ភ្នំពេញៈ “Everything Under the Sun” ប្រែថា «គ្រប់យ៉ាងនៅក្រោមពន្លឺព្រះអាទិត្យ» គឺជាអាល់ប៊ុមទោលដែលទើបនឹងចេញផ្សាយតាមរយៈស្ទូឌីយោផ្ទាល់ខ្លួន Cerealbox Records កាលពីថ្ងៃទី ២១ ខែ មេសា ឆ្នាំ ២០២២ របស់អ្នកចម្រៀង និងអ្នកតែងនិពន្ធ ចូស្ស័រ ជាំង មកពីសិង្ហបុរី ដែលផ្លាស់មករស់នៅកម្ពុជាតាំងពីឆ្នាំ ២០១៣។
អាល់ប៊ុម ចម្រៀង ១២ បទ គឺជាការប្រមូលផ្ដុំចម្រៀងបង្ហាញពីទេពកោសល្យខាងតន្ត្រីរបស់លោក ជាំង ដោយបានឆ្លងកាត់ការសម្ដែងផ្ទាល់ជិត ១ ទសវត្សរ៍នៅទូទាំងរាជធានីនៃព្រះរាជណាចក្រកម្ពុជា និងជំនាញក្នុងការតាក់តែងបទភ្លេងដ៏ទាក់ទាញ។ ចម្រៀងទាំងអស់ក្នុងអាល់ប៊ុមត្រូវបានតាក់តែងតាំងពីលោកទើបពេញវ័យដល់វ័យកណ្ដាល។
លោកបានប្រាប់ ភ្នំពេញ ប៉ុស្តិ៍ថា៖ «ខ្ញុំចាប់ផ្ដើមសរសេរចម្រៀងឡើងវិញក្នុងអំឡុងឆ្នាំទី២ ដែលខ្ញុំផ្លាស់មកនៅភ្នំពេញ។ ប៉ុន្ដែបើនិយាយពីគំនិតនៃការបង្កើតជាអាល់ប៊ុម គឺនៅក្នុងឆ្នាំ ២០១៦។ ចូលដល់វ័យ ៤០ ឆ្នាំ ខ្ញុំ និងភរិយាចាប់ផ្ដើមនាំគ្នាគិតថា ជីវិតគឺមិនទៀងទាត់ យើងគួរតែចាប់ផ្ដើមធ្វើអ្វីដែលយើងចង់ធ្វើ។ ដូច្នេះ ខ្ញុំបង្កើតអាល់ប៊ុមនេះ ដូចជាសារចុងក្រោយរបស់ខ្ញុំទៅកាន់ពិភពលោក»។
លោកបានបន្តប្រាប់ពីអត្តន័យនៃអាល់ប៊ុមនេះថា៖ «វានិយាយអំពីរឿងខ្ញុំទាំងអស់។ ខ្ញុំគិតថា ខ្ញុំបានរកឃើញរឿងមួយចំនួនអំពីក្ដីស្រឡាញ់។ ខ្ញុំបានរៀនពីវិធីក្នុងការទប់ទល់នឹងការពិតនៃភាពមិនស្ថិតស្ថេរ។ ប៉ុន្តែមានជាច្រើនទៀតដែលខ្ញុំនៅមិនទាន់រកឃើញ។ ដូច្នេះ ខ្ញុំសរសេរអំពីគំនិតទាំងនេះ។ ខ្ញុំក៏មានបទចម្រៀងអំពីការរស់រានមានជីវិតពីនុយក្លេអ៊ែរ ខ្មោចហ្សមប៊ី ឬមនុស្សយន្ត។ ខ្ញុំមិនដឹងដែរថា វាចូលមកក្នុងចម្រៀងខ្ញុំរបៀបណា»។
