ភ្នំពេញ៖ ទាំងការងារសិល្បៈសម្ដែង ចម្រៀង និងជំនួញក្នុងដៃដ៏ជោគជ័យ តារាចម្រៀងស្រីមុខឃ្យូតអ្នកនាង ពេជ្រ សូលីកា ថ្មីៗនេះបែរជារងសម្ពាធពីប្រតិកម្មមហាជនមួយចំនួន ដោយសាររូបភាពជាតារាផ្សព្វផ្សាយឱ្យស្រាបៀរម៉ាកល្បីមួយក្នុងស្រុក។
តារាចម្រៀងកូនមួយ តែនៅអាចរក្សាប្រជាប្រិយភាពល្បីអ្នកនាង ពេជ្រ សូលីកា មុននេះបន្តិចបានបង្ហោះសារយ៉ាងវែងអន្លាយបកស្រាយទៅនឹងការជេរប្រមាថកិច្ចការនាងជាតារាផ្សព្វផ្សាយផលិតផលស្រាបៀរ។
ក្នុងសំណេរនោះ អ្នកនាង ពេជ្រ សូលីកា បានបរិយាយថា៖ «សូមមេត្តាអានឱ្យចប់ មុននឹងខមមិន។ ភាសាដែលយើងអាចជ្រើសរើសយកមកនិយាយទៅអ្នកដទៃមានល្អៗច្រើនណាស់»។
តារាចម្រៀង និងសម្ដែងស្រីរូបនេះបានលើកហេតុផលមុននឹងឈានដល់ការចេញសារឆ្លើយតបនេះថា៖ «មុននឹងខ្ញុំសម្រេចចិត្តផុស video ដោយតែខ្ញុំបានទទួលខមមិន អសីលធម៌ មួយចំនួន ដោយមានទាំងពាក្យជេរប្រមាថ ដែលវាមិនមែនជាពាក្យជួយកែតម្រូវទាល់តែសោះ បែរជាខឹងសម្បារមកលើរូបខ្ញុំទៅវិញ តើខ្ញុំខុសដែលខ្ញុំត្រូវបំពេញភារកិច្ចរបស់ខ្ញុំ?»។
អ្នកនាង ពេជ្រ សូលីកា បានបកស្រាយបន្តថា៖ «ការងារអីក៏ដោយ បើខ្ញុំមិនបានទៅបំពានលួចឆក់ប្លន់ទ្រព្យសម្បត្តិញើសឈាមអ្នកដទៃ ហេតុអីខ្ញុំត្រូវមកទទួលពាក្យអាក្រក់ៗទាំងនេះពីមនុស្សដែលល្អៗទៅវិញ។ បើមនុស្សល្អ រៀនសូត្របានល្អ ម៉េចក៏មិនប្រើពាក្យល្អៗទៅកាន់អ្នកដទៃដែរទៅ ជាមនុស្សដូចគ្នា ក៏ចង់បានពាក្យនែនាំល្អៗដូចគ្នា»។
តារាស្រីដែលតែងត្រូវអ្នកគាំទ្រសរសើរសំណាងថាជោគជ័យទាំងអាជីពសិល្បៈ និងជីវិតស្នេហាគ្រួសារនោះ នាងក៏បានបន្តទៀតថា៖ «តារាក៏ជាមនុស្ស ហេតុអីតារាគ្មានសិទិ្ធទទួលពាក្យល្អៗដូចមនុស្សធម្មតា? មិនពេញចិត្តអាចនិយាយនែនាំល្អៗមកបាន។ តែម៉េចចាំបាច់ត្រូវប្រើពាក្យ មីនេះ មីនោះ មីក្របី មីគម្រក់ មីតារាបាតសង្គម ធ្វើអី?។ បងៗជាមនុស្សថ្លៃថ្នូរបែរជាមកប្រើពាក្យសម្ដីអស់ទាំងនេះ ធ្វើដូចជាខ្ញុំទៅប្លន់គេ ដុតផ្ទះគេ ខ្ញុំយល់ចិត្តបងៗដែលខមិនមួយចំនួនថាបងៗមានអារម្មណ៍បែបម៉េច តែខ្ញុំក៏ចង់ឱ្យបងៗយល់ពីពួកខ្ញុំដូចគ្នាថា វាជាតួនាទីការងាររបស់ពួកខ្ញុំ ខ្ញុំត្រូវបំពេញវានឹងជាទំនួសខុសត្រូវរបស់ខ្ញុំ»។
អ្នកនាង ពេជ្រ សូលីកា បានបន្តទៀតថា៖ «មនុស្សសុទ្ធតែមិនដូចគ្នា អ្នកខ្លះរកស៊ី អ្នកខ្លះធ្វើការ ការងារសុទ្ធតែមិនដូចគ្នា រកស៊ីសុទ្ធតែមិនដូចគ្នា យល់ថា បើមិនទទួលផ្សព្វផ្សាយគ្រឿងស្រវឹង វាមិនដាច់បាយស្លាប់ទេ ប៉ុន្តែពួកខ្ញុំមានសិទ្ធជ្រើសរើស ព្រោះវាមិនមែនជាការងារលួចឆក់ប្លន់គេ អ៊ីចឹងពួកតារាដូចខ្ញុំមានសិទិ្ធនឹងជ្រើសរើសការងារ រកស៊ីចង់បានចំណូល ធ្វើការចង់បានប្រាក់ខែ ខំយប់ខំថ្ងៃ ក៏មិនព្រមធ្វើជាចោរដែរការងារសង្គមគេធ្វើ ម៉េចមើលមិនដែលឃើញតាមអ្វីដែលបងៗយល់ឃើញ តែបងៗមិនមែននៅក្នុងហេតុការណ៍ផ្ទាល់ បងអាចនិយាយម៉េចក៏បាន»។
ទាក់ទិននឹងការទទួលផ្សព្វផ្សាយគ្រឿងស្រវឹង តារាចម្រៀង និងសម្ដែងរូបនេះបានលើកឡើងថា៖ «បងតែងតែនិយាយស្រាបំផ្លាញដល់មនុស្ស ខ្ញុំទទួលស្គាល់ បន្តែវាអាស្រ័យទៅលើមនុស្សដូចគ្នា គ្មាននរណាបង្ខំនរណាបាននោះទេ ។ ឧទាហរណ៍ថា បើតារាផ្សព្វផ្សាយគ្រឿងស្រវឹង បើខ្លួនបងមិនចង់ផឹក តារាក៏មិនអាចទៅបង្ខំបងមកផឹកបានដែរ ហើយបើតារាផ្សព្វផ្សាយថា ហាមដាច់ខាតមិនឱ្យបងផឹកគ្រឿងស្រវឹង បើខ្លួនបងនៅតែផឹក តារាក៏មិនអាចទៅហាមបងបានដូចគ្នា។ ក្នុងនោះក៏មានពាក្យស្លោករបស់គេ «ពិសារដោយការទទួលខុសត្រូវ»៕