ក្រុងវេនិក: មន្ត្រីម្នាក់បានឱ្យដឹងថា ទីក្រុងវេនិកគ្រោងនឹងសាកល្បងប្រព័ន្ធកក់ទុកសម្រាប់អ្នកធ្វើដំណើរពេលថ្ងៃបំណងជួយសម្រួលបញ្ហាទេសចរណ៍ ខណៈដែលភ្ញៀវទេសចរសម្រុកទៅលេងទីក្រុងអ៊ីតាលីវិញ បន្ទាប់ពីជំងឺរាតត្បាតថមថយ។
គម្រោងបង់ប្រាក់ទស្សនានឹងមិនកំណត់ចំនួនភ្ញៀវទេសចរទេ ប៉ុន្តែមានបំណងទាក់ទាញមនុស្សមួយចំនួនឱ្យមកលេងក្នុងរដូវមិនសូវសម្បូរភ្ញៀវដោយគិតប្រាក់តិចជាងមុន។
លោក Simone Venturini ទីប្រឹក្សារងផ្នែកទេសចរណ៍របស់ទីក្រុងវេនិក បានប្រាប់ AFP ថា៖ «យើងនឹងចាប់ផ្តើមជាមួយដំណាក់កាលពិសោធន៍មួយក្នុងអំឡុងពេលដែលមិនត្រូវឱ្យមានការកក់ទុកជាមុនតែការកក់ គឺជាជម្រើសដែលនឹងមិនចំណាយប្រាក់អ្វីឡើយ»។
លោកបាននិយាយថា ភ្ញៀវដែលចូលទស្សនាក្នុងថ្ងៃនេះ នឹងត្រូវបានលើកទឹកចិត្តឱ្យចុះឈ្មោះតាមរយៈការលើកទឹកចិត្តមួយចំនួន «ដូចជាការបញ្ចុះតម្លៃលើការចូលទស្សនាសារមន្ទីរ»។ កាលបរិច្ឆេទចាប់ផ្តើមប្រព័ន្ធសាកល្បងនេះ នឹងត្រូវប្រកាសនៅក្នុងសប្តាហ៍ខាងមុខនេះ។
កាតព្វកិច្ចនៅក្នុងឆ្នាំ ២០២៣ នឹងតម្រូវឱ្យអ្នកធ្វើដំណើរពេលថ្ងៃត្រូវបង់ប្រាក់ប្រមាណពី ៣ ដុល្លារ ទៅ ១០ ដុល្លារអាស្រ័យលើរដូវកាល។
ភ្ញៀវគេងនៅទីក្រុងវេនិក ដែលត្រូវជាប់ពន្ធទេសចរណ៍រួចហើយនឹងត្រូវបានលើកលែង។
ជីវិតរស់នៅរបស់អ្នកក្រុងទឹកដ៏ពេញនិយមមួយនេះ បាននិងកំពុងវិលមករកភាពប្រក្រតីវិញបន្តិចម្តងៗក្រោយវិបត្ដិជំងឺរាតត្បាតពេលដែលបណ្ដាញផ្លូវទឹក Grand Canal អត់ទូកចែវក្រោយអវត្តមានភ្ញៀវទេសចរ។
លោក Venturini បាននិយាយថា ចុងសប្តាហ៍បុណ្យ Easter បានទាក់ទាញភ្ញៀវយ៉ាងច្រើនដោយ ១០ ម៉ឺននាក់បានស្នាក់នៅ និងប្រហែល ៤ ម៉ឺននាក់ផ្សេងទៀតមកអើតតែ ២-៣ ម៉ោងនៅ St. Marks ឬនៅ Bridge of Sighs៕ AFP/HR