ក្រុងសៅប៉ូឡូ: ឈរនៅមុខកញ្ចក់ ម៉ារៀន ស៊ីវ៉ា ដូស សាន់តូស បានរំលេចស្នាមញញឹមដោយក្ដីស្រឡាញ់ពេញចិត្ដស្នាមសាក់ថ្មីរំលេចរូបភាពផ្កា និងខ្សែត្បូង ដែលស្ថិតនៅលើដើមទ្រូង បិទបាំងស្លាកស្នាមវះកាត់រាងជារង្វង់បន្សល់ទុកពីការវះកាត់ព្យាបាលជំងឺមហារីកសុដន់របស់ស្ដ្រីប្រេស៊ីល វ័យ ៥១ ឆ្នាំរូបនេះ។
ស្បែកសល់ចំហាយកម្ដៅពីមុខម្ជុល អ្នកស្រី ដូស សាន់តូស សម្លឹងមើលផ្កាបញ្ចេញសម្រស់នៅលើដងខ្លួន និងរំលេចជាគ្រាប់ពេជ្រចំពោះការរចនាសុដន់ខាងឆ្វេងឡើងវិញ ដោយអរគុណដល់គម្រោងជួយស្ត្រីឱ្យយកឈ្នះលើស្លាកស្នាមលើរាងកាយ និងបញ្ហាផ្លូវចិត្តពីអតីតកាល។
អ្នកស្រី ដូស សាន់តូស ដែលត្រូវវះកាត់សុដន់ចេញ បន្ទាប់ពីអ្នកស្រីត្រូវបានរករោគវិនិច្ឆ័យឃើញមានជំងឺមហារីក កាលពីប្រាំ ៥ មុន បាននិយាយថា៖ «បើឃើញស្លាកស្នាមនេះលើខ្លួនឯង ហើយទោះជាអ្នកដទៃមើលមិនឃើញក៏វាឈឺដែរ»។
អ្នកស្រីបានបន្ថែមថា៖ «ប៉ុន្តែឥឡូវនេះខ្ញុំឃើញផ្កា។ ខ្ញុំមិនគិតថា វានឹងស្អាតដូច្នេះទេ»។
អ្នកស្រី ដូស សាន់តូស គឺជាស្ត្រីម្នាក់ក្នុងចំណោមស្ត្រីប្រហែល ១៦០ នាក់ ដែលសិល្បករសាក់រូបក្នុងក្រុងសៅប៉ូឡូ អ្នកនាង កាល់ឡា មេនដេស បានជួយក្រោមគម្រោងសប្បុរសធម៌ដែលគេស្គាល់ថា «We Are Diamonds» ឬ «យើងជាគ្រាប់ពេជ្រ» ដែលបានចាប់ផ្តើមនៅឆ្នាំ ២០១៧ ដើម្បីបិទបាំងស្លាកស្នាមពីជំងឺអំពើហិង្សាយេនឌ័រគ្រោះថ្នាក់ និងការប៉ះទង្គិចផ្លូវចិត្តផ្សេងទៀត។
សិល្បករសាក់រូប មេនដេស ដែលបានបង្កើតស្លាកសញ្ញាសាក់រូបពេជ្រ បាននិយាយថា៖ «ខ្ញុំចង់រំឭកពួកគេថា ពួកគេពិតជាដូចពេជ្រជាអ្វីមួយដែលបញ្ចេញពន្លឺពេលអ្នកខាត់វា»។
អ្នកនាងបន្តថា៖ «ពិតជារីករាយណាស់ដែលអាចប្រើសិល្បៈរបស់ខ្ញុំដើម្បីជួយផ្លាស់ប្តូរជីវិតរបស់នរណាម្នាក់ដោយផ្តល់អត្ថន័យថ្មីដល់ស្លាកស្នាម ប្រែក្លាយចងចាំដ៏អាក្រក់ទៅជាអ្វីមួយដែលគួរឱ្យចង់មើល និងធ្វើឱ្យពួកគេស្រឡាញ់ខ្លួនឯង»។
ស្នាមសាក់របស់ ឃេលលី ពេរ៉ៃរ៉ា គឺជាគំនូរផ្កា និងពេជ្រ ដែលរំលេចលាតសន្ធឹងពីស្មាទៅកែងដៃរបស់នាងដោយបិទបាំងស្លាកស្នាមរលាកភ្លើងដែលអ្នកស្រីបន្សល់ទុកក្នុងឧបទ្ទវហេតុផ្ទះបាយកាលពីនៅតូច។
អ្នកស្រី ពេរ៉ៃរ៉ា បានរំឭកថា ម្តាយរបស់ខ្លួនកំពុងនៅកន្លែងធ្វើការហើយប្អូនស្រីមានគំនិតធ្វើម្ហូប ដោយដាក់ដុតទឹកអាល់កុលព្រោះអស់ហ្គាស។ ភ្លើងបានឆាបឆេះពេញដៃ ក ទ្រូង និងដៃរបស់ ពេរ៉ៃរ៉ា។
ក្រោយពីសាក់រួច អ្នកស្រីនិយាយថា៖ «ខ្ញុំមិនខ្មាស់ចំពោះស្លាកស្នាមរបស់ខ្ញុំទេ។ វាប្រាប់ពីរឿងរ៉ាវរបស់ខ្ញុំ។វាជាអ្វីដែលខ្ញុំបានយកឈ្នះ ហើយខ្ញុំមានមោទនភាពចំពោះវា»។
ស្ត្រីអាយុ ៣៦ ឆ្នាំរូបនេះថា រូបសាក់លើខ្លួនមិនអាចលុបអតីតកាលបាននោះទេ តែវាជា៖ «ការលើកទឹកចិត្តឱ្យក្លាហាននិយាយពីវា»៕ AFP/HR