.jpg)
សិល្បករ លាង ស៊ីកន បរិយាយពីស្នាដៃគំនូរ «ឈោងចាប់ផ្កាយ» នៅស្ទូឌីយោរបស់លោកម្ដុំសួនច្បារវត្តបទុម។ ហេង ជីវ័ន
ភ្នំពេញៈ ស្នាដៃ «ដុះស្លាប» ទាំង ២០ ផ្ទាំង របស់លោកគ្រូ លាង ស៊ីកន សិល្បករល្បីមួយរូបលើឆាកអន្តរជាតិ នឹងត្រូវបានដាក់តាំងនៅវិចិត្រសាល Rossi & Rossi ក្រុងហុងកុង ចាប់ពីថ្ងៃទី ២១ ខែ ឧសភា ឆ្នាំ ២០២២។ សិល្បករជើងចាស់រូបនេះក៏បានសហការជាមួយមូលនិធិប្រាសាទពិភពលោក (WMF) ដោយប្រកាសលក់ស្នាដៃមួយរបស់លោកឈ្មោះថា «កើតម្ដងទៀតជាផ្កាឈូករ័ត្នដ៏ស្រស់ស្អាត» ដើម្បីបរិច្ចាគជូនអង្គការស្ដារស្ថាបត្យកម្មនៅប្រទេសអ៊ុយក្រែន។
ជាអង្គការមួយមានមូលដ្ឋាននៅទីក្រុងញូវយ៉ក WMF ដែលបានធ្វើកិច្ចការជួសជុលប្រាសាទបាក់ខែង អស់រយៈពេលជាង ២០ ឆ្នាំ នៅតំបន់បេតិកភណ្ឌវប្បធម៌ប្រវត្តិសាស្ត្រអង្គរ ជាផ្នែកមួយនៃបេសកកម្មការពារ និងកសាងប្រទេសឆ្លងកាត់ភ្លើងសង្គ្រាម ហើយបច្ចុប្បន្នអង្គការនេះកំពុងជួយកសាងស្ដារអ៊ុយក្រែន។
អ្នកនាង ប៉ុក ម៉ារីណា ជាអ្នករៀបចំពិព័រណ៍នៅ Preview in Phnom Penh និងជាអ្នកផ្តួចផ្តើមភាពជាដៃគូជាមួយអង្គការ WMF ជាមួយស្នាដៃគំនូរ «កើតម្ដងទៀតជាផ្កាឈូករ័ត្នដ៏ស្រស់ស្អាត» ដើម្បីគាំទ្រតំបន់បេតិកភណ្ឌនៅអ៊ុយក្រែនបានប្រាប់ ភ្នំពេញ ប៉ុស្តិ៍ថា៖ «ឥឡូវលោកគ្រូសម្រេចចិត្តបរិច្ចាគទៅខាង WMF។ WMF ពិតជាសប្បាយចិត្តណាស់ ដែលទទួលបានព័ត៌មានថា មានសិល្បករខ្មែរនៅស្រុកខ្មែរចង់ជួយអ៊ុយក្រែន។ ពេលនេះយើងកំពុងចាប់ផ្ដើមយុទ្ធនាការផ្សព្វផ្សាយលក់ ដោយយើងទុកនៅអង្គការ WMF នៅស្រុកខ្មែរ ដែលមានទីតាំងនៅសៀមរាប»។
ជាសិល្បករពហុទម្រង់ លោក ស៊ីកន បានបញ្ជាក់ថា ស្នាដៃគំនូរខាងលើនេះ លោកបង្កើតឡើងក្នុងបំណងស្វែងរកថវិកាជួយស្ដារការខូចខាតនៅអ៊ុយក្រែន។
ប៉ុន្តែជាជាងទទួលថវិកាដោយលក់ស្នាដៃជូនបុគ្គលឯកជន សិល្បកររូបនេះមានក្ដីប្រាថ្នាចង់ឱ្យគំនូររបស់ខ្លួន បានទៅដល់ដៃសហគមន៍ក្រោមការចូលរួមចំណែកពីមនុស្សម្នាក់ៗ ដើម្បីយកវាទៅដាក់តាំងនៅសារមន្ទីរ ឬវិចិត្រសាលណាមួយ។
