ក្រុងរីយោ: បេក្ខជនសម្រាំង ៨ នាក់ បានចូលរួមកាលពីថ្ងៃចន្ទ ក្នុងការប្រកួតនៅទីក្រុងរីយោដើម្បីរកបេក្ខភាពប្រេស៊ីលទៅប្រកួតជើងឯកយន្តហោះក្រដាសពិភពលោកនៅទីក្រុង Salzburg ប្រទេសអូទ្រីស នៅខែឧសភា។
ព្រឹត្តិការណ៍ Red Bull Paper Wings 2022 នឹងមានបេក្ខជនតំណាងប្រទេសចំនួន ៦២ មកប្រជែងរកជើងឯកយន្តហោះក្រដាសល្អបំផុតក្នុងពិភពលោកទាំងការបង្ហើរចម្ងាយឆ្ងាយ និងថិរវេលាសំកាំង។
និស្សិតចំនួន ៨ នាក់ នៅក្នុងវិស័យចម្រុះដូចជាវិស្វកម្មពេទ្យសត្វ និងអាហារូបត្ថម្ភបានចូលរួមក្នុងវគ្គផ្តាច់ព្រ័ត្រ កាលពីថ្ងៃចន្ទបន្ទាប់ពីបានឆ្លងផុតវគ្គជម្រុះបឋមជាមួយនឹងបេក្ខជនចូលរួមចំនួន ២ ៥០០ នាក់។
ស្ថិតនៅលើផ្លូវរត់នៃទីលានប្រកួតក្នុងសាល ដែលមានសណ្ឋានដូចផ្លូវរត់យន្ដហោះ ពួកគេបានគប់យន្ដហោះក្រដាសទៅលើ។
យុវជន ចូស ស៊ីវ៉ា អាយុ ២៤ ឆ្នាំជំនាញវិទ្យាសាស្ត្រកុំព្យូទ័រកំពុងប្រកួតក្នុងវគ្គជម្រុះទី២ របស់ខ្លួន។
លោកបានពន្យល់ថា៖ «យន្តហោះធ្វើឡើងសម្រាប់បង្ហោះចម្ងាយឆ្ងាយ ដូចនឹងគ្រាប់រ៉ុក្កែត ហើយយន្តហោះសំកាំងខ្លួន ត្រូវមានស្លាបធំវែង»។
យន្តហោះយុវជនរូបនេះសមត្ថភាពសំកាំងខ្លួនបានថិរវេលា ២,១១ វិនាទីដោយចាញ់យុវជនវ័យ ១៩ ឆ្នាំ ភ្រេដូ ក្រាស កាព្រីអុតទី ដែលមានថិរវេលា ៧,៦១ វិនាទី និងឯតទគ្គកម្មពិភពលោកក្នុងថិរវេលា ២៧,៩ វិនាទី ដែលគ្រប់គ្រងដោយ តាគូអុ តូដា ជនជាតិជប៉ុន។ ពានចម្ងាយឆ្ងាយបានទៅលើ Isaac Queiroz Leite អាយុ ១៩ ឆ្នាំ ក្នុងចម្ងាយ ៤០,៣ ម៉ែត្រ ប្រដេញកំណត់ត្រាពិភពលោក ៦៩,១ ម៉ែត្ររបស់ Joe Ayoob នៅសហរដ្ឋអាមេរិក៕ AFP/HR