The Phnom Penh Post Search

Search form




Logo of Phnom Penh Post newspaper Phnom Penh Post - កុមារា​ដំបៅមាត់​ពីការ​ដុត​ភ្លើង និង​​​ស្នាម​របួស​​សុស​សាច់ក្រោម​ស្នាដៃ​ឪពុក​ចុង ​​ទទួល​​ពន្លឺ​ជីវិត​ថ្មី​

កុមារា​ដំបៅមាត់​ពីការ​ដុត​ភ្លើង និង​​​ស្នាម​របួស​​សុស​សាច់ក្រោម​ស្នាដៃ​ឪពុក​ចុង ​​ទទួល​​ពន្លឺ​ជីវិត​ថ្មី​

Content image - Phnom Penh Post
លោក ផន ផល្លា ជាអ្នក​ធ្វើ​អំពើ​មនុស្សធម៌​ បាន​ធានាចិញ្ចឹម​បីបាច់​កុមារ​កម្សត់​នេះ​ក្នុង​នាម​ជា​កូន​ទី១០៨។ ហ្វេសប៊ុក

កុមារា​ដំបៅមាត់​ពីការ​ដុត​ភ្លើង និង​​​ស្នាម​របួស​​សុស​សាច់ក្រោម​ស្នាដៃ​ឪពុក​ចុង ​​ទទួល​​ពន្លឺ​ជីវិត​ថ្មី​

ភ្នំពេញ៖ មាត់​នៅតែ​ខំ​ទំពានំ​កញ្ចប់​ ទោះជា​មាន​ដំបៅ​ធំមួយ និង​ស្នាម​ដេរ​ ឯភ្នែក​នៅតែ​ខំ​បើក​សម្លឹង​​មក​កាមេរ៉ាភ្លឹះៗ​​ ទោះជា​រង្វង់​ភ្នែក​ និងចិញ្ចើម​បង្ហាញ​នូវ​ស្នាម​ផ្លែ​ ហើយ​ដៃនៅតែ​អាច​ចាប់​កាន់​ និង​បេះ​នំ​បញ្ចុក​មាត់​ បើទោះបីជា​មាន​សណ្ឋាន​ក្រងេង​ក្រងង់ក្ដី។

តាំងពី​ក្បាល​រហូត​ដល់​ចុង​ជើង កុមារា​តូច​អាយុ​ប្រមាណ ៥ ​ឆ្នាំ បានរង​របួស​សុស​សាច់​ពី​ការ​វាយ​ធ្វើ​បាប​ក្រោម​កណ្ដាប់​ដៃ​ដ៏​ព្រៃ​ផ្សៃ​របស់​ឪពុក​ចុង។

ដោយ​មើល​ឃើញ​ការ​ថត​វីដេអូ​បង្ហោះ​លើ​បណ្ដាញ​សង្គម​ លោក ផន ផល្លា ជាអ្នក​ធ្វើ​អំពើ​មនុស្សធម៌​ ដែល​បាន​បង្កើត​​​អង្គការ​មណ្ឌលកុមារ​កំព្រា​មែកឈើ បាន​ធានាចិញ្ចឹម​បីបាច់​កុមារ​កម្សត់​នេះ​ក្នុង​នាម​ជា​កូន​ទី១០៨។

លោក​បាន​សរសេរ​រៀបរាប់​អំពី​ស្ថានភាព​របស់​កុមារា ផល្លា កែវនុរក្ស (ជាឈ្មោះ​ដែល​លោក ផល្លា បាន​ដាក់​ឱ្យ​) ថា​៖ «​ខ្លួន​ជា​ឪពុក​ចុង តែ​អ្នក​សាហាវ​ខ្លាំង​ណាស់។ អ្នក​បាន​ធ្វើ​បាប​ក្មេង​យ៉ាង​ឃោរ​ឃៅ​បំផុត។ ក្បាល​របស់​ក្មេង​ដ៏​កម្សត់​នេះ ត្រូវ​បាន​ឪពុក​ចុង​រូប​នេះ​វ៉ៃ​បែក​ស្ទើរ​សុស​ក្បាល​​​ ត្រចៀក​ត្រូវបាន​មួល​ឡើង​ដំបៅ ចិញ្ចើម​មាន​ស្នាម​បែក​ជា​ច្រើន។ ចំណែក​ឯ​មាត់​របស់​ក្មេង​នេះ​ទៀត​សោត ត្រូវបាន​ឪពុក​ចុង​រូប​នោះ​ចាប់​ហែក​រហូត​ដល់​រយះ»។

