សៀមរាប: នៅពេលព្រលឹមស្រាងៗទេសចរបរទេសបានប្រមូលផ្តុំគ្នានៅប្រាង្គបុរាណនៃប្រាសាទអង្គរវត្តរបស់ប្រទេសកម្ពុជា នាវេលាដែលភ្ញៀវមួយចំនួនមានសំណាងបានទស្សនាតំបន់បេតិកភណ្ឌពិភពលោកក្នុងសភាពពុំសូវអ៊ូអរ ខណៈដែលប្រទេសនេះកំពុងងើបពីវិបត្ដិកូវីដ ១៩។
ពន្លឺក្តីសង្ឃឹមខ្ពស់ជាមួយបរិវេណប្រាង្គប្រាសាទ ដែលទើបជួសជុលកែលម្អយ៉ាងស្រស់ស្អាតនឹងក្លាយជាភាពទាក់ទាញក្នុងការស្តារវិស័យទេសចរណ៍ឡើងវិញ បន្ទាប់ពីប្រទេសអាស៊ីអាគ្នេយ៍មួយនេះបានចាប់ផ្តើមស្វាគមន៍ភ្ញៀវទេសចរឡើងវិញ កាលពីខែវិច្ឆិកាឆ្នាំមុន។
ភ្ញៀវបរទេសមួយចំនួនកំពុងធ្វើដំណើរទៅកាន់ទីឋានដ៏ពិសិដ្ឋនេះម្តងទៀត ដោយមនុស្សជាច្រើនចាត់ទុកវេលានេះថា ជាឱកាសពិសេសមួយ។
ទេសចរបែលហ្ស៊ិក Marjan Colombie បានប្រាប់ AFP ថា៖ «ខ្ញុំគិតថា វាជាបទពិសោធ ១ ក្នុង ១ ជីវិតដែលពិតជាបានឃើញទីឋានបេតិកភណ្ឌក្នុងសភាពភ្ញៀវទេសចរតិចតួចបែបនេះ។ វាខុសគ្នាណាស់»។
អ្នកនាងបាននិយាយថា នៅពេលមកទស្សនាប្រាសាទបុរាណសតវត្សរ៍ទី១២ កន្លងមក អ្នកស្រីត្រូវបង្ខំចិត្ដដើរចោមរោមជាមួយអ្នកដទៃហើយស៊ូទ្រាំនឹងការតម្រង់ជួរដ៏វែងឆ្ងាយ។
ថ្វីដ្បិតតែខាតបង់សេដ្ឋកិច្ចដ៏ច្រើនសម្រាប់ប្រទេសកម្ពុជា ក៏ដោយ ក៏ជំងឺរាតត្បាតជាវេលាដ៏ល្អសម្រាប់ការជួសជុល និងការងារអភិរក្សនៅតំបន់ប្រាសាទអង្គរវត្ត។
ទីភ្នាក់ងាររដ្ឋាភិបាលដែលគ្រប់គ្រងតំបន់បេតិកភណ្ឌយូណេស្កូបានឱ្យដឹងថា ការបិទនេះអនុញ្ញាតឱ្យមានពេលវេលា និងទីកន្លែងបន្ថែមសម្រាប់ការងារជួសជុល ថែទាំ និងថែសួន។
លោក ឡុង កុសល អ្នកនាំពាក្យអាជ្ញាធរជាតិអប្សរាបានថ្លែងថា៖ «ប្រាសាទបុរាណរបស់យើងក៏អាចសម្រាកដែរ»។
កម្មករបានជួសជុលផ្នែកដែលបាក់ និងដំឡើងប្រព័ន្ធទឹកដើម្បីរក្សាស្មៅឱ្យមានពណ៌បៃតងនៅរដូវប្រាំង។
ធុរកិច្ចក្នុងស្រុកក្នុងខេត្តសៀមរាបពេលនេះ មានការកើនឡើងតិចតួចនៃការកក់បន្ទាប់ពីកូវីដ ១៩ បានបំផ្លាញវិស័យទេសចរណ៍។
លោក ជា សុខុន អ្នកគ្រប់គ្រងទូទៅនៃសារ៉ាយរីសត និងស្ប៉ា ដែលបានបិទកាលពីខែមេសា ឆ្នាំ ២០២០ និងបានកាត់បុគ្គលិកចំនួន ១០០ នាក់ កំពុងជ្រើសរើសបុគ្គលិក ខណៈដែលអ្នកទេសចរបរទេសត្រឡប់មកវិញ។
