ក្រុងដេនផាសារ៖ ឥណ្ឌូនេស៊ីបានឱ្យដឹងពីចុងសប្ដាហ៍ថាតារាបណ្ដាញសង្គមជនជាតិរុស្ស៊ី និងស្វាមីរបស់នាងនឹងត្រូវនិរទេសចេញពីកោះបាលីបន្ទាប់ពីថតរូបអាក្រាតកាយនៅលើដើមឈើដ៏ពិសិដ្ឋមួយដោយបំពានលើវប្បធម៌ក្នុងតំបន់។
អ្នកស្រី Alina Fazleeva ដែលមានអ្នកតាមដានរាប់ពាន់នាក់នៅលើ Instagram បានថតស្រាតនៅលើដើមពោធិ៍ដែលមានអាយុ៧០០ឆ្នាំនៅប្រាសាទមួយក្នុងស្រុកថាបាណាន។
រូបភាពដែលត្រូវបានថតដោយប្តីរបស់នាង Andrey Fazleev ត្រូវបានបង្ហោះចូលទៅក្នុង Instagram បានខ្ចរខ្ចាយធ្វើឱ្យឱ្យសហគមន៍ជនជាតិបាលីមានភាពច្របូកច្របល់។
ភ្នំដើមឈើនិងលក្ខណៈធម្មជាតិផ្សេងទៀតត្រូវបានគេចាត់ទុកថាបរិសុទ្ធក្នុងវប្បធម៌ហិណ្ឌូបាលីព្រោះប្រជាជនគិតថាជាលំនៅឋានរបស់ព្រះ។
ប្រធានអន្តោប្រវេសន៍កោះបាលីលោក Jamaruli Manihuruk បានប្រាប់អ្នកយកព័ត៌មានថា៖ «ពួកគេទាំង២ត្រូវបានបង្ហាញថាបានធ្វើសកម្មភាពដែលបង្កគ្រោះថ្នាក់ដល់សណ្តាប់ធ្នាប់សាធារណៈនិងមិនគោរពបទដ្ឋានក្នុងតំបន់។ ដូច្នេះពួកគេនឹងត្រូវដាក់ទណ្ឌកម្មលើការនិរទេស»។
លោកបានបន្ថែមថា ប្ដីប្រពន្ធរុស្ស៊ីនេះនឹងត្រូវហាមប្រាមពីប្រទេសឥណ្ឌូនេស៊ី យ៉ាងហោចណាស់៦ខែហើយត្រូវចូលរួមក្នុងពិធីជម្រះបាបនៅតំបន់ពិសិដ្ឋស្របតាមជំនឿក្នុងតំបន់។
ប្ដីប្រពន្ធ Fazleeva បានសុំទោសនៅលើគណនី Instagram របស់នាងជាភាសាអង់គ្លេសនិងភាសាបាហាសាឥណ្ឌូនេស៊ីដោយទទួលស្គាល់ថានាង «បានសាងកំហុសដ៏ធំមួយ»។
នាងបាននិយាយថា៖ «មានកន្លែងពិសិដ្ឋជាច្រើននៅកោះបាលីហើយមិនមែនទាំងអស់សុទ្ធតែមានសញ្ញាព័ត៌មានអំពីវាដូចករណីរបស់ខ្ញុំទេ»។
នាងបន្តថា៖ «ហើយវាមានសារៈសំខាន់ខ្លាំងណាស់ក្នុងការចាត់ទុកទីកន្លែងនិងប្រពៃណីទាំងនេះដោយការគោរព»។
អភិបាលកោះបាលីលោក Wayan Koster បាននិយាយថារដ្ឋបាលរបស់លោកនឹងមិនអត់ធ្មត់ចំពោះអ្នកទេសចរដែលមិនគោរពវប្បធម៌សាសនាទៀតឡើយ។
មនុស្សជិត២០០នាក់ត្រូវបាននិរទេសចេញពីកោះវិស្សមកាលកាលពីឆ្នាំមុនដោយពួកគេខ្លះបំពានលើវិធានការកាត់បន្ថយការឆ្លងជំងឺកូវីដ១៩។
កាលពីខែមុនតារាសម្ដែងជនជាតិកាណាដានិងជាជំនាញសុខភាពក៏ប្រឈមមុខនឹងការនិរទេសពីកោះបាលីផងដែរបន្ទាប់ពីវីដេអូមួយបានរីករាលដាលបង្ហាញរូបកាយអាក្រាតរបស់លោកនៅឯភ្នំបរិសុទ្ធ Batur ខណៈពេលកំពុងរាំ Haka ដែលជាពិធីបុណ្យជនជាតិដើមម៉ាវរីនៅប្រទេសនូវែលសេឡង់៕ AFP/HR