Content image - Phnom Penh Post
កុមារា ផល្លា កែវនុរក្ស ក៏​បា​នចូលរួម​ជាមួយ​កូនៗ​​ដទៃ​ទៀតនៅ​អង្គការ​មណ្ឌលកុមារ​កំព្រា​មែកឈើ។ ហ្វេសប៊ុក

លោក ផល្លា បាន​បន្ដសំណេរ​នៅលើ​ហ្វេសប៊ុក​ថា​៖ «​បន្ថែម​លើស​ពីនេះ កាលពី​ថ្មីៗ ដំបៅ​ដ៏ធំ​ដែល​នៅ​ជាប់​មាត់ មិន​ទាន់​ជា​សះស្បើយ​នោះ គឺជា​ទង្វើ​ដ៏​ព្រៃ​ផ្សៃ​បំផុតហើយ​ ព្រោះ​ថា​ឪពុក​ [ចុង] រូប​នោះ​បាន​យក​ភ្លើង​មក​ដុត​មាត់​របស់​គ្នា។ ងាកមកក និង​ខ្លួន​ប្រាណ​របស់​ក្មេង​នេះវិញ គឺមាន​ស្លាក​ស្នាម​ដ៏​គួរ​ឱ្យ​ខ្លោច​ចិត្ដ​បំផុត​»។

បុរស​មកពី​ខេត្ដ​ព្រៃវែង វ័យ​ទើបតែ​ជាង​ ៣០​ឆ្នាំ​រូបនេះបាន​ឱ្យដឹងថា លោក​បាន​ចុះ​ធ្វើការ​ភ្លាមៗ​ជាមួយអាជ្ញាធរ​មូលដ្ឋាន​ រួមទាំង​មន្ទីរ​សង្គម​កិច្ច​ស្រុក ដើម្បី​សង្គ្រោះ​ក្មេងប្រុស​រូប​នេះ ក្រោយ​បាន​ទទួល​ព័ត៌មាន​អំពី​ស្ថានភាព​ដ៏​កម្សត់​របស់​រូប​គេ។

លោក ផល្លា ដែល​សូម្បីតែ​ខ្លួន​លោក​ក៏​ទើប​ផុត​ពី​យមរាជ​ពេល​ឆ្លង​ជំងឺ​កូវីដ ១៩ នោះ បាន​និយាយ​ពេល​ឃើញ​រូបភាព​ដ៏​គួរ​ឱ្យ​សង្វេគ​របស់​កុមារារូប​នោះថា​៖ «​ខ្លោច​ចិត្ដ​ណាស់​បង​ប្អូន​អើយ ពេល​ខ្ញុំបាន​កាត់​សក់ឱ្យ​គេ ដុះ​ក្អែល​ឱ្យ​គេ និង​លាង​របួស​ឱ្យ​គេ គឺ​ខ្ញុំ​អាច​សន្និដ្ឋាន​បានថា​ ក្មេង​នេះ​ត្រូវបាន​ឪពុក​ចុង​វាយ​ធ្វើ​បាប​ជាយូរយារ​ណាស់​មកហើយ​»។

Content image - Phnom Penh Post
កុមារា ផល្លា កែវនុរក្ស ​មាន​អារម្មណ៍​ល្អ​ប្រសើរ​ឡើង​វិញដោយ​ឈប់​ផ្ដាច់​ខ្លួន​នៅ​តែ​ឯង ឬ​មាន​សភាព​ភ័យ​ខ្លាច​ដូច​មុន​ទៀត។ ហ្វេសប៊ុក

