ក្រុងរ៉ូម៖ ទស្សនីយភាពបែបស្រើបស្រាលអាចនឹងធ្វើឱ្យមហាជនមុខក្រហមនៅក្នុងពិព័រណ៍ថ្មីមួយនៅទីក្រុង Pompeii ស្តីពីសិល្បៈនិងផ្លូវភេទនៅក្នុងទីក្រុងរ៉ូម៉ាំងបុរាណដែលតាំងបង្ហាញរូបចម្លាក់និងគំនូរសុដន់និងគូទច្បាស់ក្រឡែត។
អ្នកបុរាណវត្ថុវិទូដែលជីកកំណាយទីក្រុងបុរាណ ដែលត្រូវបានបំផ្លាញដោយការផ្ទុះភ្នំភ្លើងនៅក្បែរនោះក្នុងឆ្នាំ ៧៩នៃគ.ស ត្រូវបានប្រទះឃើញរូបភាពដ៏ស្រើបស្រាលនៅគ្រប់ទីកន្លែងចាប់ពីរូបចម្លាក់នៅសួនច្បាររហូតដល់ផ្ទាំងគំនូរលើពិតានដ៏គួរឱ្យភ្ញាក់ផ្អើលជាដំបូង។
ចាប់តាំងពីការជីកកកាយលើកដំបូងនៅក្នុងទីតាំងបុរាណសតវត្សរ៍ទី១៨ រូបភាពមិនសមរម្យត្រូវបានគេរកឃើញនៅតាមតៀមស្រា កន្លែងងូតទឹកក្ដៅ និងផ្ទះឯកជន ចាប់ពីលិង្គធំរហូតដល់រូបសំណាករាងកាយអាក្រាតទាំងបុរស និងស្ត្រី។
លោក Gabriel Zuchtriegel នាយកបុរាណស្ថានទីក្រុង Pompeii បានប្រាប់ AFP នៅពេលលោកឈរនៅមុខរូបសំណាកចំហដើមទ្រូង Centaurs ថា៖ «ច្បាស់ណាស់ថា នេះជាទីក្រុងមួយដែលរូបភាពកាមគុណ និងស្រើបស្រាលមានលើសពីសម័យបច្ចុប្បន្ន»។
លោកបន្ដថា៖ «របកគំហើញដំបូងបានបង្កឱ្យមានភាពស្រងាកចិត្តភាពអាម៉ាស់ និងការចង់ដឹងចង់ឃើញហើយត្រូវបានមនុស្សមួយចំនួនមើលឃើញថា ជាឱកាសដ៏ល្អមួយ ដើម្បីគិតអំពីទំនាក់ទំនងជាមួយរាងកាយ និងរូបអាក្រាតទៅតាមគោលគំនិតខុសពីមុន»។
លោក Zuchtriegel បាននិយាយថាស្តេច Neapolitan King Charles VII ជាអ្នកផ្តល់ហិរញ្ញប្បទានដល់ការជីកកកាយនេះបានបិទកន្លែងផ្ទុកតថភាពអាសគ្រាមមួយចំនួននៅក្នុងទូសម្ងាត់មួយនៅទីក្រុង Naples ដោយគ្រាន់តែបង្ហាញវត្ថុលាក់ទុកទាំងនេះដល់អ្នកដែលមានសុជីវធម៌ល្អប៉ុណ្ណោះ។
ទូសម្ងាត់នោះនៅតែមានវត្ដមានរហូតដល់សព្វថ្ងៃនេះ នៅក្នុងសារមន្ទីរបុរាណវត្ថុក្នុងទីក្រុងភាគខាងត្បូងប្រទេសអ៊ីតាលី។
ការតាំងពិព័រណ៍ ដែលដំណើរការរហូតដល់ខែមករាឆ្នាំ២០២៣ និងនាំមកនូវស្នាដៃចំនួន៧០រួមគ្នាចាប់ផ្តើមជាមួយនឹងចម្លាក់លិង្គធំនៃទេវៈ Priape ជានិមិត្តសញ្ញារ៉ូម៉ាំងនៃភាពមានកូនចៅ និងវិបុលភាព។
Priape និងលិង្គរបស់ទ្រង់ត្រូវបានដាក់ជាប្រពៃណីនៅក្នុងសាលធំនៅតាមអគារសំខាន់ៗក្នុងសម័យរ៉ូម៉ាំង។
Tiziana Rocco មកពីការិយាល័យតាំងពិព័រណ៍ Pompeii និយាយថាអ្នកទស្សនាត្រូវបានប្រាប់ថាវាមិនពាក់ព័ន្ធនឹងរឿងរ៉ាវផ្លូវភេទទេ ទោះបីជាការស្រមើស្រមៃបែបទំនើបបង្ហាញអត្ថន័យបែបនោះក៏ដោយ៕ AFP/HR