The Phnom Penh Post Search

Search form




Logo of Phnom Penh Post newspaper Phnom Penh Post - សត្វស្លាបដែលស្រេកឃ្លាន​ទឹក តស៊ូ​​រស់ក្នុងបរិយាកាស​ដ៏ក្តៅហែង​របស់ឥណ្ឌា

សត្វស្លាបដែលស្រេកឃ្លាន​ទឹក តស៊ូ​​រស់ក្នុងបរិយាកាស​ដ៏ក្តៅហែង​របស់ឥណ្ឌា

Content image - Phnom Penh Post
ក្រុមអ្នកស្ម័គ្រចិត្ត​ដាក់បក្សីរងគ្រោះ​ក្នុង​ប្រអប់​ រួច​យកទៅ​កាន់​កន្លែង​ព្យាបាល។ AFP

សត្វស្លាបដែលស្រេកឃ្លាន​ទឹក តស៊ូ​​រស់ក្នុងបរិយាកាស​ដ៏ក្តៅហែង​របស់ឥណ្ឌា

ក្រុង​អាសមេដាបាដ៖ អ្នក​ស្ម័គ្រចិត្ដ​ម្នាក់​បាន​រើសសត្វ​​​ខ្លែង​ ១​ ក្បាល​ ដែល​ដេក​ស្ទើរតែស្ដូកស្តឹង​​នៅលើ​ចិញ្ចើមផ្លូវ​ឥណ្ឌា​ដ៏​ក្ដៅ​រលាកជើង ​ខណៈដែល​ព្រះសូរ្យសែង​ស្ទើរតែ​ដុត​​រោម​របស់​វា។

សត្វ​ខ្លែង ​១ ​ក្បាលនេះ​ស្ថិត​ក្នុង​ចំណោម​​​សត្វ​ស្លាប​រាប់មិនអស់​ ដែលត្រូវ​រស់​​តស៊ូ​​​នឹង​រលក​កម្ដៅ​ដ៏ពិបាកទ្រាំទ្របាន​។​

​ការចាប់ផ្តើម​ដំបូង​នៃ​រដូវក្តៅ​បាន​នាំមក​នូវ​សីតុណ្ហភាព​កំណត់ត្រា ដោយ​​ធ្វើឱ្យ​ជីវិត​មនុស្ស និង​សត្វ​ជួប​ទុក្ខ​ដូចគ្នា។

​អ្នកជំនាញ​បាន​ព្រមាន​ថា​ ការប្រែប្រួល​អាកាសធាតុ​កំពុង​ធ្វើឱ្យ​លក្ខខណ្ឌ​កម្ដៅ​បែបនេះ​កាន់តែ​ធ្ងន់ធ្ងរ និង​អាចកើត​ឡើង​ញឹកញាប់​។​

Content image - Phnom Penh Post
ពេទ្យសត្វ​ព្យាបាល​បក្សី​ដែល​ទន់ខ្សោយដោយសារ​បញ្ហា​បាត់បង់ជាតិទឹក​ពីរាងកាយ។ AFP

មន្ទីរពេទ្យ​សត្វ​មួយ​នៅ​ភាគ​ខាងលិច​នៃ​ទីក្រុង Ahmedabad បាន​ព្យាបាល​សត្វ​ស្លាប​ប្រហែល ២ ពាន់​ក្បាល​ក្នុង​រយៈពេល ១​ ខែ​កន្លងមកនេះ ដែល​ភាគច្រើនពួកវា​​ខ្សោយ និង​ខ្សោះ​ជាតិ​ទឹក​យ៉ាងធ្ងន់ធ្ងរ ហើយ​ខ្លះ​រង​ការបាក់​ស្លាប​បន្ទាប់ពី​ធ្លាក់​ពីលើ​ដើមឈើ​។​

​ដោយ​បន្ថែមថា​សីតុណ្ហភាព​បាន​កើន​ឡើងដល់ ៤៥ អង្សា​សេលោក Gira Shah សហ​ស្ថាបនិក​នៃ​មូលនិធិ​ Jivdaya Charitable Trust ដែល​គ្រប់គ្រង​មន្ទីរពេទ្យ​បាន​ប្រាប់ AFP ថា៖ «​យើង​ទទួលបាន​សត្វ​ស្លាប​ខ្វះ​ជាតិ​ទឹក​យ៉ាងហោចណាស់ ៥០ ទៅ ៦០​​ ក្បាល​ជា​រៀងរាល់ថ្ងៃ​»។

​មន្ទីរ​ពេទ្យសត្វ​ស្លាបគឺជា​មន្ទីរពេទ្យ​ដ៏​ធំ​បំផុត​មួយ​នៅក្នុង​ប្រទេស​ឥណ្ឌា ហើយ​វាត្រូវបាន​បង្កើតឡើង​ដោយ​​សមាជិក​នៃ​សាសនា Jain ដែលជា​សាសនា​ឥណ្ឌា​បុរាណ​​​ផ្សព្វផ្សាយ​អំពី​អហិ​ង្សា និង​សេចក្តីស្រឡាញ់​ចំពោះ​សត្វ​លោក​តូចធំ​ទាំងអស់​។​