អាល់ប៊ុមនេះបង្កើតឡើងនៅក្នុងស្ទូឌីយោក្នុងផ្ទះរបស់លោក ហើយលោកទើបតែបានសម្ដែងផ្ទាល់ថ្មីៗនេះ ក្រោយខកខានដល់ទៅ ២ ឆ្នាំដោយសាររោគរាតត្បាត។ បើនិយាយពីមតិយោបល់ លោកទទួលបានលទ្ធផលវិជ្ជមានពីមិត្តភក្តិ តែលោកថា វាហាក់លឿនដែរក្នុងការសរុបថា មតិយោបល់ពីអ្នកដទៃយ៉ាងណាទេពីព្រោះអាល់ប៊ុមទើបតែចេញមិនដល់ ១ ខែផង។
ឆ្លើយតបនឹងសំណួរថា ហេតុអ្វីបានជាលោកចាកចេញពីប្រទេសសិង្ហបុរី មកភ្នំពេញ លោកថា សិង្ហបុរី គឺជាទឹកដីដ៏ល្អ។ ប៉ុន្តែវាមិនបានធ្វើឱ្យលោករីករាយ។
ពេលមួយក្នុងឆ្នាំ ២០១២ ជាលើកទី២ ដែលបានមកស្រុកខ្មែររយៈពេល ២ ខែ បើទោះលោកធ្វើការងារឯកជនធម្មតា តែនៅពេលដែលដល់ពេលត្រឡប់ទៅស្រុកកំណើតវិញ លោកបែរជាមានអារម្មណ៍អាលោះអាល័យ។ ហើយបើទោះជាទៅដល់ប្រទេសលោកវិញ ក៏នៅតែនឹករឭក រហូតដល់លោកសម្រេចចិត្តផ្លាស់មកក្នុងឆ្នាំ ២០១៣។
លោក ជាំង ឱ្យដឹងដែរថា៖ «យ៉ាងណាមិញ ខ្ញុំនៅតែរីករាយទៅសិង្ហបុរីលេង ៣-៤ ខែម្ដង ដើម្បីទៅលេងឪពុកម្ដាយ មិត្តភក្ដិ បណ្ណាល័យ សារមន្ទីរ និងកន្លែងផ្សេងៗ។ ប្រទេសរបស់ខ្ញុំនៅតែល្អ»។
ក្រៅពីជាសិល្បករ លោកក៏ជាអ្នកគូររូប។ គំនូរបោះពុម្ព លើកាត និងកាតស្វាគមន៍ ដែលលោកបង្កើតជាស៊េរី Candid Cambodia គឺលក់ដាច់ខ្លាំងក្នុងចំណោមបរទេសដែលរស់នៅទីនេះ និងទេសចរ។
សិល្បករពហុជំនាញ ទាំងជាអ្នកសរសេរអត្ថបទគំនូរជីវចល គូររូបជាកម្រងសាច់រឿង សៀវភៅកំប្លែង អាជីវករ និងអ្នកបង្រៀនរូបនេះឱ្យដឹងថា ហេតុផលមួយដែលលោកចាប់ផ្ដើមក្នុងការតែងចម្រៀងម្ដងទៀតពេលផ្លាស់មកទីនេះ គឺវាមានកន្លែងជាច្រើនស្វាគមន៍តន្ត្រីករលេងបទចម្រៀងដើមរបស់ខ្លួន។
លោក ជាំង បាននិយាយថា៖ «ខ្ញុំចូលចិត្តតន្ត្រីនៅទីនេះដោយវាមានភាពប្លែកៗគ្នា ថែមទាំងសម្បូរទៅដោយតន្ត្រីករពូកែៗ។ នេះហើយដែលជំរុញឱ្យខ្ញុំព្យាយាមអភិវឌ្ឍការសម្ដែងរបស់ខ្ញុំ។ ជាក់ស្ដែង លោក ស្កត បាយវ័តធើ ជាជនបរទេសរស់នៅទីនេះ រាល់ពេលដែលឃើញគាត់មកលេងចម្រៀងដើមរបស់គាត់ ហើយឃើញទស្សនិកជនច្រៀងតាម វាជាកម្លាំងចិត្តឱ្យខ្ញុំហ៊ានលេងចម្រៀងដើមរបស់ខ្ញុំដូចគ្នាដែរ»។
