.jpg)
លោក ខូហ្វី និងបុគ្គលិកចូលរួមកិច្ចការកាត់តម្រឹមប៊ូតុងទូរស័ព្ទលើកម្រាលព្រំដើម្បីផ្គុំជារូបភាពសិល្បៈ។ AFP
ក្រុងប៊ីហ្កើរវីល៖ ដោយប្រើការបិទភ្ជាប់ក្តារចុចទូរស័ព្ទដៃរួមគ្នាដើម្បីបង្កើតជាវត្ថុ សិល្បៈ វិចិត្រករជនជាតិកូតឌីវ័រ មូនូ ឌីហ្សាយអឺ កូហ្វី (Mounou Desire Koffi) សង្ឃឹមថា នឹងលើកកម្ពស់ការយល់ដឹងអំពីការបំពុលបរិស្ថានភពផែនដី។
សិល្បករដែលស្នាដៃរបស់គាត់ដាក់តាំងបង្ហាញក្នុងទីក្រុងអាប៊ីដជេន រហូតដល់ខែកក្កដាបាននិយាយថា៖ «ខ្ញុំចង់ចូលរួមចំណែកអ្វីដែលថ្មី»។
នៅក្នុងស្ទូឌីយោរបស់គាត់ក្នុងទីក្រុងប៊ីហ្គើរវីល ជិតរដ្ឋធានីពាណិជ្ជកម្មនៃប្រទេសកូតឌីវ័រ បុរសវ័យ២៨ឆ្នាំរូបនេះពណ៌នាថាខ្លួនគាត់ជា «សិល្បករសហសម័យវ័យក្មេង» ដែលប្រាថ្នាភាពលេចធ្លោខុសពីសិល្បករដទៃ។
លោកបាននិយាយថា៖ «ខ្ញុំស្រឡាញ់ការគូរតាំងពីកុមារភាព។ គ្រូតែងតែហៅខ្ញុំឡើងក្ដារខៀនរាល់ម៉ោងរៀនមេរៀនគំនូរ»។
លោក ខូហ្វី ពិនិត្យមើលរូបភាពនៅលើក្តារចុចទូរស័ព្ទ ដែលលោកបានប្រើដើម្បីបង្កើតស្នាដៃសិល្បៈ។ AFP
នៅពេលដែលលោកសម្រេចចិត្តថា ចង់បន្តការសិក្សាផ្នែកសិល្បៈ ឪពុកម្តាយរបស់លោកដែលជាកសិករនៅភាគនិរតីនៃប្រទេសកូតឌីវ័រ មិនដឹងថាជំនាន់នោះជាអ្វីឡើយ។
គ្រូសិល្បៈរបស់លោក ខូហ្វី ត្រូវទៅជួបឪពុកម្ដាយរបស់លោកដល់ផ្ទះដើម្បីបញ្ចុះបញ្ចូលសុំការអនុញ្ញាតឱ្យលោករៀនជំនាញនេះ។
បន្ទាប់ពីបញ្ចប់ការសិក្សានៅថ្នាក់កំពូលពីសាលាសិល្បៈអាប៊ីដជេន លោក ខូហ្វី បានចាប់ផ្តើមស្វែងរកក្តារចុច និងអេក្រង់ទូរស័ព្ទចាស់ៗនៅតាមដងផ្លូវ និងកន្លែងចាក់សំរាម។
លោកនិយាយថា៖ «ឥឡូវនេះខ្ញុំមានក្រុមទាំងមូលដែលទទួលបានប្រាក់ឈ្នួលទៅតាមអ្វី ដែលពួកគេអាចរកបាន»។
លោក ខូហ្វី បន្តថា៖ «ខ្ញុំបានប្រាប់ពួកគេថា ឈប់បោះរបស់ចោលទៅ។ យកវាមកឱ្យខ្ញុំហើយយើងអាចធ្វើការជាមួយគ្នាបាន»។
វិចិត្រករជនជាតិកូតឌីវ័របង្កើតស្នាដៃសិល្បៈជាមួយនឹងក្ដារចុចទូរស័ព្ទដែលប្រើរួចនៅផ្ទះក្នុងក្រុងប៊ីងហ្គើរវីល។ AFP
នៅក្នុងស្ទូឌីយោរបស់លោក គ្រប់គ្នាបានទម្លាក់កាបូបដែលពោរពេញដោយគ្រឿងបន្លាស់ទូរស័ព្ទ។
លោក ខូហ្វី ចាប់ផ្ដើមរាវរកក្នុងគំនរក្ដារចុចនិងអេក្រង់ដើម្បីស្វែងរកអ្វីដែលលោកត្រូវការ។
ដោយដាក់ពួកវាជាប់គ្នានៅលើផ្ទាំងក្រណាត់ លោកបានបង្កើតរូបភាពមនុស្សចម្រុះពណ៌។
ស្នាដៃមួយចំនួនរបស់លោកអាចលក់បានរហូតដល់ ១ ៥០០ដុល្លារ។
លោក ខូហ្វី និយាយថាគោលបំណងគឺដើម្បីព្យាយាម «ដោះស្រាយបញ្ហា»នៅក្នុងប្រទេសអត់មានការទុកដាក់សំរាមរៀបរយទាល់តែសោះ ហើយកាកសំណល់តាមផ្ទះភាគច្រើនត្រូវបោះចោលតាមដងផ្លូវ។
វិចិត្រករជនជាតិកូតឌីវ័រលោក ខូហ្វី (ឆ្វេង) ស្វែងរកក្ដារចុចទូរស័ព្ទពីគំនរសំរាម។ AFP
លោកបានបន្តថា៖ «ស្នាដៃរបស់ខ្ញុំភាគច្រើនឆ្លុះបញ្ចាំងពីការរស់នៅប្រចាំថ្ងៃរបស់មនុស្សក្នុងសង្គម»។
សិល្បករសហសម័យរូបនេះបន្តថា៖ «ខ្ញុំគិតថាទូរស័ព្ទគឺជាឧបករណ៍ដែលនៅជិតខ្លួនយើងបំផុតនៅពេលនេះ។ យើងមានស្ទើរតែអ្វីៗទាំងអស់នៅក្នុងទូរស័ព្ទរបស់យើង»។
វិចិត្រករដែលបានតាំងពិព័រណ៍ស្នាដៃរបស់គាត់នៅប្រទេសម៉ារ៉ុក បែលហ្ស៊ិក និងបារាំង រូបនេះបាននិយាយថា ស្នាដៃរបស់លោកក៏ព្យាយាមបំផុសគំនិតអំពីកាកសំណល់លើភពផែនដីផងដែរ។
លោក ខូហ្វី និយាយថា៖ «យើងរកឃើញវត្ថុគ្រប់ប្រភេទនៅក្នុងធុងសំរាមរបស់យើង។ខ្ញុំកំពុងព្យាយាមធ្វើឱ្យមនុស្សយល់ដឹងកាន់តែច្រើនជាងនេះ»៕ AFP/HR
ស្ត្រីថតរូបស្នាដៃសិល្បៈរបស់លោកខូហ្វីនៅពិព័រណ៍មូលនិធិ Donwahi ក្នុងទីក្រុងអាប៊ីដជេន នៅថ្ងៃទី ២៩ ខែមេសា ឆ្នាំ២០២២។ AFP
