ទីក្រុងឡាអេ៖ ប៉ូលិសបាននិយាយកាលពីថ្ងៃអាទិត្យថាក្មេងប្រុសអាយុ ៤ឆ្នាំម្នាក់នៅប្រទេសហូឡង់បានយកឡានរបស់ម្តាយរបស់គេទៅបើកបរមុនពេលទៅបុកឡានដែលចតចោលចំនួន ២គ្រឿង។
ប៉ូលិសនៅកណ្តាលទីក្រុងយូទ្រិកច៍ត្រូវបានប្រកាសអាសន្នកាលពីថ្ងៃសៅរ៍ នៅពេលដែលអ្នកស្រុកបានប្រទះឃើញក្មេងម្នាក់ដើរតាមផ្លូវស្លៀកពាក់តែខោអាវគេងយប់និងជើងទទេ។
ប៉ូលិសបានសរសេរនៅលើ Instagram ថា៖ «ពួកយើងបានឆ្លើយតបភ្លាមៗ ខណៈដែលអ្នកឈរមើលមានការព្រួយបារម្ភថាក្មេងប្រុសដើរអត់ស្បែកជើងនោះមានអាការ (hypothermia) កម្តៅខ្លួនថយចុះខ្លាំង»។
ពេលមកដល់ មន្ត្រីបានទទួលរបាយការណ៍ទី២ អំពីគ្រោះថ្នាក់ចរាចរណ៍មួយដែលនៅជិតគ្នាដោយរថយន្ត៣គ្រឿង។ អ្នកបើកបរសង្ស័យបង្កគ្រោះថ្នាក់រួចរត់គេចខ្លួនបាត់។
របាយការណ៍បានបន្តថារថយន្តនោះត្រូវបានចុះបញ្ជីជាឈ្មោះម្តាយរបស់ក្មេងប្រុស។
ប៉ូលិសបានទូរស័ព្ទទៅស្ត្រីជាម្តាយហើយនៅពេលដែលនាងនិយាយជាមួយកូនប្រុសរបស់នាងកុមារនោះបានបន្លឺសំឡេងស្រដៀងនឹងឡានហើយប្រើកាយវិការបង្ហាញពីការបង្វិលចង្កូត។
ប៉ូលិសបន្តថា៖ «ពេលនោះយើងបានដឹងថាប្រហែលជាក្មេងនោះហើយជាអ្នកបើកបរ»។
ប៉ូលិសបាននិយាយថាបន្ទាប់ពីបានញ៉ាំសូកូឡាក្តៅនៅប៉ុស្តិ៍ប៉ូលិសនិងមានការលួងលោមខ្លះៗពីតុក្កតាខ្លាឃ្មុំ Teddy ក្មេងប្រុសនោះត្រូវបានប្រគល់ទៅដៃម្តាយរបស់គេវិញ។
ប៉ូលិសបាននិយាយថាពួកគេបានទៅជាមួយប៉ូលិសទៅកាន់កន្លែងកើតហេតុជាមួយគ្នាហើយក្មេងប្រុសនោះបានយកសោចាក់ចូលទៅខាងក្នុងចាប់ផ្តើមបើករថយន្តហើយបានជាន់លើឈ្នាន់ហ្គារ។
ប៉ូលិសបាននិយាយថា ក្មេងប្រុសនេះបានភ្ញាក់ពីដំណេកនៅពេលដែលឪពុករបស់គេទៅធ្វើការហើយបានយកសោរថយន្តរបស់ម្តាយរបស់គេ «ទៅបើកឡានលេង»។
ស្ត្រីជាម្តាយបានប្រាប់ប៉ូលិសថានាងមាន «កូនរពឹសខ្លាំង» ខណៈពេលដែលប៉ូលិសបានព្រមានឪពុកម្តាយឱ្យលាក់សោរថយន្តរបស់ពួកគេចាប់ពីពេលនេះតទៅ។
ប៉ូលិសបានសរសេរនៅក្នុងរបាយការណ៍របស់ពួកគេថា «សំណាងល្អដែរ ដែលការផ្សងព្រេងរបស់អ្នកបើកបរដ៏តូចច្រមក់នេះបានបញ្ចប់ដោយភាពរញ៉េរញ៉ៃតែបន្តិច»៕ AFP/HR