The Phnom Penh Post Search

Search form




Logo of Phnom Penh Post newspaper Phnom Penh Post - វណ្ណកម្ម​ភាពយន្ត​​អប់រំ​ទី​២ ផលិតករ ហ៊ុយ យ៉ាឡេង ត្រៀម​សម្ពោធ និង​ចាក់​​បញ្ចាំង​នៅ​​​សប្តាហ៍​ក្រោយ​

វណ្ណកម្ម​ភាពយន្ត​​អប់រំ​ទី​២ ផលិតករ ហ៊ុយ យ៉ាឡេង ត្រៀម​សម្ពោធ និង​ចាក់​​បញ្ចាំង​នៅ​​​សប្តាហ៍​ក្រោយ​

Content image - Phnom Penh Post
រឿង«គ្រោះ​ជីវិត​កូវីដ ១៩​» ជា​កុន​ខ្នាតធំ​សាច់រឿង​បែបអប់រំទី២ បន្ទាប់ពី​រឿង «​ដើម្បី​កូន»​ វណ្ណកម្ម​របស់​ផលិត​ករ ហ៊ុយ យ៉ាឡេង​ ត្រៀមសម្ពោធ និង​ចាក់បញ្ចាំង។ សហ​ការី

វណ្ណកម្ម​ភាពយន្ត​​អប់រំ​ទី​២ ផលិតករ ហ៊ុយ យ៉ាឡេង ត្រៀម​សម្ពោធ និង​ចាក់​​បញ្ចាំង​នៅ​​​សប្តាហ៍​ក្រោយ​

ភ្នំពេញៈ ​វណ្ណកម្ម​ថ្មី​រឿង​ «គ្រោះ​ជីវិត​កូវីដ ១៩-Covid-19 Life Crisis» ដែល​​អ្នក​និពន្ធ និង​ផលិតករ​ បាន​ខិតខំ​​សម្រិតសម្រាំង​ដក​ស្រង់​​ចេញ​ពី​ស្ថានភាព​​នៃ​ជីវិត​ពិតៗ​ នាគ្រា​​មនុស្ស​ជាតិ​​បាន​ជួប​​នូវ​វិបត្តិ​សកល​ ដ៏​ស្មុគស្មាញ​​មួយ​ ទូទាំង​ពិភព​លោក​​​បង្ក​ឡើង​​ដោយ​ជំងឺ​រាតត្បាត​កូវីដ​ ១៩ នោះ នឹង​ចាក់​បញ្ចាំង​តាម​រោងកុន​នានា​ក្នុង​ពេល​ឆាប់​នេះ ក្រោយ​ពី​​ពន្យារ​ពេលជិត​ ២ ​ឆ្នាំ​មក។

ខ្សែ​ភាពយន្ត​រឿង​​ «គ្រោះ​ជីវិត​កូវីដ​ ១៩ Covid-19 Life Crisis» ដែល​ផលិតករ​បាន​អះអាង​ថា ​ចង់​ឱ្យ​អ្នក​ទស្សនា​អាច​ទទួល​​​បាន​​​គំនិត​បែប​អប់រំ​​ទៅ​វិញ ​​ប្រើ​ក្នុង​ជីវិត​ផ្ទាល់​ខ្លួន​ ក្រោយ​​​​​ពី​ទស្សនា​ចប់​នោះ នឹង​​ត្រូវ​ចាក់​​បញ្ចាំង​​​នៅ​គ្រប់​​រោង​ភាពយន្ត​​ក្នុង​​ប្រទេស​កម្ពុជា នៅ​ថ្ងៃ​ព្រហស្បតិ៍​ ទី ១៩ ឧសភា ២០២២ ខាង​មុខ​នេះ​តទៅ។