លោកលើកឡើងថា៖ «ពេលខ្លះ ខ្ញុំឆ្ងល់ដែរ អ្នកខ្លះស្រឡាញ់អីចង់លួចយកមកដាក់ក្នុងផ្ទះខ្លួនឯង។ ខ្ញុំមិនគិតអ៊ឹចឹងទេ ខ្ញុំសឹងតែថា ឱ្យតែមានអីល្អ ខ្ញុំចង់ដាក់សារមន្ទីរ បើគេកុំយកទៅលក់បន្ត ព្រោះគ្រប់គ្នាគ្រប់ជំនាន់គេឃើញ អ៊ឹចឹងយើងគួរតែមានមោទនភាព»។
រីឯគំនូរទាំង ២០ ផ្ទាំង លោក ស៊ីកន បានឱ្យដឹងថា លោកបានចំណាយពេលធ្វើយ៉ាងផ្ចិតផ្ចង់អស់រយៈពេលជាង ២ ឆ្នាំ ចាប់ពីចុងឆ្នាំ ២០១៩ ហើយស្នាដៃទាំងនោះត្រូវបានបង្ហាញតិចតួចក្នុងពិព័រណ៍ក្នុងស្រុក។
អ្នកនាង ម៉ារីណា និងគំនូរ «កើតម្ដងទៀតជាផ្កាឈូករ័ត្នដ៏ស្រស់ស្អាត»។ ហេង ជីវ័ន
ដោយមានការជួយរៀបចំពីអ្នកនាង ម៉ារីណា ស្នាដៃរបស់លោកចំនួន ១២ ផ្ទាំង ត្រូវបានដាក់តាំងនៅស្ថានទូតអង់គ្លេសកាលពីដើមខែមេសា មុននឹងបញ្ជូនទៅដាក់តាំងរយៈពេល ២ ខែ នៅទីក្រុងហុងកុង ចាប់ពីថ្ងៃទី ២១ ខែឧសភា ខាងមុខនេះ ដោយពុំមានវត្តមានម្ចាស់ស្នាដៃ ព្រោះតែស្ថានភាពមិនអំណោយផល។
អ្នកនាង ម៉ារីណា ឱ្យដឹងថា៖ «ខ្ញុំជាអ្នកសម្របសម្រួលឱ្យលោកគ្រូតាំងពីនៅភ្នំពេញ។ លោកគ្រូមានប្រសាសន៍ថា ចង់បង្ហាញស្នាដៃមុនទៅហុងកុង ពីព្រោះយើងក៏មិនដឹងថា ត្រឡប់មកវិញឬក៏អត់។ ខ្ញុំយល់ថាល្អណាស់ ជាពិសេសសម្រាប់សិស្សៗនៅសាលារចនាបានឃើញគំនូរនេះ»។
លោក ស៊ីកន ដែលមានស្នាដៃសិល្បៈច្រើនស្រទាប់សណ្ឋាន រួមទាំងការប្រើសំរាម ស្បែក ស្បៃ សំណាញ់ បានបញ្ជាក់ថា ការរៀបចំដាក់តាំងគំនូរមានចំនួនកំណត់ អាស្រ័យលើទីតាំងពិព័រណ៍។
សិល្បកររូបនេះលើកឡើងថា៖ «យើងជ្រើសរើស «ឈោងចាប់ផ្កាយ» ដាក់ជាប្រធានបទនៅពេលតាំងនៅស្ថានទូតអង់គ្លេស ដោយសារ ម៉ារីណា គាត់ស្រឡាញ់ ហើយក៏ស្របជាមួយអ្វី ដែលខ្ញុំចង់ចែករំលែកអំពីបទពិសោធជីវិតផ្ទាល់ខ្លួន»។
លោកថា គំនូរ «ឈោងចាប់ផ្កាយ» មិនមានពិតប្រាកដនិយមថា វាជារូបភាពអ្វីទេ។ បើមើលនឹងភ្នែក រូបនេះមាន ស្ទឹង បឹង ទន្លេ ព្រៃ ប្រាសាទ តែវាបង្កប់ទៅដោយអត្ថន័យ។
