.jpg)
សាស្ត្រាចារ្យស្រាវជ្រាវអាណាលីហ្សាប៉ូលl ប្រមូលផលរុក្ខជាតិដែលដាំដុះនៅលើដីព្រះចន្ទ។ AFP
ក្រុងវ៉ាស៊ីនតោន៖ វាគ្រាន់តែជាដីតូចមួយតែវាជាជំហានលោតផ្លោះដ៏ធំសម្រាប់ចំណេះដឹងរបស់មនុស្សលើវិស័យកសិកម្មក្នុងលម្ហ។ អ្នកវិទ្យាសាស្ត្របានដាំដុះរុក្ខជាតិជាលើកដំបូងនៅក្នុងដីដែលនាំយកមកពីឋានព្រះចន្ទដោយអវកាសយានិករបស់ Apollo។
ក្រុមអ្នកស្រាវជ្រាវសង្ឃឹមថា ថ្ងៃណាមួយពួកគេអាចដាំរុក្ខជាតិដោយផ្ទាល់នៅលើឋានព្រះចន្ទ ដែលនឹងជួយសន្សំសំចៃការចំណាយសម្រាប់បេសកកម្មក្នុងលម្ហនាអនាគតដ៏ស្មុគស្មាញ និងសម្រួលដល់ការធ្វើដំណើរកាន់តែយូរ និងវែងឆ្ងាយ។
លោក ប៊ីល នែលសិន ប្រធានទីភ្នាក់ងារអវកាសអាមេរិកបាននិយាយថា៖ «ការស្រាវជ្រាវនេះគឺមានសារៈសំខាន់ចំពោះគោលដៅរុករកក្រៅភពរយៈពេលវែងរបស់ NASA»។
លោកបន្តថា៖ «យើងនឹងត្រូវការប្រើប្រាស់ធនធានដែលមាននៅលើឋានព្រះចន្ទ និងភពព្រះអង្គារដើម្បីអភិវឌ្ឍប្រភពអាហារសម្រាប់អវកាសយានិកនាពេលអនាគត ដែលអាចឱ្យពួកគេស្នាក់នៅ និងធ្វើប្រតិបត្តិការក្នុងលម្ហបានស៊ីជម្រៅ»។
សម្រាប់ការពិសោធរបស់ពួកគេអ្នកស្រាវជ្រាវបានប្រើដីតែ ១២ក្រាម (២-៣ស្លាបព្រាកាហ្វេ) ដែលប្រមូលបានពីកន្លែងផ្សេងៗនៅលើឋានព្រះចន្ទក្នុងអំឡុងពេលបេសកកម្ម Apollo 11, 12 និង 17។
រូបថតពីវិទ្យាស្ថានវិទ្យាសាស្ត្រចំណីអាហារ និងកសិកម្មសាកលវិទ្យាល័យផ្លរីដា បង្ហាញពីរុក្ខជាតិដុះចេញពីដីភពព្រះចន្ទ។ AFP
នៅក្នុងផើងដែលមានទំហំតូចគេដាក់ដីប្រហែល១ក្រាមហើយអ្នកស្រាវជ្រាវបានជ្រើសរើសដាំរុក្ខជាតិarabidopsis thaliana ដែលជាសាច់ញាតិរបស់ពូជ mustard greens ព្រោះវាងាយលូតលាស់ ធន់កត្តាដី និងអាកាសធាតុ សូម្បីតែបរិយាកាសលម្ហ។
ដោយបន្តក់ទឹកជីវជាតិជារៀងរាល់ថ្ងៃជាលទ្ធផលបន្ទាប់ពី ២ថ្ងៃរុក្ខជាតិបានលាស់ពន្លក។
អ្នកស្រីអាណាលីសា ប៉ូល អ្នកដឹកនាំសាកលវិទ្យាល័យផ្លរីដាបាននិយាយនៅក្នុងសេចក្តីថ្លែងការណ៍មួយថា៖ «រុក្ខជាតិទាំងអស់មិនថាដាំដោយប្រើដីឋានព្រះចន្ទដីលើផែនដី ឬពីភពអង្គារវាមានសណ្ឋានលូតលាស់ស្ទើរតែដូចគ្នារហូតដល់ថ្ងៃទី៦»។
បន្ទាប់ពីរយៈពេល ២០ថ្ងៃអ្នកវិទ្យាសាស្ត្របានប្រមូលផលរុក្ខជាតិទាំងអស់ហើយដំណើរការសិក្សាលើ DNA របស់ពួកវា។
ការវិភាគរបស់ពួកគេបានបង្ហាញថា រុក្ខជាតិដាំដោយប្រើដីឋានព្រះចន្ទមានលក្ខណៈស្រដៀងគ្នានឹងរុក្ខជាតិដែលដាំដុះក្នុងបរិយាកាសអត់ជីជាតិដូចជាដី ដែលមានអំបិលច្រើនពេក ឬផ្ទុកលោហធាតុខ្លាំង។
នៅពេលអនាគតអ្នកវិទ្យាសាស្ត្រចង់ស្វែងយល់ពីរបៀបដែលបរិយាកាស និងសណ្ឋានដីព្រះចន្ទនេះអាចអំណោយផលដល់ការដាំរុក្ខជាតិឱ្យប្រសើរជាងនេះ។
អង្គការ NASA កំពុងរៀបចំត្រឡប់ទៅឋានព្រះចន្ទវិញជាផ្នែកនៃកម្មវិធី Artemis ដោយមានគោលដៅរយៈពេលវែងក្នុងការបង្កើតវត្តមានមនុស្សយូរអង្វែងនៅលើដែនដីចន្ទ្រា៕ AFP
