ទីក្រុងអ៊ីស្លាម៉ាបាដ៖ តារាប្រព័ន្ធផ្សព្វផ្សាយសង្គមប៉ាគីស្ថាន ដែលមានអ្នកតាមដានរាប់លាននាក់ កំពុងប្រឈមនឹងការរិះគន់ បន្ទាប់ពីបង្ហោះវីដេអូ TikTok ដោយភ្លើងឆេះព្រៃ ខណៈរលកកម្ដៅដ៏សាហាវ បង្កឱ្យមានទុក្ខធំពេញប្រទេស។
នាង Humaira Asghar បានបង្ហោះវីដេអូឃ្លីបរបស់នាងក្នុងឈុតពណ៌ប្រាក់កំពុងដើរលេងយ៉ាងសប្បាយរីករាយនៅពីមុខភ្នំដែលកំពុងឆេះដោយមានចំណងជើងថា «ភ្លើងឆេះគ្រប់ទីកន្លែងដែលខ្ញុំរស់នៅ»។
វាកើតឡើងបន្ទាប់ពីប៉ូលិសបានចាប់ខ្លួនបុរសម្នាក់កាលពីដើមខែនេះនៅក្នុងទីក្រុងអាប៊ុតាបាដ ភាគពាយព្យពីបទមានចេតនាចាប់ផ្តើមភ្លើងឆេះព្រៃជាផ្ទៃខាងក្រោយសម្រាប់ការថតវីដេអូមួយ។
សីតុណ្ហភាពបានឡើងដល់កម្រិត ៥១អង្សាសេ នៅតំបន់មួយចំនួននៃប្រទេសប៉ាគីស្ថានក្នុងប៉ុន្មានថ្ងៃថ្មីៗនេះ ដែលធ្វើឱ្យប្រជាជនក្រីក្រ និងជនងាយរងគ្រោះខំត្រដររស់តទល់នឹងកម្ដៅដ៏ឆេះឆួលនៅក្នុងប្រទេសដ៏ក្រីក្រមួយនេះ។
នាង Asghar ដែលមានអ្នកតាមដានច្រើនជាង១១លាននាក់នៅលើ TikTok បាននិយាយនៅក្នុងសេចក្តីថ្លែងការណ៍ដែលចេញផ្សាយដោយជំនួយការថានាងមិនបានចាប់ផ្តើមភ្លើងទេហើយមិនមាន «គ្រោះថ្នាក់ក្នុងការបង្កើតវីដេអូនេះដែរ»។
ឃ្លីបនេះត្រូវបានដកចេញចាប់តាំងពីពេលនោះមក។
សកម្មជនបរិស្ថាន Rina Saeed Khan Satti និងជាប្រធានក្រុមប្រឹក្សាគ្រប់គ្រងសត្វព្រៃក្រុងអ៊ីស្លាម៉ាបាដ បានប្រាប់ AFP ថា៖ «នាងគួរតែកាន់ធុងទឹកដើម្បីពន្លត់ភ្លើង ជំនួសការយកអគ្គិភ័យធ្វើជាទិដ្ឋភាពថតវីដេអូ»។
ក្រុមនេះបាននិយាយថា យ៉ាងហោចណាស់មានករណីភ្លើងឆេះមួយទៀតនៅសប្តាហ៍នេះ នៅតំបន់ភ្នំជុំវិញរដ្ឋធានីប៉ាគីស្ថាន ដោយវាត្រូវបានដុតសម្រាប់ការវីដេអូបង្ហោះតាមបណ្ដាញសង្គម។
សកម្មជនបរិស្ថាន Satti បាននិយាយថា៖ «សារដែលវីដេអូទាំងនេះកំពុងបង្ហោះគឺមានគ្រោះថ្នាក់ខ្លាំងពេកហើយវាត្រូវតែមានការហាមប្រាម»។
មតិមួយនៅក្រោមវីដេអូរបស់ Asghar នៅលើ TikTok បាននិយាយថាសកម្មភាពរបស់នាងគឺ «ល្ងង់ខ្លៅ និងឆ្កួតលេលា»។
ប៉ាគីស្ថានគឺជាប្រទេសដែលងាយរងគ្រោះបំផុតទី៨ចំពោះអាកាសធាតុធ្ងន់ធ្ងរដែលបណ្តាលមកពីការប្រែប្រួលអាកាសធាតុ នេះបើយោងតាមសន្ទស្សន៍ហានិភ័យអាកាសធាតុសកលដែលចងក្រងដោយ NGO Germanwatch។
ប៉ុន្តែអ្នកជំនាញនិយាយថា មានការខ្វះការយល់ដឹងក្នុងចំណោមប្រជាជនអំពីបញ្ហាបរិស្ថាន។
ភ្លើងឆេះព្រៃជារឿងធម្មតា ចាប់ពីពាក់កណ្តាលខែមេសា ដល់ចុងខែកក្កដា ដែលបង្កឡើងដោយសីតុណ្ហភាព រន្ទះ ក៏ដូចជាការកាប់បំផ្លាញ និងដុតបំផ្លាញ។
TikTok ត្រូវបានប្រើប្រាស់យ៉ាងទូលំទូលាយដោយយុវជននៅក្នុងប្រទេសប៉ាគីស្ថាន ហើយវីដេអូជារឿយៗទទួលបានការចូលចិត្តរាប់រយរាប់ពាន់នាក់ និងធ្វើឱ្យម្ចាស់វីដេអូល្បីមួយរំពេច៕ AFP