.jpg)
សាឡនសម្រាប់អ្នកសក់រួញមានតម្លៃសេវាកម្មថ្លៃជាងសាឡនធម្មតា។ រូបថត AFP
ក្រុងគែរ: «កន្ទ្រីងកន្ទ្រើង» «វែងសំពោង» និង «គ្មានសណ្ដាប់ធ្នាប់»។ សក់រួញបែបធម្មជាតិធ្លាប់ត្រូវបានមើលងាយមើលថោកនៅក្នុងអេហ្ស៊ីបជាប្រទេសដែលពេញនិយមសម្រស់ស្តង់ដាបែបលោកខាងលិចនូវប្រភេទសក់ត្រង់ស្លូត និងភ្លើងរលោង។ ឥឡូវនេះ អ្វីៗកំពុងផ្លាស់ប្តូរហើយ។
សម្រាប់ Rola Amer និង Sara Safwat សក់រួញរបស់ពួកគេធ្លាប់ជាជាឧបសគ្គក្នុងការរកការងារធ្វើ។ ឥឡូវនេះវាជាផ្នែកមួយនៃចលនាទទួលស្គាល់សម្រស់ និងភាពជាខ្លួនឯង ដែលចាប់ផ្ដើមកក្រើកនៅអេហ្ស៊ីបក្នុងរយៈពេលប៉ុន្មានឆ្នាំចុងក្រោយនេះ ជាមួយវត្តមានហាងសាឡនមានជំនាញកាត់ និងថែទាំសក់រួញ។
អ្នកនាង Amer ធ្លាប់ចំណាយពេលជាច្រើនម៉ោងដើម្បីអ៊ុតសក់ត្រង់មុនពេលនាងចាប់ផ្តើមធ្វើការនៅ Curly Studio ដែលបានក្លាយជាហាងសាឡនសក់ធម្មជាតិដំបូងគេរបស់ប្រទេសអេហ្ស៊ីប ក្នុងឆ្នាំ ២០១៨។
ដោយយកដៃកាន់សក់រួញរបស់អតិថិជននៅជាយក្រុងគែរ Amer បាននិយាយថា៖ «សក់រួញត្រូវការពេលកាត់យូរជាងសក់ត្រង់»។
៣ ម៉ោងក្រោយមក ទីបំផុតនាងអាចបង្ហាញលទ្ធផលដល់អតិថិជនហើយអ្នកទាំង ២ សប្បាយចិត្ត ខណៈដែលសាឡននេះមានភ្ញៀវច្រើននៅជុំវិញ។
វាជារឿងមួយផ្ទុយស្រឡះពីបទពិសោធផ្ទាល់ខ្លួនរបស់ Amer កាលពីប៉ុន្មានឆ្នាំមុន ដោយនាងបានរំឭកថា៖ «ប្រសិនបើខ្ញុំទុកសក់រួញសំពោងនោះគេមើលមកខ្ញុំថា ខ្ញុំខ្ជិល ឬខ្ញុំដូចអត់ចេះថែខ្លួនឯងអីសោះ»។
រីឯអ្នកស្រី Safwat អាយុ ៣៨ ឆ្នាំបានពន្យល់ពីគ្រោះថ្នាក់នៃការអ៊ុតសក់ត្រង់ ខណៈដៃរបស់អ្នកស្រីផ្ចិតផ្ចង់កាត់សក់រួញសំពោងរបស់ភ្ញៀវ។
អ្នកស្រីរំឭកថា៖ «ធ្លាប់មានម្តាយម្នាក់បាននាំកូនស្រីអាយុ ៣ ឆ្នាំមកអ៊ុតសក់ត្រង់។ ផលអាក្រក់គឺវាប៉ះពាល់ដល់ស្បែក និងនាំឱ្យជ្រុះសក់»។
តារាបណ្ដាញសង្គមអ៊ីស្តាក្រាម Mariam Ashraf កំពុងមានទីផ្សារ ដោយសារទំនោរនិយមសក់រួញនៅអេហ្ស៊ីប។ រូបថត AFP
ការឈ្លក់វង្វេងនឹងសក់ត្រង់ដែលមានឫសគល់នៃ «ការនិយមសម្រស់ក្លែងក្លាយ» បានបង្ខំស្ត្រីជំនាន់ក្រោយឱ្យកម្ទេចសក់របស់ពួកគេដោយការប្រើជាតិគីមី និងកម្ដៅខ្លាំងពេក។
ក្នុងឆ្នាំ ២០១២ តារាសម្តែងជនជាតិអេហ្ស៊ីប Dina el-Sherbiny បានក្លាយជាមនុស្សដំបូងគេដែលបំបែកការមាក់ងាយនៅមុខកាមេរ៉ាដោយបង្ហាញសក់រួញពណ៌ត្នោត។
១០ ឆ្នាំក្រោយមករូបភាពសក់រួញដែលត្រូវបានមើលឃើញកាន់តែ ច្រើនក្នុងកម្មវិធីទូរទស្សន៍ភាពយន្ត និងផ្ទាំងប៉ាណូតាមដងវិថីហាយវេក្រុងគែរ ដែលជាការផ្លាស់ប្តូរគួរឱ្យកត់សម្គាល់នៅក្នុងវប្បធម៌ប៉ុបអេហ្ស៊ីប។
ប៉ុន្តែតម្លៃនៃការថែទាំសក់ធម្មជាតិលើសសមត្ថភាពអ្នកខ្សត់ខ្សោយ។
ខណៈប្រាក់ចំណូលជាមធ្យមប្រចាំខែនៅក្នុងប្រទេសអេហ្ស៊ីប គឺ ៣២៥ ដុល្លារ ការកាត់សក់នៅសាឡនសក់រួញ Curly Studio ត្រូវចំណាយរហូតដល់ ១ ភាគ ១០ នៃទឹកប្រាក់នោះ។
គ្រូបង្រៀន និងតារាអ៊ីនស្តាក្រាម វ័យ ២៦ ឆ្នាំ Mariam Ashraf បានផលច្រើនពីការនិយមសក់ធម្មជាតិនេះ។
នាងបានប្រាប់ AFP មុនពេលថតវីដេអូឃ្លីបថ្មីឱ្យអ្នកតាមដានជាង ៩ ម៉ឺននាក់់ថា៖ «ទីភ្នាក់ងារបង្ហាញម៉ូដ និងយីហោនានាកំពុងទាក់ទងមកខ្ញុំកាន់តែច្រើនឡើង ដើម្បីផ្សាយផលិតផលសក់រួញអង្កាញ់។»៕ AFP/HR
