.jpg)
ស្នាដៃគំនូរប្រភេទជាវិចិត្រកម្មពណ៌ទឹក។ Facebook-So Ben
ភ្នំពេញៈ ដើម្បីលើកស្ទួយតម្លៃសិល្បៈផ្នែកវិចិត្រកម្ម និងបង្កើតឱ្យជាព្រឹត្តិការណ៍ធំមួយប្រចាំឆ្នាំនោះ ទើបក្រសួងវប្បធម៌ និងវិចិត្រសិល្បៈ រៀបចំឱ្យមានកម្មវិធីមហោស្រពសិល្បៈជាតិគំនូរវិចិត្រកម្មពណ៌ទឹកជាលើកដំបូងក្នុងប្រទេសកម្ពុជា ក្រោមប្រធានបទ «ជីវិត និងធម្មជាតិ ឆ្នាំ២០២២»។
ក្រសួងវប្បធម៌ និងវិចិត្រសិល្បៈ តាមរយៈនាយកដ្ឋានសិល្បៈសូនរូប និងសិល្បៈសិប្បកម្មបានរៀបចំមហោស្រពសិល្បៈជាតិគំនូរវិចិត្រកម្មពណ៌ទឹកជាលើកដំបូង ក្រោមប្រធានបទ «ជីវិត និងធម្មជាតិ ឆ្នាំ ២០២២» ខណៈនាយកដ្ឋានសិល្បៈសូនរូប និងសិល្បៈសិប្បកម្មបានជូនដំណឹងតាំងពីខែមីនា ឆ្នាំ ២០២២ មក។
បើតាមគម្រោងនោះ កម្មវិធីមហោស្រពសិល្បៈជាតិគំនូរវិចិត្រកម្មពណ៌ទឹកនេះ នឹងត្រូវធ្វើតាំងពីថ្ងៃទី ៧-៨-៩ ខែ មេសា ឆ្នាំ ២០២២ មកម្ល៉េះ តែដោយសារមានការប្រែប្រួលនោះ ទើបត្រូវឱ្យពន្យារពេលមកធ្វើនៅថ្ងៃទី ១៨-១៩-២០ ក្នុងខែឧសភា ឆ្នាំ ២០២២ វិញ។
នេះបើយោងតាមសេចក្តីជូនដំណឹងទៅដល់វិចិត្រករ សិល្បករ សិប្បករ សិស្ស-និសិ្សត មហាជនទូទៅ កាលពីថ្ងៃទី ៦ ខែ មេសា ឆ្នាំ ២០២២ កន្លងមកនោះថា៖ «គណៈកម្មការរៀបចំមហោស្រពសិល្បៈជាតិស្តីពីគំនូរវិចិត្រកម្មពណ៌ទឹក សូមគោរពជម្រាបជូនវិចិត្រករ បេក្ខជន-បេក្ខនារី សិប្បករ ទាំងអស់ជ្រាបថា នាយកដ្ឋានសិល្បៈសូនរូប និងសិល្បៈសិប្បកម្ម សូមលើកពេលវេលាប្រារព្ធពិធីបើកសម្ពោធមហោស្រពសិល្បៈជាតិស្តីពីគំនូរវិចិត្រកម្មពណ៌ទឹក ពីថ្ងៃទី ៧-៩ ខែ មេសា ឆ្នាំ ២០២២ មកថ្ងៃទី ១៨-២០ ខែ ឧសភា ឆ្នាំ ២០២២»។
លោក ឈម សុធី ជាប្រធាននាយកដ្ឋានសិល្បៈសូនរូប និងសិល្បៈសិប្បកម្ម។ រូបថត ហ្វេសប៊ុក
លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម បានបង្ហើបឱ្យដឹងពីការរៀបចំកម្មវិធីមហោស្រពជាលើកដំបូងនេះថា៖ «នេះជាលើកទី១ ហើយ ដែលយើងធ្វើមហោស្រពគំនូរវិចិត្រកម្មពណ៌ទឹក។ ប្រសិនបើនៅបរទេសវិញ កម្មវិធីនេះគេពេញនិយមណាស់។
យើងក៏សង្ឃឹមថា នឹងមានការប្រារព្ធឡើងជារៀងរាល់ឆ្នាំ ដើម្បីបានផ្សព្វផ្សាយទៅកាន់អន្តរជាតិ ដូចជានៅប្រទេសអង់គ្លេស បារាំងជាដើម និងលើកស្ទួយដល់តម្លៃសិល្បៈផ្នែកវិចិត្រកម្មខ្មែរ។ ប៉ុន្តែយើងរៀបចំធ្វើគំនូរវិចិត្រកម្មពណ៌ទឹកនេះដែរ តែមានលក្ខណៈតូចតាចនៅតាមវិចិត្រសាលនានា នៅក្នុងរាជធានីភ្នំពេញ។ ឆ្នាំ ២០២២ នេះ នាយកដ្ឋានសិល្បៈសូនរូប និងសិល្បៈសិប្បកម្មប្រារព្ធបើកមហោស្រពជាលក្ខណៈជាតិតែម្តង។ វិចិត្រករ អ្នកមានវិជ្ជាជីវៈផ្នែកគំនូរពណ៌ទឹក ត្រូវបានលើកទឹកចិត្តឱ្យចូលរួមប្រឡងប្រកួតប្រជែង៕