Content image - Phnom Penh Post

លោក ហ៊ុយ យ៉ាឡេង ដែល​មហាជន​​​ស្គាល់​ថា គឺ​ជា​បុរស​ស៊ូ​ខ្លាំង​នឹង​ការងារ​វិស័យ​ភាពយន្ត​ ដោយ​​​លោក​តែងតែ​យក​​ខ្លួន​​​ទៅ​ប្រឡូក​ក្នុង​កុន​នីមួយៗ សឹង​តែ​​គ្រប់​រឿង ឬ​គេ​អាច​ហៅ​លោក​ថា «​​អ្នក​និពន្ធ​រឿង​​ខ្លួន​ឯង សម្តែង​ខ្លួន​ឯង​» ដោយសារ​លោក​ដើរ​តួ​ជា​អ្នក​និពន្ធ ផលិតករ ចាងហ្វាង និង​តួ​​សម្តែង​​នោះ បាន​​បង្ហើប​ពី​ហេតុផល ​ដែល​ជំរុញ​ឱ្យ​រូប​លោក ងាក​មក​ផលិត​​កុន​បែប​អប់រំ ឬ​កុន​​ជីវិត​​​ ខណៈ​រឿង ​​«គ្រោះ​ជីវិត​កូវីដ ១៩-Covid-19 Life Crisis» នេះ​គឺ​ជា​សមិទ្ធផល​​នៃ​ការ​ផលិត​​កុន​​​​អប់រំ​បែប​ជីវិត​ពិត​​​ទី២ នា​អំឡុង​​​ឆ្នាំ​ ២០២១-២០២២ បន្ទាប់​ពី​កុនបែប​​អប់រំ​ ទី១ រឿង «ដើម្បី​កូន-Fathers​» ផលិត​នៅ​ឆ្នាំ​ ២០២០ ទទួល​បាន​​ការ​គាំទ្រ​ខ្លាំង​​រួច​មក។

លោក ហ៊ុយ យ៉ាឡេង ​ប្រាប់ ​ភ្នំពេញ​ ប៉ុស្តិ៍​ ពី​មូលហុត និង​ដំណើរការ​ផលិត​កុន​​​ ដែល​ចំណាយ​ទុន​សរុប​​ចំនួន​ ៨ ម៉ឺន​ដុល្លារ (ចំណាយ​ថត ៧ ម៉ឺន​ដុល្លារ និង​ចាយ​ ១ ម៉ឺន​ដុល្លារ ​ផ្នែក​​ទីផ្សារ​ផ្សព្វផ្សាយ)​​​ ថា៖ «​មូលហេតុ​ ដែល​ខ្ញុំ​​​ផលិត​​​ខ្សែ​ភាពយន្ត​រឿង ​«គ្រោះ​ជីវិត​កូវីដ ១៩-Covid-19 Life Crisis » នេះ​ឡើង​​ដោយសារ​ជំងឺ​​​​កូវីដ​ ១៩ គឺ​ជា​វិបត្តិ​សកល​មួយ​ពិភព​​​លោក​បាន​ជួប​ប្រទះ​នៅ​ចុង​ឆ្នាំ​ ២០១៩ ដែល​​មនុស្ស​គ្រប់​រូប ​គួរ​តែ​ចងចាំ​វា។ ​ម្យ៉ាង​ទៀត ​​​ការ​រៀបចំ​ផលិត​​កុន​នេះ ដោយសារ​​​តែ​មាន​​វិបត្តិ​កូវីដ​ ១៩ ហើយ​​រោង​​​កុន​​​នានា ក៏​​ត្រូវ​​បិទ​​ទ្វារ​​ទៀត​។ កុន​​នេះ​​បាន​​​ថត​ ជា​ ២​ ​ដំណាក់​កាល​ គឺ​​​ដំណាក់កាល​ទី១ នៅ​​ពេល​​​​គេ​​បិទ​ខ្ទប់​ទីក្រុង​​នៅ​​ឆ្នាំ ២០២១ និង​ដំណាក់កាល​​ទី​២​ ថត​នា​ពេល​​ជំងឺ​​កូវីដ ​មាន​ស្ថានភាព​ប្រសើរ​​​​បន្តិច និង​ត្រូវ​បាន​គេ​អនុញ្ញាត​ឱ្យ​​ដើរ​ហើរ​វិញ​នោះ។ ​សាច់​រឿង​​​បាន​​ថត​​​ចប់​នៅ​ត្រឹម​ពេល​​មាន​​ព្រឹតិ្តការណ៍​ឆ្លង​សហគមន៍​ធំ​តែ​ម្តង ដែល​​ប្រើ​ពេល​ថត​ ១​ ខែ​​ ហើយ​ យើង​​ក៏​ទុក​ពេល​​ចោល​​​ជិត​ ២ ឆ្នាំ​ដែរ​»។

