ក្រុងឡាអេ: ប្រទេសហូឡង់ កាលពីសប្ដាហ៍មុន ទើបតែបើកដំណើរការឧបករណ៍រាយការណ៍តាមអ៊ីនធឺណិតថ្មីមួយ ដើម្បីការពារអ្នករកស៊ីផ្លូវភេទពីអតិថិជនដ៏គ្រោះថ្នាក់ ក្នុងចលនាដែលគាំទ្រដោយក្រសួងយុត្តិធម៌របស់ប្រទេសនេះ ដើម្បីកែលម្អសុវត្ថិភាពនៅក្នុងឧស្សាហកម្មភ្លើងក្រហម។
«Ugly Mugs NL» គឺជាប្លែតហ្វមអនឡាញមួយបង្កើតឡើងដោយមូលនិធិរបស់ប្រទេសហូឡង់ ដើម្បីប្រយុទ្ធប្រឆាំងនឹងជំងឺកាមរោគ និងជំងឺអេដស៍ (SOA AIDS) និងសហភាពអ្នករកស៊ីផ្លូវភេទហូឡង់។
គេហទំព័រ Ugly Mugs NL បានឱ្យដឹងថា៖ «នៅលើប្លែតហ្វមនេះអ្នករកស៊ីផ្លូវភេទអាចប្រាប់គ្នាទៅវិញទៅមកអំពីភ្ញៀវកាច និងគ្រោះថ្នាក់»។
គេហទំព័របានបន្ដថា៖ «ក្នុងនាមជាអ្នករកស៊ីផ្លូវភេទ អ្នកអាចប្រើប្លែតហ្វមនេះ ដើម្បីពិនិត្យមើលអតិថិជនថ្មី។ អ្នកក៏អាចទទួលបានការជូនដំណឹងនៅពេលដែលអតិថិជនដ៏គ្រោះថ្នាក់កំពុងស្ថិតនៅក្នុងតំបន់់អ្នកផងដែរ»។
គេហទំព័រនេះក៏អាចជួយអ្នករកស៊ីផ្លូវភេទឱ្យរាយការណ៍អំពីការរំលោភបំពានដល់ប៉ូលិសថែមទៀត។
ការស្រាវជ្រាវដោយ SOA AIDS និង PROUD ជាអង្គការធំជាងគេតំណាងឱ្យអ្នករកស៊ីផ្លូវភេទបានបង្ហាញថា ៩៧ ភាគរយនៃអ្នករកស៊ីផ្លូវភេទទាំងអស់នៅប្រទេសហូឡង់ បានជួបប្រទះនឹងអំពើហិង្សា។
របាយការណ៍ ៤៩ ទំព័រ ដែលបានចេញផ្សាយនៅក្នុងឆ្នាំ ២០១៨ បានបង្ហាញថា ៧៨ ភាគរយបានរងនូវអំពើហិង្សាផ្លូវភេទ ៦០ ភាគរយនៃអំពើហិង្សាលើរាងកាយ និង ៥៨ ភាគរយ អំពើហិង្សាផ្នែកហិរញ្ញវត្ថុនៅពេលដែលអតិថិជនលួចលុយរបស់ពួកគេ ឬបដិសេធមិនបង់ប្រាក់់សេវាកម្ម។
ការសិក្សាដែលមានអ្នករកស៊ីផ្លូវភេទជាង ៣០០ នាក់ បានចូលរួម និងត្រូវបានផ្តល់មូលនិធិដោយក្រសួងយុត្តិធម៌ហូឡង់បានឱ្យដឹងថា៖ «ជនល្មើសនៃអំពើហិង្សាលើអ្នករកស៊ីផ្លូវភេទ គឺជាអតិថិជន ដែលបង្កជាអំពើហិង្សាគ្រប់ទម្រង់»។
ប្រទេសហូឡង់ បានធ្វើឱ្យពេស្យាកម្មស្របច្បាប់ក្នុងឆ្នាំ ២០០០ ហើយអ្នករកស៊ីផ្លូវភេទត្រូវចុះឈ្មោះជាមួយសភាពាណិជ្ជកម្មក្នុងតំបន់ និងបង់ពន្ធលើប្រាក់ចំណូល។
សង្កាត់ភ្លើងក្រហមរបស់ទីក្រុងអាំស្ទែ៊រដាំ ដែលភាសាហូឡង់ហៅថា «De Wallen» គឺជាតំបន់ទេសចរណ៍ដ៏សំខាន់មួយរបស់ប្រទេសសម្បូរផ្លូវទឹកមួយនេះ៕ AFP/HR