ក្រុងតូក្យូ៖ មឹកយក្សប្រវែង ៣,៣៥ ម៉ែត្រ ត្រូវបានប្រទះឃើញនៅមានជីវិតលើច្រាំងសមុទ្រភាគខាងលិចប្រទេសជប៉ុន។
តាមធម្មតា មឹកយក្សរស់នៅក្នុងសមុទ្រជ្រៅ ហើយវាពិតជាកម្រខ្លាំងណាស់ ដែលសត្វដ៏ធំនេះបានមកទើលើច្រាំងទាំងរស់។ ឥឡូវនេះ មឹកយក្សត្រូវបានដឹកទៅអាងចិញ្ចឹមត្រីដើម្បីស្រោចស្រង់។
មឹកនេះត្រូវបានប្រទះឃើញកាលពីថ្ងៃពុធ សប្ដាហ៍មុននៅឯឆ្នេរ Ugu ក្នុងទីក្រុងអូបាម៉ាខេត្តហ្វូគូអ៊ិ។ កាលពីថ្ងៃសុក្រ ទីភ្នាក់ងារព័ត៌មាន AFP បានបង្ហោះវីដេអូមួយអំពីមឹកបានបោកបក់មកច្រាំង ដែលទទួលបានការចាប់អារម្មណ៍យ៉ាងខ្លាំង។
របាយការណ៍មួយរបស់កាសែតជប៉ុន Mainichi ដែលដកស្រង់សម្តីរបស់រដ្ឋបាលក្រុងអូបាម៉ា បាននិយាយថា មឹកនៅមានជីវិត និងធ្វើចលនារស់រវើកពេល ដែលវាត្រូវបានរកឃើញនៅឆ្នេរ។
របាយការណ៍ខាងលើបានបន្ថែមថា ពេលនេះសត្វមឹកត្រូវបានប្តូរទៅអាងចិញ្ចឹមត្រី Echizen Matsushima Aquarium ក្នុងទីក្រុងសាកៃ ហើយបានបង្ហាញវីដេអូមួយដែលក្រុមមន្ត្រីកំពុងធ្វើការវាស់វែងប្រវែងសត្វនេះ។
មឹកយក្សដែលរស់នៅទឹកជ្រៅជាសត្វពូកែលាក់ខ្លួន និងកម្រប្រទះណាស់។ ពួកវាជាពពួកសត្វដៃច្រើនដែលមានទំហំដ៏ធំបំផុត និងអាចលូតលាស់ដល់ប្រវែងរហូតដល់១៣ម៉ែត្រឯណោះ។
អាយុកាលរបស់មឹកយក្សពុំវែងប៉ុន្មានទេ ដោយពួកវាអាចរស់រានបានត្រឹមតែ ៥ ទៅ ៦ ឆ្នាំប៉ុណ្ណោះ។ នេះបើយោងតាមអ្នកស្រាវជ្រាវជីវជម្រុះ៕ AFP/HR