ប្រសិនបើសួរថា ការច្រៀង និងការ-តែងចម្រៀង ជាអ្វីដែលលោកចង់ធ្វើរហូតមកឬយ៉ាងណា តន្រីកររូបនេះថា បើសិនជាយោងតាមសម្ដីម្ដាយរបស់លោក ពេលលោកនៅក្មេង រាល់ពេលបងប្អូនណាម្នាក់គ្រាន់តែផ្ដើម ១ ឃ្លាដំបូង លោកនឹងស្រែកច្រៀងបន្តដល់ចប់។
ប៉ុន្តែ ចំពោះការចងចាំលោកវិញ លោកថា នៅពេលមួយដែលលោកចូលប្រកួតចម្រៀងនៅសាកលវិទ្យាល័យ ដោយច្រៀងបទ «My Iron Lung» លោកទទួលបានការសាទរពីអ្នកមើលជាច្រើន។
ពេលនោះហើយដែលលោកគិតថា លោកចង់ចំណាយពេលលើកិច្ចការនេះបន្ថែម។
លោក ជាំង បន្ថែមថា៖ «ខ្ញុំក៏មិនដឹងដែរថា ហេតុអ្វីនៅតែបន្តធ្វើវា ព្រោះវាទាំងហត់ ទាំងបាក់ទឹកចិត្តពេលខ្លះ។ ប៉ុន្តែរាល់ពេលដែលខ្ញុំចង់ទម្លាក់ចុះ ទំនុកភ្លេងក៏ស្រាប់លោតមកធ្វើឱ្យខ្ញុំចាប់ផ្តើមកាន់ទូរស័ព្ទថតសំឡេងភ្លេងនោះទុក»។
សម្រាប់អាជីពតន្ដ្រីរបស់លោកនៅថ្ងៃអនាគត ជាំង បន្ដថា លោកនៅមានចម្រៀងជាច្រើនទៀតដែលលោកបានសរសេរតាំងពីជាច្រើនឆ្នាំមុននៅសិង្ហបុរី។ ប៉ុន្តែ លោកជ្រើសរើសដាក់ក្នុងអាល់ប៊ុមតែ ១២ បទ ដែលលោកគិតថា អត្ថន័យវាចូលជាមួយគ្នា។
លោក ជាំង ក៏មានគម្រោងសរសេរចម្រៀងបែប រ៉ុកសុទ្ធ តែបច្ចុប្បន្ន លោកកំពុងតែផ្ដោតទៅលើការផ្សព្វផ្សាយអាល់ប៊ុម។
តន្ត្រីករ ៤៦ ឆ្នាំរូបនេះបញ្ជាក់ថា៖ «មិនមែនគ្រប់គ្នាទេដែលអាចរស់នៅដោយពឹងទៅលើអ្វីដែលយើងចូលចិត្តតែមួយមុខ។ ប៉ុន្តែ វាមានសារៈសំខាន់ណាស់សម្រាប់ទុកចន្លោះពេលឱ្យខ្លួនឯងអាចធ្វើអ្វីដែលយើងស្រឡាញ់ ពីព្រោះវាធ្វើឱ្យយើងអាចទ្រាំទ្របានចំពោះគ្រប់យ៉ាង ដែលយើងត្រូវធ្វើដើម្បីរស់។ អ្នកត្រូវកាត់បន្ថយពេលមើលយូធូប។ ប៉ុន្តែ បើសិនជាត្រូវតែមើល សូមជួយចុចគាំទ្រយូធូបវីដេអូខ្ញុំតាមរយៈ joshuachiangmusic»។
ទស្សនិកជនដែលចង់ស្ដាប់កម្សាន្ដតន្ត្រីរបស់លោក ជាំង អាចចូលទៅកាន់ www.joshuachiangmusic.com/discography.html. តាមរយៈ Bandcamp, Spotify, Amazon Music, iTunes, Deezer៕