ភ្នំពេញ: អង្គុយក្នុងបរិវេណបន្ទប់ស្ទើរតែរើខ្លួនមិនរួច ដៃទាំងគូកំពុងមមាញឹកផ្ចង់ចុងម្ជុរចាក់ប្រទាក់ក្រឡាបង្កើតជារូបរាងតុក្កតាតូចៗ អ្នកស្រី សុខ ញ៉ី មានការសប្បាយរីករាយ ដែលទទួលការកុម្ម៉ង់ផលិតតុក្កតាក្រពើចំនួន ១០ សម្រាប់អតិថិជន។
ស្ថិតនៅលើផ្ទះល្វែងជាន់ទី៣ ក្នុងសង្កាត់បឹងកេងកេងទី២ ម្ដុំអតីតរោងកុនគិរីរម្យស្ដ្រីវ័យ ៥៦ ឆ្នាំរូបនេះ ពឹងអាស្រ័យលើមុខរបរដេរសម្ភារផ្សេងៗសម្រាប់ផ្គត់ផ្គង់ជីវភាពជាមួយការខិតខំប្រវេប្រវាឱ្យកូនស្រីទាំង ២ មើលឃើញពន្លឺជីវិតនាពេលអនាគត។
អ្នកស្រី សុខ ញ៉ី បានប្រាប់ ភ្នំពេញ ប៉ុស្ដិ៍ នៅក្នុងផ្ទះដំបូលលិចធ្លុះធ្លាយថា៖ «បន្ទុកគ្រួសារនៅលើខ្ញុំទាំងអស់។ បើខ្ញុំមិនធ្វើ ដោយចាញ់នឹងស្ថានភាពសុខភាពទ្រុឌទ្រោមខ្ញុំប្រាកដជាអត់អង្ករដាំបាយមិនខាន»។
អ្នកស្រី ញ៉ី ដែលត្រូវរត់ទៅជ្រកផ្ទះអ្នកជិតខាងពេលមានភ្លៀងធ្លាក់ម្ដងៗបានរំឭកគុណអ្នកស្រី កាណារី ឱ្យខ្លួនបានក្លាយជាសមាជិកម្នាក់ផងនោះបានឱ្យដឹងថា កូនស្រីទាំង ២ ដែលម្នាក់កំពុងរៀនពេទ្យ និងម្នាក់ទៀតជាអ្នកបកប្រែភាសាអង់គ្លេសមានចំណេះដឹង និងមានការងារធ្វើដោយសារតែការជួយជ្រោមជ្រែងពីស្ថាបនិកក្រុមគាំទ្រស្ដ្រីកម្ពុជា (CWSG)។
ក្រុមគាំទ្រស្ដ្រីកម្ពុជា ដែលត្រូវបានបង្កើតឡើងក្នុងឆ្នាំ ២០១៥ ដោយអ្នកស្រី គី កាណារី គឺជាអាជីវកម្មកាត់ដេរសង្គមតូចមួយ ដែលចាប់យករបរដេរសម្ភារប្រើប្រាស់ វត្ថុអនុស្សាវរីយ៍ និងតុក្កតាក្មេងលេងសម្រាប់ទ្រទ្រង់ជីវភាពរបស់ខ្លួន។
ក្រុមស្ដ្រីនេះ ដែលមានសមាជិក ១៥ នាក់ រស់នៅក្នុងតំបន់ផ្សេងៗនៃរាជធានីភ្នំពេញ ត្រូវបានចងក្រងឡើងដើម្បីផ្ដល់អំណាចស្វ័យភាពក្នុងការផ្គត់ផ្គង់ជីវភាពខ្លួនឯង។
អ្នកស្រី កាណារី បានប្រាប់ ភ្នំពេញ ប៉ុស្ដិ៍ថា៖ «វាមិនត្រឹមតែជាការសម្រួលដល់ពួកគេឱ្យសមាហរណកម្មសង្គមឡើងវិញប៉ុណ្ណោះទេ ប៉ុន្ដែវាថែមទាំងផ្ដល់នូវបរិយាកាសដែលក្រុមស្ដ្រីអាចចែករំលែកបទពិសោធ មហិច្ឆតាក្ដីសុបិន និងក្ដីកង្វល់ ដើម្បីលើកកម្ពស់ភាពថ្លៃថ្នូរជំនឿចិត្ដនិងក្ដីសង្ឃឹម»។
ស្ដ្រីដែលស្ថិតក្នុងក្រុម CWSG មានប្រភពចេញមកពីអ្នកទទួលការបណ្ដុះបណ្ដាលជំនាញនៅអង្គការនីញ៉េម៉ូកម្ពុជា (Nyemo Cambodia) ដែលផ្ដោតលើការបង្រៀនសិល្បៈនៃការដេរ និងសិប្បកម្មដើម្បីទទួលបានការងារក៏ដូចជាការបង្រៀនបំណិនជីវិត។
