ក្រុងបាងកក: អំពូលភ្លើង និងចង្កៀងតាមចិញ្ចើមផ្លូវបានបំភ្លឺដល់ឆាកប្រយុទ្ធរវាងបុរសអត់ពាក់អាវ ២ នាក់ ខណៈហ្វូងមនុស្សបានស្រែកបន្លឺឡើងនៅក្រោមស្ពានអាកាសទីក្រុងបាងកក។ ក្លិបប្រយុទ្ធថៃ (Fight Club Thailand) បើកហើយ» ខណៈការប្រកួតក្បាច់គុននេះមានលក្ខណៈប្រហាក់ប្រហែលនឹងការប្រដាល់ដ៏ជក់ចិត្តមួយ សង្វៀន ដែលហ៊ុមព័ទ្ធដោយទូកុងតឺន័រដឹកជញ្ជូននៅក្នុងបរិវេណក្បែរកំពង់ផែដ៏ក្រីក្រមានការខុសប្លែកគ្នាស្រឡះពីតថភាពប្រដាល់ក្បាច់មួយថៃ។
សហស្ថាបនិកក្លិប ឆាណា វូរ៉ាសាតបានប្រាប់ទីភ្នាក់ងារព័ត៌មាន AFP ថា៖ «នៅទីនេះអ្នកមិនចាំបាច់ដឹងពីរបៀបប្រយុទ្ធទេ។ អ្នកគ្រាន់តែត្រូវការបេះដូងវាជាការស្រេច»។
យុវជនវ័យ ៣០ ឆ្នាំរូបនេះ បានបង្កើតក្លិបនៅឆ្នាំ ២០១៦ ដែល ១ ផ្នែកត្រូវបានបំផុសគំនិតដោយខ្សែភាពយន្តរបស់ ប្រេដ ភីត ដើម្បីឱ្យអ្នកប្រយុទ្ធមិនមែនអាជីពសាកល្បងជំនាញរបស់ពួកគេ ឬគ្រាន់តែបញ្ចេញកំហឹងរបស់ខ្លួន ១ គ្រា។
លោកថា៖ «ខ្ញុំគិតថា វាមានប្រជាប្រិយភាព ដោយសារពួកគេមានក្បាច់ប្រយុទ្ធប្លែកៗទៅតាមចិត្ដចង់ ដែលខុសពីអ្នកប្រដាល់អាជីព»។
នោះហើយគឺជាភាពទាក់ទាញសម្រាប់កីឡាករ និងជាម្ចាស់ហាងលក់គ្រឿងទេសអាយុ ២៣ ឆ្នាំ លោក សារ៉ាថាត់ សាគុលឆូ។
លោកបានប្រាប់ AFP ថា៖ «វាខុសគ្នាឆ្ងាយណាស់ពីប្រដាល់បែបប្រពៃណីដោយការលុបបំបាត់ និងកាត់បន្ថយការពិន័យចំពោះការប្រើប្រាស់អវយវៈទាំង ៤»។
លើសពីនេះលោក សារ៉ាថាត់ បានបន្ថែមថា៖ «ការប្រយុទ្ធដោយមានកុងតឺន័រជុំវិញ ពិតជាផ្ដល់ការសប្បាយរីករាយ និងគួរឱ្យរំភើប»។
ក្លិបប្រយុទ្ធដែលមានមូលដ្ឋាននៅទីក្រុងបាងកក បានហៅខ្លួនឯងថា «សង្វៀនដែលនឹងផ្លាស់ប្តូរអំពើហិង្សាទៅជាមិត្តភាព»។
ក្លិបទទួលបានការចាប់អារម្មណ៍ ដោយប្រមូលផ្តុំសមាជិកហ្វេសប៊ុក ៧៣ ០០០ នាក់ ជាការផ្សព្វផ្សាយតៗគ្នាអំពីការប្រកួតមិនផ្លូវការនេះ។
អ្នកប្រដាល់ត្រូវបានអនុញ្ញាតឱ្យប្រឹងឱ្យអស់លទ្ធភាពក្នុង ១ ទឹកដែលមានរយៈពេល ៣ នាទី ដោយមិនមានការប្រកាសអ្នកឈ្នះ ឬអ្នកចាញ់នោះទេ ប៉ុន្តែការប្រកួតមិនត្រូវបានរារាំងអ្វីឡើយ។
អាជ្ញាធរត្រូវបានជូនដំណឹងកាលពីឆ្នាំ ២០១៦ អំពីការប្រកួតខុសច្បាប់នេះ ដែលចោទប្រកាន់ថា បានបំពានច្បាប់ប្រដាល់ជាមួយការផ្តន្ទាទោសដាក់ពន្ធនាគារ ១ ឆ្នាំ និងពិន័យជាប្រាក់ប្រហែល ៦០០ ដុល្លារ ប៉ុន្តែទោះបីជាមានប៉ូលិសឆ្មក់ម្ដងម្កាល ក៏ដោយក៏ការប្រយុទ្ធនៅតែបន្ត។
ជាមួយគ្នានេះ ក្លិបទទូចថា វាមិនត្រូវបានគ្រប់គ្រងដោយច្បាប់ប្រដាល់ទេ ហើយសហស្ថាបនិក ឆាណា បាននិយាយថាក្រុមនេះត្រូវបានអនុញ្ញាតដោយមន្ទីររដ្ឋបាលខេត្ត។
លោកអះអាងថា៖ «ខ្ញុំមិនជំទាស់នឹងគំនិតប្រែក្លាយការប្រកួតនេះទៅជាប្រដាល់ត្រូវបានអនុញ្ញាតតាមផ្លូវច្បាប់នោះទេ។ ប៉ុន្តែជាមួយគ្នានេះយើងក៏មិនគួរបាត់បង់អត្តសញ្ញាណការប្រយុទ្ធលួចលាក់ដែរ។ ដូច្នេះសំណួរសួរថា តើតុល្យភាពនៅឯណា?»។
ដោយទទូចថា ការប្រយុទ្ធមិនបង្ខំឱ្យដៃគូស៊ីសាច់ហុតឈាមគ្នា អ្នកប្រដាល់ស្ម័គ្រចិត្តបរទេស អ៊ីលយ៉ា អូស្ដ្រូសឈិនកូ ផ្គុំដៃឡើងលើទាំងអារម្មណ៍បុកពោះកណ្ដាលសង្វៀន។
ប៉ុន្តែយុវជនរុស្ស៊ី អាយុ ២២ ឆ្នាំរូបនេះបាននិយាយថា៖ «ដៃរបស់ខ្ញុំញ័រ ជង្គង់របស់ខ្ញុំក៏ញ័រដែរ ប៉ុន្តែនៅពេលដែលខ្ញុំឡើងដល់កណ្ដាលសង្វៀន ខ្ញុំមានអារម្មណ៍ល្អ»៕ AFP/HR