លោក​​បញ្ជាក់​ពី​ហេតុ​ផល​​ទៀត​ថា៖ «​ហើយ​​​ម្យ៉ាង​ទៀត ខ្ញុំ​​​ក៏​​ចង់​ផលិត​រឿង​នេះ ​ឡើង​លក្ខណៈ​​​បែប​ប្រវត្តិ​សាស្រ្ត​​មួយ​​​​​ទុក​ឱ្យ​កូន​ខ្មែរ​ជំនាន់​
ក្រោយ​បាន​ចងចាំ​​ថា ​ប្រទេស​កម្ពុជា ​យើង​ក៏​បាន​ជួប និង​ឆ្លង​កាត់​​នូវ​រឿង​វិបត្តិ​កូវីដ​នេះ​ដែរ។ ដោយសារ​​ទទួល​​បាន​ការ​គាំទ្រ​​ច្រើន​​​ពី​ការ​​ផលិត​​កុន​​បែប​អប់រំ​ទី​១​ ​រឿង ​«ដើម្បី​កូន-Fathers» ​នោះ ​ទើប​​ជំរុញ​ឱ្យ​រូប​ខ្ញុំ ​ចង់​​ផលិត​កុន​ថ្មី​បែប​ជីវិត​​ម្តង​ទៀត​ គឺ​រឿង​ ​«គ្រោះ​ជីវិត​កូវីដ​ ១៩​» ​​បែប​​​អប់រំ​​​ទៀត​។

ដោយ​ឡែក​សាច់​រឿង​វិញ​ គឺ​លោក​បាន​​​​លើក​​យក​ ឬ​​ផ្តោត​​​លើ​ការ​ប្រកប​​មុខ​របរ​កំពុង​តែ​ពេញ​និយម ឬ​ផ្ទុះ​​​ខ្លាំង​​នៅ​ក្នុង​​​សង្គម​ខ្មែរ​​​ បច្ចុប្បន្ន​ (គឺ​​របរ​​លក់​​​តាម​​​អនឡាញ និង​​​ជា​ភ្នាក់ងារ​អចលនទ្រព្យ)​ ជួប​បញ្ហា​​ចាក់​ស្រែះ ដោយសារ​​វិបត្តិ​កូវីដ​ ​ខណៈ​​ជាក់​ស្តែង​មុខ​​របរ​ទាំង​នេះ​ ភាគ​ច្រើន​ក៏​មាន​លក្ខណៈ​ខុស​​ប្រក្រតី​ គឺ​​​បោកប្រាស់​គ្នា​​ផង​​ដែរ​។ លោក ហ៊ុយ យ៉ាឡេង ជា​ចាងហ្វាង​ផលិតកម្ម​កថាជ័យ ​រៀបរាប់​ថា៖ «សាច់រឿង​ដក​ស្រង់​​យក​​រឿង​ពិត​​​ពី​​នេះ​​បន្តិច ពី​នោះ​បន្តិច (​ចេញ​ពី​ខ្ញុំ​ខ្លួន​ឯង​ខ្លះ​ ពី​មិត្ត​​ភក្តិ​ខ្លះ ​ដែល​​​​ប្រកប​របរ​រកស៊ី​តាម​អនឡាញ និង​​​ផ្នែក​អចលន​ទ្រព្យ) ដែល​​​ជួប​បញ្ហា​ទាំង​អស់​គ្នា​ នាគ្រា​ជួប​វិបត្តិ​កូវីដ​ ១៩​​។ ដោយសារ​តែ​ឃើញ​ការ​ប្រកប​មុខ​​​​របរ​នេះ​ ​សុទ្ធ​សឹង​​តែ​​មាន​​លក្ខណៈ​​បោកប្រាស់​​នោះ ទើប​ខ្ញុំ​ចង់​ផលិត​ជា​កុន​ឡើង​​​​ដើម្បី​ពញ្ញាក់ ឬ​​ទាញ​ចំណាប់​អារម្មណ៍​បងប្អូន​ខ្មែរ​ យើង​ឱ្យ​មាន​ការ​ប្រុងប្រយ័ត្ន​។ ​​​ចំណុច​​​សំខាន់​មួយ​​ទៀត ចង់​ចែក​​រំលែក​​បទពិសោធ​ជីវិត​ទៅ​ទស្សនិកជន ក្រោយ​ពី​បាន​ទស្សនា​ចប់​មិន​ត្រឹមតែ​​បាន​​​ភាព​រីករាយ​​ផ្នែក​អារម្មណ៍​​​​នោះ​ទេ គឺ​​បាន​​បទពិសោធ​ថ្មីៗ ជា​ការ​អប់រំ​ទៀត​ផង។ ​​កន្លង​មក​ បើ​តាម​​​សង្កេត​នោះ យើង​និយម​​ផលិត​កុន​បែប​រឿង​ខ្មោច ​តម្រូវ​​តាម​​​ចិត្ត​​យុវវ័យ ​ដែល​ទស្សនា​ចប់​មិន​ទទួល​​បាន​​ផល​អ្វី​។

Content image - Phnom Penh Post
លោក ហ៊ុយ យ៉ាឡេង ជា​តួ​សម្តែងផង និង​ចាង​ហ្វាង​ផលិត​កម្ម​ផង​​​។ រូបថត សហ​ការី