អ្នកស្រី កាណារី បានឱ្យដឹងថា កម្មវិធីអង្គការនីញ៉េម៉ូ មើលឃើញថា ក្រុមស្ដ្រីទាំងនេះជាជនស្ថិតក្នុងស្ថានភាពងាយរងគ្រោះ រួមទាំងអ្នករស់នៅជាមួយវិបត្ដិសុខភាព ដូចជា អ្នកផ្ទុកវីរុសហ៊ីវ ឬជំងឺអេដស៍ អ្នកអវិជ្ជា បរិស្ថានផ្ទះមិនមានសុវត្ថិភាព និងការបែកបាក់គ្រួសារ។
អ្នកស្រី ញ៉ី បានរំឭកថា៖ «កាលជំនាន់អង្គការនីញ៉េម៉ូត្រូវបានរំសាយ ស្ដ្រីក្នុងសមាជិកអង្គការនេះ អស់ការងារសម្រាប់ផ្គត់ផ្គង់ជីវភាព។ ខ្ញុំរសាត់អណ្ដែតទៅស៊ីឈ្នួលជូតផ្ទះ និងបោកខោអាវ ទម្រាំត្រូវបានស្ថាបនិកក្រុមស្ដ្រី CWSG បានប្រមូលអតីតក្រុមស្ដ្រីខ្វះខាតចងក្រងជាក្រុម CWSG»។
ជាអតីតសមាជិកម្នាក់ រស់នៅលើបឹងកំប្លោក ក្រោយអតីតរោងចក្រទឹកដោះគោ ស្ថិតក្នុងសង្កាត់ទួលសង្កែ ខណ្ឌឫស្សីកែវ ជាមួយកូនស្រីម្នាក់ និងកូនប្រសា ក៏ដូចជាចៅ ២ នាក់ អ្នកស្រី កង យ៉ារី អាយុ ៤៩ ឆ្នាំ បានចាកចេញទៅធ្វើការឱ្យហាងវាំងននមួយ។
អ្នកស្រីបាននិយាយថា៖ «ដល់ពេលហាងវាំងនននោះ ពិបាកបើកប្រាក់ខែ ដោយថៅកែជំពាក់ប្រាក់ពួកខ្ញុំ ស្ថានភាពជីវភាពកាន់តែលំបាក។ បង កាណារី បានហៅខ្ញុំចូលក្រុមស្ដ្រី CWSG។ ប៉ុន្ដែដោយសារមិនសូវមានភ្ញៀវកុម្ម៉ង់ច្រើន យើងមានការងារធ្វើតេះតោះតិចតួចប៉ុណ្ណោះ»។
អ្នកស្រី កាណារី បានបន្ដធ្វើការជាមួយដៃគូអតីតអង្គការនីញ៉េម៉ូកម្ពុជា ដោយពួកគេបន្ដបញ្ជាទិញផលិតផលធ្វើដោយដៃពីក្រុមស្ដ្រី។
អ្នកស្រី កាណារី បានបញ្ជាក់ថា៖ «ដូច្នេះនោះជាមូលហេតុដែលយើងនៅទីនេះ ដើម្បីបម្រើសេវាកម្មដេរដោយដៃរបស់យើងសម្រាប់អតិថិជនជាតិ និងអន្ដរជាតិ»។
សិប្បកម្ម CWSG ផ្ដល់ឱ្យអតិថិជននូវសេវាកម្មកាត់ដេរតាមការកុម្ម៉ង់ដែលមានគុណភាពខ្ពស់ដូចជា វត្ថុអនុស្សាវរីយ អំណោយ កាដូអាពាហ៍ពិពាហ៍ តុក្កតា សម្លៀកបំពាក់សាមញ្ញៗ ផលិតផលតុបតែងផ្ទះសម្បែង រួមមាន វាំងនន ស្រោមខ្នើយ ភួយ កម្រាលពូក កាបូប កាបូបដៃ កម្រាលតុ និងកន្សែងដៃជាដើម។
ស្ថាបនិកក្រុមស្ដ្រី CWSG បានឱ្យដឹងថា៖ «ផលិតផលដែលពេញនិយមបំផុតសម្រាប់អតិថិជន រួមមានបាល់ចាក់ភ្ជាប់កន្ដឹងរចនាពីលេខ ១ ដល់ ១២ ជាអក្សរខ្មែរ និងព្យព្ជានៈអង់គ្លេស ខ្សែមេអំបៅ ដំរី ខ្លាឃ្មុំ ដាយណូស័រ កាបូប ខ្នើយ និងស្រោមខ្នើយ ក៏ដូចជាគ្រឿងតុបតែងរាងកាយស្ដ្រី ដូចជា ម៉ាស់បិទភ្នែក និងតង្កៀបកៀបសក់ជាដើម»។
