ភ្នំពេញៈ រូបភាពគំនូរលើកន្ទេលរំចេក ៣៣ ផ្ទាំង ត្រូវបានដាក់បង្ហាញពីបំផ្លាស់ទីរបស់ប្រជាជនគ្រប់វ័យក្មេងចាស់ប្រុសស្រី ខ្លះទូលបង្វិចលើក្បាល និងខ្លះលី រែករបស់របរ។ រូបខ្លះទៀតបង្ហាញពីដំណើររបស់អ្នកភូមិឆ្ពោះទៅមុខ ទាំងបង្កប់ទុក្ខកង្វល់។
រូបភាពរំលេចសកម្មភាព និងមូលហេតុនៃការបំផ្លាស់ទី ដូចជារូបក្មេងប្រុសម្នាក់អង្គុយបើកឆ្នាំងបាយ ឆ្នាំងសម្លដោយទឹកមុខស្រងូត អាចបង្កក្ដីក្ដុកក្ដួលដល់អ្នកទស្សនា។
រូបភាពទាំងនេះ គឺស្ថិតក្នុងពិព័រណ៍ «ដំណើរ» ដែលជាស្នាដៃថ្មីរបស់សិល្បករខេត្តបាត់ដំបង ជា សេរីរដ្ឋ ដោយលោកបានត្បាញរឿងរ៉ាវរបស់មនុស្ស ត្រូវផ្លាស់ទីលំនៅ ឬចំណាកស្រុក ដើម្បីរស់ ហើយកម្រងស្នាដៃទាំងនេះ ត្រូវបានតាំងនៅវិចិត្រសាល Air Gallery ក្នុង Factory Phnom Penh ដោយបន្តរហូតដល់ថ្ងៃទី ២៨ ខែ ឧសភា ឆ្នាំ ២០២២។
ដោយបានសិក្សាពីវិធីត្បាញកន្ទេលបែបប្រពៃណី ជាការអនុវត្តដែលបាត់បន្តិចម្តងៗ ហើយផលិតក្នុងអំឡុងពេល ២ ឆ្នាំចុងក្រោយនៃការរាតត្បាតកូវីដ ១៩ សិល្បករ សេរីរដ្ឋ បង្ហាញស្នាដៃពីកន្ទេល ដែលមានប្រើទឹកថ្នាំអាគ្រីលីក ស្មៅ ភក់ និងដី ដើម្បីរៀបរាប់ពីរឿងរ៉ាវនៃការបណ្តេញចេញ ការធ្វើចំណាកស្រុក អាហារ អាកាសធាតុ សន្តិសុខ និងខាងវិញ្ញាណ។
សិល្បកររូបនេះប្រាប់ពីដំណើរនៃការបង្កើតស្នាដៃថា៖ «ខ្ញុំចាប់ផ្ដើមធ្វើលើការងារនេះ តាំងពីចុងឆ្នាំ ២០១៩ ផ្ដើមចេញពីការរៀនធ្វើកន្ទេលដោយខ្លួនឯង។ ខ្ញុំទៅរៀនពីរបៀបធ្វើ និងត្បាញកន្ទេលស្លឹករំចេកនៅឯកំពង់ឆ្នាំងជាមួយអ្នកភូមិ ដោយដើរចូលក្នុងព្រៃជាមួយគេ កាប់ស្លឹករំចេកយកមកធ្វើតាមដំណាក់កាលមួយៗ មុននឹងត្បាញវាចេញ យកវាមកគូរបាន»។
លោកបានបន្តប្រាប់ពីបច្ចេកទេសថា៖ «បន្ទាប់ពីត្បាញកន្ទេល ការគូររបសខ្ញុំ ខ្ញុំប្រើភក់ ដោយយកពីដីដំបូកមកដំឱ្យម៉ដ្ឋ ហើយយកមកលាយជាមួយទឹក ឬកាវ រួចយកមកគូរ ជាមួយនឹងការប្រើពណ៌អាគ្រីលីក។ បន្ទាប់មកខ្ញុំប្រើកម្ទេចរណា យកមកបញ្ជូលជាមួយរូបភាពដែលខ្ញុំធ្វើ។ ដំណាក់កាលនីមួយៗ វារាងពិបាកដែរ ដោយសារយើងត្រូវការពេលវេលាច្រើន ដើម្បីធ្វើដូចជាការត្បាញកន្ទេល និងដីក៏ត្រូវធ្វើវាឱ្យបានល្អដែរ»។