តែ​លើក​នេះ​​ ភាពយន្ត​​រឿង​​​ ​«គ្រោះ​ជីវិត​កូវីដ ១៩» យើង​ចង់​ឱ្យ​ពួក​គាត់​ទស្សនា​​ចប់​​ ហើយ​ក៏​អាច​ទទួល​​​​បាន​​​គំនិត​​បែប​អប់រំ​ទៅ​វិញ​ផង​ដែរ សម្រាប់​ប្រើ​ជា​បទពិសោធ​ថ្មី​នៅ​ក្នុង​ជីវិត​​ផ្ទាល់​ខ្លួន​ផង​ដែរ​»។

រឿង ​«គ្រោះ​ជីវិត​កូវីដ ១៩» ក៏​មាន​ចំណុច​​ពិសេស​ ​និង​មាន​ឧបសគ្គ​ផង​ដែរ​ មុន​នឹង​បាន​យក​មក​ត្រៀម​ចាក់​បញ្ចាំង​​តាម​រោងកុន​នាពេល​ឆាប់ៗ​នេះ​។ លោក ហ៊ុយ យ៉ាឡេង បាន​ឱ្យ​ដឹង​​ថា​៖ «ចំណុច​ពិសេស​ គឺ​យើង​​​មាន​​ការ​បញ្ចូល​​អក្សរ​រត់​ពី​ក្រោម ២​ភាសា​ (ចិន និង​អង់គ្លេស) ហើយ​ក៏​​​បញ្ចូល​​តួ​អង្គ ជា​អ្នក​វិនិយោគ​​​ចិន ដែល​កំពុង​តែ​​​មក​រក​ស៊ី​​នៅ​ស្រុក​ខ្មែរ​ ជាមួយ​​តួ​ប្រុស​ក្នុង​រឿង។ សម្រាប់​​ឧបសគ្គ​នៃ​ការ​ផលិត​កុន​នេះ​វិញ​ កត្តា​ចម្បង​នោះ ​គឺ​​ដោយសារ​វិបត្តិ​កូវីដ​ ១៩ រយៈពេល​ ២ ​ឆ្នាំ​នេះ សម្រាប់​អ្នក​មាន​​មុខ​របរ​ជា​អ្នក​​ផលិត​កុន​ដូចជា​រូប​ខ្ញុំ ដែល​ពុំ​មាន​មុខ​របរ​ផ្សេង​ក្រៅ​​ គឺ​ត្រូវ​ខ្ចី​លុយ​​ពី​ធនាគារ ដើម្បី​បន្ត​ផ្គត់ផ្គង់​ជីវិត​នៃការ​ថត​ខ្សែ​ភាពយន្ត​នេះ ​ឱ្យ​បាន​ចប់​ និង​ត្រៀម​​ចាក់​បញ្ចាំង​ក្រោយ​​ពេល​ស្ថានភាព​​​ប្រសើរ ឬ​​​​រោងកុន​បើក​ឡើង​​វិញ។ តែ​​ប្រសិន​បើ​​កុន​មិនមាន​អ្នក​គាំទ្រ​នោះ​ទេ មាន​ន័យ​ថា ផលិតករ​​នឹង​​ត្រូវ​ប្រឈម​រឿង​ធំ​ គឺ​ផលិតកម្ម​យើង​ដួល​​តែ​ម្តង​ដោយ​ភាព​ក្ស័យធន។​

តែ​យ៉ាង​ណា​ផលិតករ​រូប​នេះ ក៏​សប្បាយ​ចិត្ត​ដែរ​ ដោយ​កុន​របស់​យើង​ត្រូវ​បាន​​ចាក់​​បញ្ចាំង​នៅ​តាម​រោងកុន​នានា​នៅ​ថ្ងៃទី​ ១៩ ខែ​ ឧសភា ឆ្នាំ​ ២០២២ ខណៈ​កម្មវិធី​សម្ពោធ​ខ្សែ​ភាពយន្ត​ខ្មែរ​​រឿង «គ្រោះ​ជីវិត​កូវីដ ១៩» នេះ​​នឹង​​​ប្រារព្ធ​នៅ​ថ្ងៃ​ចន្ទ ទី ១៦ ខែ​ឧសភា​នេះ នៅ​រោង​ភាពយន្ត​លេជេន ផ្សារ​ទំនើប​អេដេនហ្គាដេន នៅ​​វេលា​ម៉ោង ៥ និង ៣០ ​នាទី៕​

អត្ថបទគួរចាប់អារម្មណ៍