ផលិតផលភាគច្រើនពីសិប្បកម្ម CWSG ដែលមានកិច្ចសហការជាមួយ Cambodia Knits ក្នុងនាមជាអ្នកផលិតកាបូប និងលក់ផលិតផលនៅហាង CK ត្រូវបានដាក់លក់នៅក្នុងប្រទេស តែពេលនេះមានភ្ញៀវបរទេស ដែលមកលេងកម្ពុជាក៏ដូចជាជនបរទេសបានទិញផលិតផលតាមអនឡាញផងដែរ។
យ៉ាងណាមិញ ការគាំទ្រពីអតិថិជនក្នុងស្រុកនៅមិនទាន់ជួយឱ្យក្រុមស្ដ្រី ១៥ នាក់ ពឹងអាស្រ័យលើរបរសិប្បកម្មដេរនេះបាននោះទេ។
អ្នកស្រី ញ៉ី បន្ដថា៖ «វាពិបាកក្នុងការប៉ាន់ប្រមាណណាស់ ដោយសារការងារទទួលបានមិនសូវទៀងទាត់។ ១ សប្ដាហ៍ បានចន្លោះ ៥ ម៉ឺន ទៅ ១០ ម៉ឺនរៀល សម្រាប់ទិញអង្ករ ១០-២០ គីឡូក្រាមទុកអ៊ីចឹងទៅ»។
សព្វថ្ងៃ ក្រុមគាំទ្រស្ដ្រីកម្ពុជា CWSG បានសហការជាមួយ Only One Planet, Cambodia Knits, Daiou Bag, Modimade, Fair Fashionista, Faire Trendy និង ALMA-M ក្នុងនាមជាអ្នកផលិតនូវផលិតផល។
Nomi Network បានជួយបណ្ដុះបណ្ដាលទិចនិកដេរដល់ពួកគេ ខណៈ SHE Investment បានជួយលើបណ្ដាញសហគ្រិនភាព។
អ្នកស្រី កាណារី បានលើកឡើងថា រាល់ការគាំទ្ររបស់អតិថិជនអាចជួយស្ដ្រីស្វែងរកចំណូលសម្រាប់ចំណាយលើការថែទាំសុខភាព និងបញ្ជូនកូនៗទៅសាលារៀន។ លើសពីនេះ វាបានជួយដល់ស្ដ្រីខ្វះលទ្ធភាពមានការរាប់អានមិត្ដភក្ដិ និងផ្លាស់ប្ដូរបទពិសោធជាវិជ្ជមាន ក៏ដូចជាការអភិវឌ្ឍ និងធ្វើឱ្យប្រសើរឡើងនូវជំនាញដេរដើម្បីធានាគុណភាពខ្ពស់។
អ្នកស្រី យ៉ារី កំពុងទទួលការកុម្ម៉ង់ដេររូបតុក្កតាម៉ូដថ្មីទេពអប្សរបានបន្ដថា៖ «សូមសំណូមពរដល់អតិថិជនក្នុងស្រុកជួយកុម្ម៉ង់ពីក្រុមស្ដ្រី CWSG ដើម្បីឱ្យពួកយើងមានការងារធ្វើ សម្រាប់ផ្គត់ផ្គង់ជីវភាពគ្រួសារ»។
អ្នកស្រី ញ៉ី បានបន្ទរថា៖ «បើមានភ្ញៀវក្នុងស្រុកកុម្ម៉ង់ច្រើនថេរអ៊ីចឹងទៅ ពួកខ្ញុំនឹងបានរកលុយគ្រាន់ទិញអង្ករអ៊ីចឹងខ្លះ។ បើអត់សូវសម្បូរការងារ ពួកខ្ញុំទៅរកតែអ្នកគ្រូ កាណារី ខ្ចីលុយទិញអង្ករទុកហូប។ ពេលមានអីវ៉ាន់កុម្ម៉ង់អ៊ីចឹងទៅ គាត់កាត់លុយពីពួកខ្ញុំតិចៗ ដោយមិនកាត់ម្ដងទាំងអស់នោះទេ ពីព្រោះគាត់អាណិតពួកខ្ញុំ។
ព័ត៌មានបន្ថែមមាននៅទំព័រហ្វេសប៊ុក @cwsghandicraft ឬ www.womensewandcreate.org៕