ស្ថាបនិក ​អង្គការ​មណ្ឌលកុមារ​កំព្រា​មែកឈើរូប​នេះ បាន​បន្ថែម​ទៀត​ថា​៖ «​ណាស់់ហើយ ខ្ញុំ​បាន​ផ្ដែ​ផ្ដាំ​ឱ្យ​ក្រុម​ការងារ​ និង​បុគ្គលិក​របស់​ខ្ញុំ ​​ថែទាំ​ក្មេង​នេះ​ឱ្យ​ល្អ​បំផុត​»។

​រយៈ​ពេល​ ១ សប្ដាហ៍​កន្លង​ផុតទៅលោកផល្លាបាន​បង្ហោះ​រូប​កុមារាផល្លាកែវនុរក្សជាមួយ​ការ​បង្ហាញ​ភាព​ស្រស់​បំព្រង​នៃ​ជីវិត​ថ្មី​របស់​កុមារ​ ដែល​ធ្លាប់​រង​នូវ​ទារុណ​កម្ម​ឥត​ស្រាកស្រាន្ដ​ពី​កណ្ដាប់​ដៃ​ឪពុក​ចុង​ដ៏​ឃោរឃៅ។

លោក​បាន​និយាយថា​៖ «​ខ្ញុំ​បាន​កត់​សម្គាល់​ឃើញ​ថាក្មេង​នេះ​មាន​អារម្មណ៍​ល្អ​ប្រសើរ​ឡើង​វិញដោយ​គេ​ឈប់​ផ្ដាច់​ខ្លួន​នៅ​តែ​ឯង ឬ​មាន​សភាព​ភ័យ​ខ្លាច​ដូច​មុន​ទៀត​ហើយ»។

Content image - Phnom Penh Post
កុមារា​តូច​អាយុ​ប្រមាណ ៥​ឆ្នាំ រង​របួស​សុស​សាច់​ពី​ការ​វាយ​ធ្វើ​បាប​ក្រោម​កណ្ដាប់​ដៃ​ដ៏​ព្រៃ​ផ្សៃ​របស់​ឪពុក​ចុង។ ហ្វេសប៊ុក

លោក​បាន​បន្ដថា​៖ «​កែវនុរក្សចូលចិត្ដ​រត់​លេងចូលចិត្ដ​ជជែក​គ្នាមាន​ស្មារតី​ល្អនិង​មាន​ភាព​ស្វាហាប់​ណាស់។ រូប​គេ​ក៏​បា​នចូលរួម​ជាមួយ​កូនៗ​របស់​ខ្ញុំ​ដទៃ​ទៀត​ដែរ​»។

យ៉ាងណាមិញលោក​បាន​បញ្ជាក់​ថា កុមារា​រូប​នេះ​កំពុង​បានទទួលការ​ព្យាបាល​របួស​ដែល​ឪពុក​ចុង​បានដុត​ឱ្យដំបៅ​ ហើយ​ក្រោយ​ការ​ព្យាបាល​រួចមាត់​ឆែប​របស់​ កែវនុរក្ស ក៏​នឹង​ត្រូវបាន​ធ្វើ​ការ​វះ​កាត់​កែកុន​ជា​ថ្មី។

លោកផល្លាដែល​កាលពី​ខែសីហាឆ្នាំ​មុន​ ត្រូវបាន​ព្រះមហាក្សត្រ​ប្រោស​ព្រះ​រាជទាន​តែងតាំង​ជាទី​ប្រឹក្សា​របស់​រាជ​រដ្ឋាភិបាលបាន​ឱ្យ​ដឹងថា​៖ «សង្ឃឹមថាកែវនុរក្សនឹង​ទទួល​បាន​បបូរ​មាត់​ស្អាត​បាត​មក​វិញ​»៕

Content image - Phnom Penh Post
លោក ផន ផល្លា ជាអ្នក​ធ្វើ​អំពើ​មនុស្សធម៌​ បាន​ធានាចិញ្ចឹម​បីបាច់​កុមារ​កម្សត់​នេះ​ក្នុង​នាម​ជា​កូន​ទី១០៨។ ហ្វេសប៊ុក

អត្ថបទគួរចាប់អារម្មណ៍