លោកបាននិយាយដោយដាក់ចេញនូវបញ្ហាប្រឈមដែលលោកជួបប្រទះថា៖ «វាហាក់ដូចជាយើងកំពុងចាប់ផ្តើមពីចំណុចសូន្យឡើងវិញ»។
អ្នកជំនួញដែលស្ថិតក្នុងក្រុមប្រឹក្សាទេសចរណ៍ប្រចាំខេត្តសៀមរាបរូបនេះបានបន្ដថា សណ្ឋាគារប្រហែល ២០ ភាគរយក្នុងទីក្រុងបានបើកវិញនៅឆ្នាំនេះ ហើយប្រហែល ៣០ ភាគរយកំពុងរៀបចំស្វាគមន៍ភ្ញៀវ។
ប៉ុន្តែលោកបានព្រមានថា វានឹងត្រូវចំណាយពេលយ៉ាងហោចណាស់ ១ ឆ្នាំទៀតសម្រាប់ការស្ដារ និងការងើបឡើងពេញលេញ។
មគ្គុទ្ទេសក៍ក្នុងស្រុកលោក ម៉េត សាវុត្ថា ដែលបានវិលមកកាន់អាជីពការងារវិញក្រោយចំណាយពេល ២ ឆ្នាំ បង្រៀនភាសាអង់គ្លេសតាមអ៊ីនធឺណិត ដើម្បីផ្គត់ផ្គង់គ្រួសារបាននិយាយថា៖ «មគ្គុទ្ទេសក៍ទេសចរណ៍របស់យើងមានសង្ឃឹមម្តងទៀត»។
ការបិទព្រំដែននិងការរឹតបន្តឹងការធ្វើដំណើរបានធ្វើឱ្យប្រាក់ចំណូលរបស់កម្ពុជាពីវិស័យទេសចរណ៍ធ្លាក់ចុះមកត្រឹមតែ ១៨៤ លានដុល្លារ កាលពីឆ្នាំមុនជាចំនួនចុះខ្លាំងពីជិត ៥ ពាន់លានដុល្លារ ក្នុងឆ្នាំ ២០១៩។
ភ្ញៀវទេសចរបរទេសបានធ្លាក់ចុះមកក្រោម ២០ ម៉ឺននាក់នៅក្នុងឆ្នាំ ២០២១ ពីប្រហែល ៦,៦ លាននាក់ មុនការរាតត្បាត។ ប៉ុន្តែការចាក់វ៉ាក់សាំងដ៏ទូលំទូលាយ និងការថយចុះនៃករណីឆ្លងវីរុសបានធ្វើឱ្យរដ្ឋាភិបាលរាជធានីភ្នំពេញអាចបន្តការចេញទិដ្ឋាការនៅពេលមកដល់។
ឥឡូវនេះចំនួនភ្ញៀវទេសចរកំពុងកើនឡើងយឺតៗសាជាថ្មី ប៉ុន្តែដំណើរវិវឌ្ឍន៍គឺជាផ្លូវដ៏វែងឆ្ងាយសម្រាប់តួលេខមុនវិបត្តិកូវីដសកល។
មន្ត្រីរំពឹងថា នឹងមានភ្ញៀវអន្តរជាតិចំនួន ៧០ ម៉ឺននាក់នៅឆ្នាំនេះ ដែលជំរុញដោយជើងហោះហើរប្រចាំថ្ងៃថ្មីទៅកាន់ខេត្តសៀមរាបពីសិង្ហបុរី។
សម្រាប់ភ្ញៀវទេសចរជនជាតិអាល្លឺម៉ង់ ហាន់ណា ដែលបានមកទស្សនាប្រទេសកម្ពុជា ជាលើកដំបូងក្នុងខែនេះ ថ្លែងថា ការជួសជុលប្រាសាទអង្គរវត្ត និងភ្ញៀវពុំសូវអ៊ូអរ គឺជាបទពិសោធ «ដ៏លើសលប់»។
អ្នកស្រីបានប្រាប់ AFP នៅពេលព្រះអាទិត្យរះលើសំណង់ប្រវត្តិសាស្ត្រថា៖ «វាពិតជាស្រស់ស្អាត និងគួរឱ្យភ្ញាក់ផ្អើល។ វាគ្រាន់តែជាបទពិសោធដ៏ពិសេសមួយ»៕ AFP/HR