សិល្បករដែលមានផ្ទះជាប់មាត់អូរ និងប្រឈមនឹងការបំផ្លាស់ទីចេញ រូបនេះ បានលើកឡើងថា លោកផ្ទាល់លោកក៏មានបងប្អូនធ្វើចំណាកស្រុកទៅធ្វើការងារនៅប្រទេសថៃដែរ។
ក្នុងការធ្វើចំណាកស្រុក វាមានបញ្ហាច្រើនណាស់ ទាំងចំណាយច្រើន ខាតពេល និងកម្លាំង ឃ្លាតឆ្ងាយពីទឹកដីកំណើត ពីមនុស្សជាទីស្រឡាញ់។ ដូច្នេះហើយទើបលោក សេរីរដ្ឋ រំលេចបញ្ហានេះឡើងជាការនឹកគិតដល់អ្នកដែលកំពុងរងគ្រោះ ដោយយ៉ាងហោចណាស់ពួកគាត់ទទួលដឹងថា មានអ្នកយល់អំពីពួកគាត់។
សិល្បករ វ័យ ៣២ ឆ្នាំរូបនេះប្រាប់ ភ្នំពេញ ប៉ុស្តិ៍ថា៖ «ដំណើរ ថ្លែងអំពីការប្តេជ្ញាចិត្តរបស់ខ្ញុំ ចំពោះការអនុវត្តសិល្បៈប្រកបដោយមនសិការចេញពីមូលដ្ឋាន និងការពង្រីកសំឡេងនៃប្រជាជនងាយរងគ្រោះ ខណៈពេលដែលការងារនេះត្រូវបានចាក់ឫសនៅក្នុងបទពិសោធក្នុងស្រុកនៃផលប៉ះពាល់នៃកូវីដ ១៩។ ស្នាដៃនេះក៏និយាយទៅកាន់វិបត្តិក្នុងតំបន់ និងពិភពលោកនាពេលបច្ចុប្បន្ន និងជាប្រវត្តិសាស្ត្រ ដែលបង្ខំឱ្យមានទម្រង់ផ្សេងៗនៃការធ្វើចំណាកស្រុក»។
លោកបានចាប់ផ្តើមសិក្សាផ្នែកគំនូរនៅអង្គការហ្វារពន្លឺសិល្បៈនៅឆ្នាំ ២០០៥ និងធ្លាប់ធ្វើការជាអ្នករចនាក្រាហ្វិច និងវិចិត្រករនៅស្ទូឌីយោសន្លឹកថ្មី នៃអង្គការនេះ មុននឹងបានក្លាយជាគ្រូបង្រៀនផ្នែករចនាក្រាហ្វិចនៅអង្គការហ្វារពន្លឺសិល្បៈ។
សិល្បករដែលធ្លាប់បានចូលរួមតាំងពិព័រណ៍សិល្បៈទាំងក្នុងស្រុក និងនៅហុងកុង សិង្ហបុរី និងបារាំង រូបនេះបានឱ្យដឹងទៀតថា៖ «ឆ្នាំ ២០១៨-២០១៩ ជាឆ្នាំដែលខ្ញុំចាប់ផ្ដើមកាត់បន្ថយការបង្រៀន ហើយផ្ដោតទៅលើការងារដែលយើងចូលចិត្តវិញ គឺការគូរ។ ភាគច្រើនខ្ញុំធ្វើលើគំនូរសហសម័យទាក់ទងទៅនឹងប្រធានបទ បរិស្ថាន បញ្ហាសង្គម និងប្រជាជន»។
លោក សេរីរដ្ឋ ជ្រើសរើសការរំលេចទស្សនៈតាមស្នាដៃសិល្បៈបែបត្រង់ៗដែរ ដើម្បីងាយស្រួលផ្សព្វផ្សាយឱ្យប្រជាជនខ្មែរយល់ពីសិល្បៈកាន់តែច្រើន ជួយឱ្យជាតិរីកចម្រើន ឬក៏កែប្រែអ្វីមួយក្នុងសង្គមឱ្យល្អឡើង។
សិល្បកររូបនេះបាននិយាយថា៖ «មនុស្សម្នាក់ៗតែងតែមានសិល្បៈនៅក្នុងខ្លួន គ្រាន់តែមានតិច ឬច្រើន អ៊ឹចឹងសូមឱ្យយើងបង្ហាញសមត្ថភាពចេញមក ដើម្បីឱ្យប្រជាជនក្នុងស្រុក ឬប្រទេសដទៃបានឃើញពីសក្ដានុពលយើង ដោយចាប់ផ្ដើមពីសិល្បៈ ដែលនឹងនាំឱ្យមានការរីកចម្រើន និងការបម្រែបម្រួលទៅរកភាពល្អ»៕