Content image - Phnom Penh Post
ពេទ្យសត្វ​ព្យាបាល​បក្សី​ដែល​ទន់ខ្សោយដោយសារ​បញ្ហា​បាត់បង់ជាតិទឹក​ពីរាងកាយ។ AFP

អ្នក​ជួយសង្គ្រោះ​ស្ម័គ្រចិត្ត និង​សមាជិក​សាធារណៈបាន​ដាក់​សត្វ​ស្លាប​​ក្នុង​ប្រអប់​កេស ឬ​​កន្ត្រក​ជា​រៀងរាល់ថ្ងៃមកកាន់មន្ទីរពេទ្យ ដើម្បី​​កត់ត្រាថ្លឹង និង​ពិនិត្យ​សុខភាព​។​

​សត្វ​ស្លាប​ត្រូវបាន​ព្យាបាលប៉ុន្តែ​ប្រហែល១​​ក្នុងចំណោម​ ៤ ក្បាល​ មិន​អាច​រស់រានមានជីវិត​ទេ ដោយ​ស្ថានភាព​​ធ្ងន់ធ្ងរ​នៃ​ការ​ខះ​ជាតិ​ទឹក​របស់​ពួកវា ឬសុខភាពទ្រុឌទ្រោមខ្លាំង​ដោយសារ​អត់មានទឹកផឹករយៈ​ពេល​យូរ​។​

​សត្វ​ដែល​បាន​សង្គ្រោះ​ត្រូវបាន​រក្សាទុក​មួយរយៈ​រហូតដល់​ពួកវា​មាំទាំ​ត្រៀមខ្លួន​រួចជាស្រេច​ក្នុងការ​​​ដោះលែង​ឱ្យ​ត្រឡប់​ទៅក្នុង​ព្រៃ​។​

​សត្វ​ផ្សេង​ទៀត​ដែលមាន​​ពិការ​ខ្លាំងពេក​ដោយសារ​របួស​ត្រូវបានបញ្ជូនទៅជម្រកអចិន្ត្រៃយ៍។

Content image - Phnom Penh Post
អំឡុងពេល​រដូវ​ក្ដៅ​ហ្វូងព្រាប​មក​ផឹកទឹក ដែល​អ្នកស្ម័គ្រ​ចិត្ត​បាន​ដាក់​ឱ្យ​វា។ AFP

អ្នកមើលការខុសត្រូវ​មន្ទីរពេទ្យ Sherwin Everett ដែលបម្រើការ​ព្យាបាលសត្វ​ចាប់តាំងពី​ឆ្នាំ ២០១០ បាន​និយាយ​ថា៖ «​រលក​កម្ដៅ​ឆ្នាំនេះ​មានឥទ្ធិពលអាក្រក់បំផុត​ចំពោះ​​សត្វ​ស្លាប​ក្នុង​តំបន់​ដែលស្ទើរ​តែ​ពុំធ្លាប់ជួបប្រទះ»​។​

​រលកកម្ដៅ​​បានសម្លាប់​មនុស្ស​ជាង ៦ ៥០០ ​នាក់​នៅក្នុង​ប្រទេស​ឥណ្ឌា​ចាប់តាំងពី​ឆ្នាំ ២០១០ ប៉ុន្តែ​ពេទ្យ​សត្វ Shah និង Everett ក៏​កំពុង​អំពាវនាវ​ដល់​សាធារណជន​ផងដែរ​ឱ្យ​គិតគូរ​ពី​សុខុមាលភាព​របស់​សត្វ​ព្រៃ​ ដែល​ពួកគេ​បាន​ជួបប្រទះ​។​

​លោក Everett បាន​និយាយថា៖ «​យើង​កំពុង​រំពឹងថា​ រហូតដល់​ខែកក្កដា​នឹងមាន​រលក​កម្ដៅ​ច្រើន ហើយ​សីតុណ្ហភាព​នឹង​កាន់តែ​អាក្រក់​ទៅៗ​»។​

​លោក​បាន​បន្ថែមថា​៖ «​ឥឡូវនេះ​យើង​បានទទួល​បក្សី​ជាច្រើន​ដែល​ខ្វះ​ជាតិ​ទឹក​។ ប៉ុន្តែ​ខែ​ខាងមុខនេះ​ ស្ថានភាព​​ទំនង​ជា​រឹត​តែ​អាក្រក់​ណាស់​​សម្រាប់មនុស្សសត្វ​»​៕​ AFP/HR

Content image - Phnom Penh Post
សត្វ​ស្លាប​ធ្លាក់​ពី​លើ​សម្បុក ដោយសារ​កម្ដៅ និង​ការ​ខ្សោះជាតិទឹក។ AFP

អត្ថបទគួរចាប់អារម្មណ៍