ក្រុងញូវដែលី៖ ក្រុមចោរ១ក្រុមបានប្រគល់រូបព្រះជាង១០អង្គ ដែលពួកគេបានលួចពីប្រាសាទហិណ្ឌូបុរាណមួយក្នុងប្រទេសឥណ្ឌាដោយនិយាយថា ពួកគេត្រូវបានខ្មោចលង និងដេកសុបិនអាក្រក់រហូតតាំងពីប្រព្រឹត្តបទឧក្រិដ្ឋនេះមក។
អធិការប៉ូលិស រ៉ាជីវ ស៊ីង បានប្រាប់ AFP កាលពីសប្តាហ៍មុនថា ក្រុមនេះកាលពីសប្តាហ៍មុនបានលួចរូបសំណាកចំនួន១៦ពីប្រាសាទ Lord Balaji ដែលមានអាយុកាល ៣០០ឆ្នាំ ជាឈ្មោះយកតាមការចាប់បដិសន្ធិនៃព្រះវិស្ណុរបស់ហិណ្ឌូ។
លោកបាននិយាយថា នៅយប់ថ្ងៃចន្ទពួកគេទុកចម្លាក់ ១៤អង្គនៅជិតផ្ទះរបស់អាចារ្យនៃព្រះវិហារនៅក្នុងស្រុកជីត្រាឃូត ក្នុងរដ្ឋអ៊ូតារប្រាដេស។
លោក ស៊ីង បាននិយាយថា៖ «ពួកគេក៏បានបន្សល់ទុកនូវលិខិតសារភាពមួយដែលបាននិយាយថា ពួកគេកំពុងវិលត្រឡប់មកវិញពីព្រោះពួកគេយល់សប្ដិអាក្រក់ ហើយវាគួរឱ្យខ្លាចណាស់»។
សំបុត្រនោះក៏បានសរសេរអង្វរសុំការអភ័យទោស។
រូបបដិមាមួយអង្គត្រូវបានធ្វើពីលោហធាតុចំនួន៨និងមានទម្ងន់ប្រហែល៥គីឡូក្រាម ហើយវត្ថុចោរកម្មនោះក៏មានគ្រឿងលម្អប្រាក់ដែលប្រើសម្រាប់តុបតែងរូបព្រះផងដែរ។
ចំណែកក្រុមចោរនៅមិនទាន់ត្រូវបានស្គាល់អត្តសញ្ញាណនៅឡើយ។
នៅក្នុងលិខិតសារភាពរបស់ពួកគេជាភាសាហិណ្ឌូពួកគេបាននិយាយថា៖ «យើងមិនអាចគេងហូបចុក និងរស់នៅដោយសន្តិភាពទេ។ យើងធុញទ្រាន់នឹងសុបិនដ៏គួរឱ្យខ្លាច ហើយយើងកំពុងប្រគល់វត្ថុមានតម្លៃរបស់អ្នកត្រឡប់ទៅឱ្យអ្នកវិញ»៕ AFP/HR