាប់តាំងពីឆ្នាំ ១៩៧៤។
អ្នកទស្សនាកន្លែងពិសិដ្ឋបំផុតនៅលើផែនដីត្រូវពាក់ទ្រនាប់ជើងពណ៌ស ដើម្បីអាចទស្សនាបរិវេណខាងក្នុងដ៏ប្រណីតជាមួយនឹងកម្រាលព្រំក្រាស់ និងផ្ទៃជញ្ជាំងពិតានដ៏ប្រណីត។
វេលាមុនដែលសាធារណជនត្រូវបានអនុញ្ញាតឱ្យចូលមើល មានចំនួនមនុស្ស ៧៥ ម៉ឺននាក់ មកទស្សនាប្រាសាទស្ថិតក្នុងក្រុង Kensington រដ្ឋម៉ារីលែន ចម្ងាយតែប៉ុន្មានគីឡូម៉ែត្រនៅខាងក្រៅក្រុងវ៉ាស៊ីនតោន។ ក្នុងចំណោមអ្នកចូលមើលទាំងនោះក៏មានស្ត្រីទី១ Betty Ford ផងដែរ។
ប្រាសាទនេះត្រូវបានបិទនៅឆ្នាំ ២០១៨ ដើម្បីជួសជុលហើយគ្រោងនឹងបើកដំណើរការឡើងវិញនៅឆ្នាំ ២០២០ មុនពេលជំងឺរាតត្បាតកូវីដ ១៩ បានចូលមកបង្អាក់ផែនការ។
អ្នកទស្សនានាពេលអនាគតត្រូវតែកក់កន្លែងជាមុនដោយឥតគិតថ្លៃ ដើម្បីចូលមើលចាប់ពីចុងខែមេសា ដល់ដើមខែមិថុនា។
នៅក្នុងជំនឿម័រម៉ុនពិធីបុណ្យជ្រមុជទឹកក្នុងព្រះវិហារបរិសុទ្ធត្រូវបានបម្រុងទុកសម្រាប់អ្នកស្លាប់ ខណៈដែលពិធីបុណ្យជ្រមុជទឹកធម្មតាធ្វើឡើងនៅក្នុងអគារផ្សេងទៀត។
នៅបរិវេណផ្សេងៗនៃប្រាសាទ គឺទីសម្រាប់រៀបចំកម្មវិធីអាពាហ៍ពិពាហ៍ ឬ «បន្ទប់ពិសិដ្ឋ»។ ក្រុមគ្រួសារដែលមានទំនាក់ទំនងរវាងឪពុកម្ដាយ និងកូនៗក៏អាចរៀបចំកម្មវិធីសាសនាក្នុងបន្ទប់តែមួយនេះផងដែរ។
ព្រះវិហារបានឱ្យដឹងថា ខ្លួនគ្រោងស្វាគមន៍ភ្ញៀវរាប់ម៉ឺននាក់អំឡុងរដូវបើកទ្វារប្រាសាទនេះ៕ AFP/HR