ក្រុងយ៉ាមូស៊ូក្រូ៖ លោក អាហ្ស៊ីស អាលីបៃ កំពុងបង្ហាញអ្នកទស្សនានូវក្តីស្រឡាញ់ដ៏ធំរបស់ខ្លួនជាការប្រមូលផ្ដុំនៃខ្មោចយន្តហោះដ៏គួរឱ្យភ្ញាក់ផ្អើល ដែលលោកចង់ប្រែក្លាយទៅជាកន្លែងទាក់ទាញទេសចរណ៍ដ៏ប្លែកភ្នែក។
លោកនិយាយថា៖ «នោះជា DC-10 នៅក្បែរវាអ្នកមាន Fokker 28 នៅទីនោះមាន Boeing 737s ... »។
យន្ដហោះ ដែលស្ថិតក្នុងសភាពទ្រុដទ្រោមនៅលើបរិវេណដីរបស់លោក នៅទីក្រុង សុនហ្គូន ចន្លោះព្រៃ និងបឹងប្រហែល៣០គីឡូម៉ែត្រ ពីរដ្ឋធានីសេដ្ឋកិច្ច អាប៊ីដចាន់ របស់កូតឌីវ័រ។
ប៉ុន្តែលោក អាលីបៃ ជាសហគ្រិនដែលមានភាពស្មោះត្រង់។ ក្នុងវ័យ៧០ឆ្នាំរបស់លោកមិនចង់ឮពាក្យថា តំបន់នេះត្រូវបានចាត់ទុកជា «កន្លែងចោលខ្មោចយន្តហោះ» នោះទេ។
សម្រាប់លោក អតីតយានហោះហើរលើមេឃធុនធំទាំងនោះគឺសក្តិសមនឹងផ្ដល់តម្លៃ ហើយពួកវាក៏ទំនងជាអ្នករកប្រាក់ដុល្លារដ៏មានសក្តានុពលផងដែរ។
ក្រោយវិបត្តិក្រោយការបោះឆ្នោតឆ្នាំ២០១០-២០១១ ដែលបានសម្លាប់មនុស្សប្រហែល៣ពាក់នាក់នៅក្នុងប្រទេសកូតឌីវ័រ អ្នកជំនួញរូបនេះបានសម្រេចចិត្តទិញយន្តហោះ ដែលត្រូវបានគេបោះបង់ចោលនៅអាកាសយានដ្ឋាន អាប៊ីដចាន់។
លោកបាននិយាយថា៖ «វាពិតជាតម្លៃបំផុត តែខ្ញុំរំភើបខ្លាំងណាស់ដោយមិនចាំតម្លៃរបស់ទេ»។
យន្តហោះចំនួន ៨ គ្រឿង ត្រូវបានដាក់តម្រៀបនៅលើបរិវេណប្រវែង ៨០០ ម៉ែត្រ ដែលនាំមនុស្សទៅដល់បឹងដ៏ស្ងប់ស្ងាត់។
លោកបានរំឭកថា៖ «យន្តហោះខ្លះត្រូវកាត់ជាពីរ ឬបីកំណាត់ដើម្បីអាចដឹកជញ្ជូនបានដោយមិនបិទផ្លូវទាំងមូល»។
ថ្ងៃនេះលោកចង់ផ្តល់ឱ្យយន្តហោះ ដែលត្រូវបានគេបោះបង់ចោល ក្នុងបំណងផ្ដល់នូវជីវិតលើកទី ២ដល់ពួកវា។ នេះជាចំណង់ចំណូលចិត្តដែលលោកចែករំលែកជាមួយភ្ញៀវមានបំណងចង់ដឹងចង់ឃើញនូវយានធ្លាប់ហោះហើរលើអាកាសទាំងនេះ។
លោកបានប្រាប់ទីភ្នាក់ងារ AFP ថា៖«ខ្ញុំចង់ប្រែក្លាយយន្ដហោះទាំងនោះទៅជាបន្ទប់សន្និសីទ ភោជនីយដ្ឋាន ហើយហេតុអ្វីមិនអាច? វាអាចជាបន្ទប់គេងដ៏ប្រណីត»។
លោក អាលីបៃ ក៏នឹងរៀបចំបរិវេណតភ្ជាប់ទីធ្លារធំទូលាយទាំងពីរ ដែលអ្នកទស្សនាអាចពិសាភេសជ្ជៈបាន។
លោក និយាយទាំងអស់សំណើចថា៖ «យើងបានកែច្នៃច្រើនណាស់។ ការបង្ហាញសមាសធាតុយន្តហោះនៅក្នុងសារមន្ទីរ ការបង្ហាញពីផ្នែកវិសេសបំផុតរបស់យន្តហោះ នោះក៏ជាអ្វីដែលខ្ញុំចង់ធ្វើដែរ»៕ AFP/HR