លោក ស៊ីកន ក៏បានបកស្រាយលម្អិតពីជីវិតតាមស្នាដៃនេះថា លោកបានឆ្លងកាត់រឿងរ៉ាវជាច្រើន ឆ្លងផុតពីរបបប្រល័យពូជសាសន៍ ទាំងលំបាកលំបិន រត់គេចពីពួកទាហាន និងពីការយកទៅសម្លាប់។ លោកបានឆ្លងកាត់ជីវិតជាក្មេងគង្វាលក្របី ក្រោមកម្ដៅថ្ងៃ ក្រោមភ្លៀង។ ក្មេងឃ្វាលក្របីមានតែខោអាវ ១ សម្រាប់ជាប់នឹងខ្លួនបានហែលឆ្លងទឹកជំនន់ និងអាយុថ្លៃរស់រានពីការលង់ទឹក។
លោកបានបរិយាយថា៖ «បទពិសោធដែលចូលមកក្នុងឆាកជីវិតជាដំណើរទៅភាពជោគជ័យ ទាំងគ្រោះថ្នាក់ ឈឺចាប់ និងលំបាក ព្រោះយើងបានកែប្រែ ព្យាបាលវាបានជាខ្ញុំគូរចេញដូចជាស្ថានសួគ៌ ធម្មជាតិ វាលស្រែ ផ្ដល់ម្ហូបចំណី ទោះជាយ៉ាងណា វាជាដីមាស និងស្ថានសួគ៌ ហើយខ្ទមកម្សត់ខ្ញុំធ្លាប់នៅ ខ្ញុំគូរចេញជាប្រាសាទ»។
លោកបានបន្ថែមថា៖ «ខ្ញុំមានមោទនភាពព្រោះបទពិសោធទាំងអស់ហ្នឹងគ្មានអ្នកណាដូចខ្ញុំទេ។ ចំណុចហ្នឹងហើយដែលខ្ញុំគិតថា ស្នាដៃ «ឈោងចាប់ផ្កាយ» គឺយើងទៅដល់ យើងអាចចាប់បាន»។
ដោយធៀបនឹងជីវិតមួយដ៏រលាក់ និងគ្រោះថ្នាក់ លោកបានជួសជុលពី ១ ជាន់ ទៅ ១ ជាន់ បីដូចជាស្នាដៃសិល្បៈដែលអ្នកផ្ចង់ទស្សនានឹងអាចមើលឃើញលើសពីការឈឺចាប់។
លោកឱ្យដឹងថា ក្នុងនាមសិល្បករ លោកគឺជាអ្នកឈឺឆ្អាល និងប្រាថ្នាសន្តិភាពពិត ដោយពុំមានការឆ្កឹះឆ្កៀលបង្កជម្លោះ។ ថ្វីដ្បិតថា លោក ស៊ីកន ធ្វើសិល្បៈនយោបាយ តែលោកបញ្ជាក់ជំហរថា នយោបាយរបស់លោក មិនទៅបង្កជម្លោះឡើយ។
សិល្បករមិនចេះភាសាអង់គ្លេស និងមិនដែលមើលប្រវត្តិសិល្បៈជនល្បីលើពិភពលោកនោះ បានបញ្ជាក់ថា ស្នាដៃសិល្បៈរបស់លោកផុសឡើងតាមចិត្តនឹកឃើញផ្ទាល់ខ្លួន មុននឹងទទួលឥទ្ធិពលពីស្ថានភាពជុំវិញ។ តែវាក៏ជាមូលដ្ឋានបំផុសក្មេងជំនាន់ក្រោយឱ្យធ្វើតាម និងបន្ថែមគំនិតថ្មីៗ។
លោក ស៊ីកន មានចំណាប់អារម្មណ៍ថា៖ «ទោះគាត់ធ្វើមិនដូចយើង តែយើងប្រៀបបានជាអ្នកត្រួសត្រាយផ្លូវមួយ ក្នុងការបង្ហាញគំនិត ចំណុចនេះដែលខ្ញុំគិតថា ជាចំណែកនៃភាពជោគជ័យរបស់ខ្ញុំ។ អ៊ីចឹងបានគំនូរទាំងអស់ហ្នឹងខ្ញុំសប្បាយក្នុងការធ្វើវាណាស់។ ខ្ញុំចង់ចែករំលែកការខិតខំប្រឹងប្រែងរបស់ខ្ញុំ»៕
